اليوم نحكيلكم على تجربتي في تعلم طريقة تحضير السمن، لتوة مدرتهاش بروحي لكن عمتي (والدة زوجي) تشرحلي لما تطيب فيها، و في واحدة من المرات وصيتها لما تطيبها تقولي باش نصورلكم المراحل أول بأول ونشرحلكم الطريقة.

أول شئ عمتي ديما لما يشروا حليب بالكيلو يسخنوا فيه للتعقيم ويغلوه غلوتين، بعدين يخلوه لعندما يبرد، يبيتوه في الثلاجة للصبح باش تزيد كمية القشطة، ثاني يوم حتلقوا طبقة معتبرة من القشطة فوق الحليب، بالكاشيك متع الصفاية تصفوا منه الحليب وتخزنوه في الفريز، وكلما تشروا حليب خزنوا القشطة مع القشطة الأولى لعندما تعبوا العلبة اللي تجمدوا فيها، وقتها يجي الوقت باش تطيبوا كمية معتبرة من السمن.

المقادير عبارة عن القشطة اللي جمعتوها وقالب زبدة، زمان عمتي كانت تستعمل فيلادلفيا او لورباك لعندما سعرهم أصبح خيالي بدت تستعمل في زبدة صناعة مصرية، وتحط القرنفل باش ريحة السمن لما يطول في التخزين متتغيرش والقرنفل يعتبر مادة حافظة، وملح حسب الكمية لو هلبة كميتك ملعقة صغيرة ولو أقل نص ملعقة صغيرة. تولعي عليها النار ومتقويهاش وتخلي المكونات تذوب وتطيب مع بعض زيما في الصور.

أهم شئ متعليش النار لأنها حتفور وتتبزع من الطنجرة، ولما تطيبيها يفضل الطنجرة تكون كبيرة و الكمية توصل للنص تحسبا لأي حوادث وباش تعطيها مساحة تفور ، ولما تلقيها ثقلت وبدت تعطي اللون الأصفر، قلبيها من تحت باش متلصقش في قاع الطنجرة.

وهذا شكلها أول ما تذوب المكونات مع بعض، وخلوها تغلي براحتها لكن مرة مرة تحركوها باش متلصقش من تحت.

لما الشوائب هذي يولي لونها ذهبي والسائل لونه بني فاتح معناها ولت جاهزة، طفي النار عليها وحركيها لمدة عشر دقائق باش تنتشر النكهة ولانك لو خليتيها زيادة حيضيع الطعم الحلو ليها و تنحرق. 

لما تطيب وتوصل للمرحلة هذي، تطفي النار وتخليها ترتاح، لخمس دقائق، بعدين تصبي السمن في الفازو لكن تحطي صفاية فتحاتها صغيرة باش تنزل السمنة صافية، وخليهم مفتوحين لعندما تبرد كليا، سكريهم و خزنيهم.

والان نأتي للفجعة الحقيقية وهي الطنجرة و شكلها النهائي ههههههه، حطي فيها مية وصابون سائل وخليها تغلي عالنار، بعدين خليها تتنقع لعندما تتنحى الطبقة كليا، ممكن تضطري تنقعيها يومين او ثلاثة.

أنا منحبش السمنة، نتذكر زمان كنت نتغذى في بيت جدي، رز وجو وحركات، من أول كاشيك مقدرتش نكمله لأن مرت خالي ذوبت سمن وصبت منه على الرز بعدما تكماته في الصحن.

لكن السمن متع عمتي طعمه خفيف وريحته حلوة، تستعمل فيه في التطييب مع الزيت ومتكترش، والأحلى لما تطيب بيه المعمول، لكن الحق مرة دارو بيه بيض مقلي مقدرتش نتحمل وناكل، يعني مازال منحبش نحس بطعمه، وهذا في صالحي باش وزني يشد روحه.

هذي طريقة تحضير السمن في البيت، لو جربتي الطريقة وعجباتك احكيلي عن تجربتك معها، ولو تبي تنصحي حد يجربها فاحكيله عن المقالة وشاركيها :) باش الكل يتعلم و يستفيد.

محبتي ،، 

#طبخ #سمن #سمنـبلدي #سمنةـبلدي #margarine #butter #cooking

مرحبا عزيزاتي ،،
كانت فترة غياب طويلة وأخيرا رجهت، المقالة هذي حتكون إجابة لهلبة أسئلة وصلتني بخصوص حفلة العرس والاستعداد ليها بالذات التسريحة، أهم شئ تقووا قلبكم لأني خليت راحة البال هي العنوان الرئيسي للعرس، حاولت منعقدش روحي قدر الممكن ونخلي البساطة والروقان هي عنوان حفل زفافي.

1- تسريحة الشعر:

بالنسبة لي الموضوع كان مهم جدا، لأني حضرت هلبة مناسبات وسمعت قصص عرائس عن معاناة التسريحة وكيف ينحوها، وبصراحة عن نفسي نفضل التسريحة اللي تبين ملامح الأنوثة عند المرأة واللي هي الشعر المسدول، هذا من جهة ومن جهة ثانية كانت سبلة باش نغطي أكبر قدر من الظهر لأن الفستان حتشوفوه في الصور كيف، و متعودتش على هكي وبصراحة منبيش لقطة اللي في عرسها تلبس فستان غير محترم هلبة، يعني حاولي يكون محترم قدر الممكن في حدود الجمال والأناقة والأهم النعومة.
التسريحة اللي في بالي كانت شعر مسدول فشقلبت موقعين متأكدة أني حنلقى فيهم اللي نبيه، انستاجرام وبنترست هذو كنز من الافكار وبالفعل شقلبت وشقلبت وفي الاخير وصلت لفكرة شعر مسدول ووردة عالجنب زي الصور هذي.



وأكثر واحدة عجبتني كانت التسريحة هذي.


وتوة السؤال الأهم كيف حنتصرف يوم العرس؟ نمشي للمزين تديرلي شعري بعدين نروح جري للحوش باش نحط الماكياج ونبدل أو ندير شعري في البيت؟ لكن أصلا من حيفضى بيا، فكرت نديره بروحي لكن على من الكذب مش وقت توتر وفلاحة زايدة وحوسة، من هنا وهنا صاحبتي قالتلي عن بنات يجو للبيت يديرو في تسريحات وماكياج، ولعت اللامبة فوق راسي قصقصت من الشعب لو فيه واحدة بتجي للبيت باش ننحي من بالي فكرة المشي للمزين كليا، وفعلا لقيت واحدة ممتازة جت للبيت  وقعدنا بمزاجنا أنا وخواتي وجتنا هي عالموعد وكانت خدماتها سريعة وممتازة، دارتلي شعري ولما كملت وروحت كل واحدة كانت لاهية في روحها وأنا خذيت العدة وسكرت على روحي في أكثر مكان فيه إضاءة طبيعية في البيت وبديت مرحلة الماكياج.

بالنسبة للتسريحة طبعا كانت تبي اكسسوار اللي هو الوردة، من وين بنجيب وردة كويسة وحلوة (لأني شخص ميعحباش العجب)، ولانه معنديش فيزا كارد باش نشري وبصراحة التكلفة حتكون عالية على خاطر وردة تلتبس كم ساعة وتتنحي وفوقها مصاريف الشحن لهذا فتت الفكرة وقررت نصنعها بروحي!! شقلبت اليوتيوب والنت وفعلا لقيت نساوين يصنعوا في توكات ورد، لكن بعد كم فيديو حسيت روحي نبالغ في المغامرة، وبعدين اتخذت القرار النهائي، التوكة حنديرها بوردة طبيعية!!! تاداااااااااا

مشيت لمحل ورد قبل العرس بثلاث ايام، سألت عالاسعار وكانت الوردة بدينارين، سألته كم تلزمني وردة لباقة عروس قالي زي هذي (وراني باقة) عدينا كم فيها تقريبيا طلعوا عشرين وكان المقاس ممتاز بالنسبة لي، قلتله يزيد عليهم وردتين ومنبيهمش مفتوحات هلبة باش يتحملوا، وبصراحة الورد الطبيعي أحلى، خلصت عربون وأعطيت الوصل لبنت خالي جابتلي الورد يوم الحفلة، حطيته في مزهرية وكان عندي أشرطة هدايا (حشيشتي تغليف الهدايا لهذا عندي هلبة خمنتش زي هذا، ومعها مسدس اللصقة) شرحت لبنت خالي شن نبي، قلتلها تلم الورد مع بعضه، تشده بخيط الاول بعدين تلف عليه الشريط أو المسطرو وتقص الزايد وتلصقه، بس!! بكل بساطة كلفتني الباقية 40 دينار نياهاهاهااها وجهزناها يوم العرس، لأني كنت عارفة روحي مسافرة والموضوع مش مستاهل نوصي على باقة و نحرق دمي بعدين ما عندي وين نحطها!! وهذي صورة الباقة بعدما تشحطت في ليلة عرس هههههه، متنخلعوش المهم قبل الحفلة كيف كانت :D


بالنسبة للوردة اللي في اكسسوار الشعر قبلما نمشوا للصالة بالضبط، وكلنا كنا لابسين وواتيين طلعت مشبك شعر غرقاته بنت خالي  في اللصقة متع المسدس وقبلما تجف ثبتت عليها الوردة بعدما نحيت العرف متعها، لكن حطيتها على شعري لما وصلنا الصالة باش متبهدلش في الطريق بسبب الكاب (والله الأمور بسيطة بس نحنا اللي معقدين حياتنا).
هذا شكل المشبك بعدما روحت، الوردة خلاص معاش عندها حيل تشد روحها، بس المهم تحملت الحفلة.


الماكياج:

من زمان كلما نشوف عروس نقول كان سخر ربي وصار مني وتزوجت هل حنخلي مزينة تلبزني زيما يلبزوا في هلبة عرايس ويخلوا فيهم وجههم أبيض زي المهرج؟؟ المرة اللي قررت فيها قرار نهائي أن مكياج عرسي حنديره بروحي كان في عرس صاحبتي، الماكياج لغى كليا جمالها الحقيقي والمزينة تعاملت معها كأنها لوحة رسم بيضاء ولازم تخفي أي معلم من معالم وجهها الحقيقي ورسمت كل شئ من الصفر، يومها وانا نسلم على صاحبتي ونشوف في تشققات الماكياج، قعدت نفكر زعما شن حيكون شعور زوجها في أهم لحظة لما يكون قريب منها وتكون أول نظرة بينهم عن قرب ؟؟ نعم من 2010 اتخذت القرار هذا وتم حسم الأمر.

لما سخر ربي وتمت الخطوبة بديت في المخطط وجمع المعلومات، تذكرت أني زمان شفت فيديوات لواحدة اجنبية كانت تعلم في كيف نحطو ماكياج، ودارت مرة مكياج عروس هندية كنت مقررة نديره هو، لكن لما سخر ربي وخشيت عاليوتيوب بعد غياب عن متابعة فيديوات المكياج اكتشفت ان المنافسة قوية هلبة بين البنات عالنت، ومنها شلقبت هلبة فيديوات لعندما لقيت اللي يعجبني، لكن الحق مع الوقت كل مرة نتفرج على واحدة وناخذ في نصائحها، ونزيد فيها على اللي نبي نديره، استقريت في النهاية على فيديو واحد وهو اللي طبقته حرفيا في العرس.

فيه حاجة عجبتني في مكياج الأجنبيات وهي واقعيتهم فيه، أغلبهم يستعملوا في الألوان والدرجات الترابية اللي تعتبر تدرجات لون البشرة، هذا تفكير منطقي لأنه زيما قلتلكم الماكياج هو إبراز جمال المرأة مش تلوين بألوان قوس قزح وحاجات غريبة عجيبة، أغلب نصائحهم حنحطها في النقاط هذي:

1- الماكياج حاولي تخليه مناسب ولا ينتمي لأي موضة باش لما تشوفي صورك بعد سنين متقوليش خيره ذوقي كان شلافطي زمان؟؟ اعتقد أغلبكم يعرف موضة رسم الشفاه زمان بالقلم الداكن والروج فاتح والمنظر كيف كان عبيييييييييط!!
2-  ابعدي عن الألوان القوية والأسود قدر الامكان، عن نفسي ديما نفكر في شعور الرجل لما تنحي الماكياج، تخيلي تكوني حاطة مكياج اسود قوي وفجأة تنحيه، حتباني كأنك مريضة!!
3- تغذية البشرة والعناية بها أساس الماكياج الممتاز، لما البشرة تكون رطبة وصحية الماكياج حيبان حلو، لكن لو جافة ومتبهدلة حتعاني شوية من الموضوع هذا.

الفيديوات اللي تعلمت منها وتابعتها فيما يخص مكياج العرس هما:
الفيديو الأول للمبدعة كلوي موروللو: خفيف هلبة لين بيخ لكن لقيت أحسن منه



وهذا أعجبني داراته واحدة اسمها سونا، دارت المكياج على صديقة حتى هي عندها قناة مكياج عاليوتيوب.


الفيديو هذا ممتاز و يعكس هلبة حاجات من ذوقي وتناسبني، تقدروا تقولي شبه حفظته هههههه ننصح جدا بمتابعته :)



هذي منتابعش فيها لكن تفرجت على الفيديو متعها وكان مفيد، فيديو مشترك بينها و بين صديقة كل واحدة دارت فيديو مكياج العرس.



 الفيديو هذا ميزته نعومة ألوانه وهذا أكثر شى عجبني في الاجنبيات، البساطة، وبالله ركزوا في جمال العيون كيف بان مع ألوان خفيفة جدا.



وهذا هو المكياج اللي عجبني واستقريت عليه وقعدت نتدرب عليه فترة قبل العرس، وشريت أغلب الحاجات اللي استعملتهم، وبالمرة اعتبرت أن هذا هو المكياج اللي نبي نشريه. يعني استغليت الفيديو باش نعرف شن ناخذ لروحي من مكياج، ومن باب البرود أختي مرعشتني باش نوتي روحي بسرعة ونمشي معهم للصالة مع بعض لأنه مفيش من يقعد معي وزوجها يبي يتفرج عالمباراة هههههههه يعني من الأخير سقدي روحك واطلعي لهذا مقدرتش نحط كمية لا بأس بها من الرموش لأني اخترت نحطهم بالرمش باش يبانوا واقعيين أكثر، وعادي مشت الأمور من غيرما نحط الكمية اللي كنت مخططة لها!!


وهذي جلسة الماكياج يوم الفرح، نشرت الصورة لايف على انستاجرام لما بديت يوم الحفلة :)


وهذي صورة الاستعداد للماكياج في الحفلة الثانية :)


فستان الفرح:
فستان الفرح كان فيه مواصفات معينة لازم تتوفر فيه أولها البساطة والنعومة والرقي وأهم شئ مريح في الحركة، مش كلما نتحرك يكون فيه حد وراي يكر معي أو مش قادرة نمشي طبيعي لأن الفستان معقد، وأكره ما عندي القونة اللي من تحت اللي تنفخ فيه، قصدي مش حلوة حاجة تزوير للحقائق ههههه يا ينتفخ بالقماش والتول يا بلاش، ولأن حالتي خاصة  جدا لأني حندير حفلتين فالبساطة كان لها الأولوية.

دورت هلبة وفكرت نخيط وفي الأخير قررت ندور عالنت، شقلبت هلللللبة مواقع لعندما لقيت اللي عجبني، بسيط هللللبة لكن أنيق جدا وقماشته ممتازة، سعره كان غالي فقعدت نتابع فيه وفجأة مع نهاية 2014 بدت التخفيضات لتصفية البضاعة، فالموقع في البداية دار تخفيضات 20% مازال غالي فته، بعدين بعد فترة لقيتهم داروا تخفيض 50% فته، لأني كنت مشتركة في اخبار الموقع فكانت إعلانات التخفيضات توصلني أول بأول، وفجأة في أخر اسبوعين من السنة داروا تخفيض 70% وهنا كان لازم نتحرك، وفعلا درت كل جهودي باش نشريه، اونلاين منشراش وفي الاخير وصيت معرفة مشيتهم للمحل غادي باش يشروه ولحقوا على آخر واحد مقاسي والحمد لله، و خذيت معه طرحة طويلة يعني اطول بشوية، منبيش نكر حاجة وراي، وصل القفطان بالشحن ومشيت نستلمه من ارامكس وقعد القفطان سنة كاملة مركون في الدولاب لأن العرس تأجل هلبة كل مرة يصير ظرف يخلينا نأجلوا.

المرحلة الثانية كانت الحفاظ على مقاسي باش لما يجي وقت العرس منطلعش سمنت أو نقصت فكل فترة نطلعه نقيسته وبناء عليه نعرف وضعي.

القفطان أخذته من موقع مونسون على الانترنت، وأحلى حاجة أنهم بعتوا معه عينة قماش من الفستان نفسه وعينة من الطرحة، الموضوع هذا ساعدني هلللبة لأني كنت نبي نخيط جاكة للفستان، بعدين حنقوللكم علاش نبي الجاكة، المهم لفيت جميع المحلات المعروفة باش نلقى قماش مناسب للفستان وبمستوى قماشه ملقيتش اللي نبيه والاسعار كانت خرافية، فصدفة مشيت مرة لبوسليم وسبحان الله من أول محل نخشله نلقى قماش قريب هلبة واللون نفسه و المتر ب 15 دينار، شريت اللي لازمني وخذيت بزيادة من باب الاحتياط وبديت رحلة البحث عن خياطة واستقريت على مشغل طراز في النوفليين، وكانت أول مرة في حياتي نخيط حاجة ونكون فعلا راضية عن النتيجة و ميعكوليش فيها، وحتى الجاكة قعدت مركونة في الدولاب لشهووور هههههههه.





جو ههههههه كلما نتذكر روحي ومن وين جبت الجرأة هذي نستغرب وفي نفس الوقت نحس بالسعادة لأن النتيجة كانت ممتازة بشهادة الجميع، الكل فهموا أني كنت نقصد البساطة في اللي درته و هذا اللي وصللهم فعلا والحمد لله، وكانت الاراء اللي وصلتني كلها شخصيا أو عن عن شخص بالإعجاب حتى اللي يخدموا في الصالة قالوا بروحهم "دارت اللي في راسها" :) .. الحمد لله

الفستان أخذته بسيط لأني كان عندي حفلتين للعرس، واحدة في ليبيا نسائية والثانية في مصر مختلطة، لأن زوجي وأهله من أيام جدهم وهم عايشين في مصر، لهذا عندهم أقارب وأصدقاء غادي، فكان لازم نتقبل الفكرة، في البداية كانت صعبة لكن لما لقيت فستان الفرح اللي يناسب المناسبة هذي أصبح الموضوع مريح جدا بالنسبة لي.

فصلت جاكة للفستان أنيقة وبسيطة جدا، قبلها شقلبت النت على تصاميم وأفكار وجمعت هلبة ودورت حتى على الخياطات في طرابلس لأني متعقدة منهم وتجاربي في الماضي كلها تعيسة، مش متذكرة من قالي على مشغل طراز أنهم خيطولها فستان الفرح وبعتتلي صورة للفستان وشكرتهم هلبة، وفعلا مشيتلهم في مقرهم في النوفليين وأخذت معي صور للأفكار وأخذت الفستان، لكن الخياطة كان لها نظرة مختلفة واقترحت عليا فكرة مختلفة وعجبتني وفعلا التنفيذ كان حلو ومريحة جدا في اللبس، ومرت ترامب خنبت مني الفكرة لما زوجها استلم منصبه كرئيس في الجاكت متعها ههههههه باش تعرفوا بس.


طبعا اللمسة المصرية التعيسة كان لازم تفرض روحها في المشهد، مكانش فيه في البيت مكواة بخار فاضطريت نبعت الفستان لمغسلة على أساس تكوي بالبخار، جي واحد للبيت وأخذ فستاني وبدلة زوجي، ورجعهم في نايلو ما اكتشفتش أنه شوه الفستان الا لما لبسته، لو تلاحظوا في الصور الاولى الفستان عنده ثنيات من قدام، العبيط اللي كوى الفستان زاد ثنية منه ليه و شوه المنظر وطلعه متشرد جدا، ومن تلك اللحظة فقدت ثقتي كليا في الحصول على أي خدمات على أي مستوى هنا، بس نعتبرها عين وطارت وخلاص!!


حذاء العروس:
بالنسبة للكندرة مكنتش نبي كندرة بكعب عالي لأنها حتتعبني وتخليني نمشي زي الانسان الالي، نبي حاجة مريحة باش نتحرك براحتي، نطلع الدرج وننزل براحتي، نركب السيارة من غير تشحوير، فاخترتها من محل الفصول الأربعة في شارع الجمهورية خلف قصر الملك، هو محلي المفضل وخذيت لونها ذهبي أنيق مش بقاصي، على أساس بنلبسها أكثر من مرة وهذي من أهم النصائح لما تشري كندرة العرس، اشري حاجة تستفيدي بيها مستقبلا.


العطر:
قصته مضحكة، مرة شريت حاجة اونلاين، فلما وصلتني بعتولي معها عينة عطور من ضمنها عطر Si وأول ما شميته عيوني ولوا قلوب قلوب، وقررت أن هذا هو عطر العرس، وفعلا قعدت نقصقص وين نلقى عطور أصلية مضمونة فالغالبية نصحني بدبنهامز، وشريت العطر بالشئ الفلاني، ودسيته لعندما ربي يسخر ويتحدد موعد للعرس، للأسف العطر انتشر هلبة لين بيخ، ولما جي وقت العرس أختي رفضت أني نحطه ونصحتني نشوف عطر ثاني من كثرما ضاعت هيبة عطر Si لأن البنات يحطوا فيه في كل طبيخة حتى وهما ماشيين للدوام مع أنه قوي ومتع سهرات!! وفعلا دورت وشقلبت واستقريت على عطر Dolce اللي فعلا كان تحفة، خذيت ست كامل وست ثاني هدية لأخت زوجي، و الحمد لله طلع خاطرها فيه من الأول، وأحلى شئ أن زوجي عجبه العطر ومرة بخيت Si شرق قعد يكح معجباش بكل ههههههه ربي ستر وغيرته في اخر لحظة.


الطرحة:
الاشارب اللي لبسته في حفلة مصر دورت هلبة في طرابلس وملقيتش حاجة مناسبة في الأخير وصيت أخت زوجي وجابتهولي مناسب جدا زيما وصيتها. والطرحة حتى الطرحة من مونسون لكن ملقتلهاش صورة واضحة عالنت للأسف، المهم خذيتها طويلة شوية با دوب توصل للأرض باش تريحني في الحركة ونستعملها في الطرحة زي لفة الوشاح وخليت الباقي ينزل بروحه.


بالنسبة للبدلة الكبيرة والصغيرة والجو هذا كله فته ومعدلتش عليه، أولا مصاريف زايدة وانا من أنصار أن الواحد ميكثرش على العريس، نشوف فيهم كماليات زايدة جدا، مدرتش سهرية ولا قفة ولا الجو هذا كله، مدرتش حنة لأني كنت عابية صاحبتي تتدرب عليا وتزخرفلي حنة لكن خوها فاتها ممشاش باش يوصلها ههههههه افتكيت من الحنة لأني منحبهاش، درنا سهرية للنساوين اللي ميجوش للصالات فعزمناهم على عشاء في البيت، وثاني يوم كان الحفلة في قاعة الملكة، والعشاء كله من موزارت لأن العرس تحدد في زمن ضيق وكان كل شئ عالسريع، البكلاوة من معازيم وكل باقي الضيافة من موزارت باش نريح بالي لأنهم هما اللي يوصلوا الاكل للصالة وهما اللي يوتوها في الاطباق فهذا ريحني هلبة، القهوة من الصالة وتصدقوا حتى السيارة مفكرتش فيها ولا عدلت، خالي وصلنا للصالة وزوجي من عنده زبطوا السيارة.

لما جوا أهل زوجي أول مرة باش يخطبوا زوجي كان متوقع قائمة طلبات من أبي، لكن أبي مقالش أي كلمة والكلمة الوحيدة اللي قالها له خلال القعدة، هي خيرك ساكت؟ هههههههه كانت القعدة كلها رجالة كبار وهو الصغيرون بينهم.

موضوع زواجي كان صعب بالنسبة لأبي لأني أمازيغية وزوجي مصراتي، كبيرة هلبة عندنا لما البنت تطلع برا العيلة فما بالك أنها تتزوج مش امازيغي مرة واحدة، استغرق الموضوع شهر باش رد أبي على زوجي باش يجوا أهله لخطوبة رسمية، وليوم العرس وأبي متوتر ومش قادر يشد دموعه.

خلاصة كلامي حبيباتي، يسروا ولا تعسروا، واختاروا الرجل المحترم اللي يخاف عليكي، اللي يحترمك ويقدرك، اللي أخلاقه عالية ويعرف حدود الله. وإن شاء الله ربي يهني كل بنت و يرزقها الزوج الصالح.

وأهم شئ بسطوا الامور في فرحكم متغالوش في التفاصيل، عيشوا كل لحظة، وخليكم بسيطين والله راحة البال حلوة و التوتر مش وقته بكل.

محبتي ♥♥
سمر

طرق غسل فرش الماكياج مختلفة من شخص لشخص، بس الرابط الاساسي بينهم هو غسول لطيف، عن نفسي نغسل فيهم بنفس شامبو الشعر متعي Kerastase ، لكن فرشاة الجل لاينر أي رسمة العين مرات ننظها قبل بمزيل الماكياج بعدين نغسلها، وفيه بنات ينظفوها بزيت الزيتون قبل باعتباره مزيل ممتاز للماكياج بالأخص الروج (أحمر الشفاه).

طريقتي في غسلهم مرت بمرحلتين باش وصلت واستقريت عالطريقة اللي تعجبني، في البداية كنت نغطس الفرشاة في مية وشامبو ونقعد نفرك فيها بصوابعي أو نلف فيها على راحة إيدي في حركة دائرية، بس مع الوقت وبينما نشقلب في موقع خاص بالفرش والماكياج لماركة اسمها Sigma لقيتهم دارو فكرة عجبتني وهي جوانتي لتنظيف الفرش، الجوانتي هذا فيه هلبة نتوءات تسهل شوية عملية تنظيف الفرشاة لو قارنتيها بطريقتي أني نغسلهم براحة إيدي، بس في نفس الوقت كانت حاجة ثانوية جدا جدا جدا جاد باش الواحد يفكر أصلا أنه يشريها، بعدها طلعوا بفكرة أحسن و هي حاجة زي الفرشة من المطاط فيها نتوءات حتى هي بس هذي تحطيها على حوض المطبخ او الحمام لما تبي تغسلي الفرش.

بعدما شفت المنتجات هذي ولعت لامبة فوق راسي واستعملت حاجة بسيطة جدا موجودة في كل بيت ليبي هههههه وفيها نفس شكل النتوءات هذي، الحاجة هذي هي الصواني اللي نستعملوا فيهم في المناسبات الاجتماعية في تقديم الحلويات، مستحيل يكون فيه بيت ليبي معنداش حتى طرف واحد، وفي الحالتين مش شرط تستعمليه، دوري على أي حاجة في البيت لها نفس الشكل باش تساعدك في تنظيف فرش مكياجك أحسن من اليد بس.

أول حاجة بالنسبة لطريقتي، فرشاة رسمة العين عالأرجح أكثر واحدة حالتها صعبة، لهذا ننظف فيها بمزيل الماكياج الأول، الطريقة أنك تاخذي القطن متع إزالة الماكياج تصبي عليه قطرات من مزيل الماكياج وتخطمي بيه على الفرشاة باش تنقصي من الجل من عليها، لكن فيه بنات يستعملوا زيت الزيتون، جربوا ممكن تعجبكم أكثر.

ناخذ طاسة نحط فيها شوية مية وقطرات من الشامبو اللي نستعمل فيه، نعامل في فرشي كأنها شعري، في النهاية حتى هي عبارة عن شعر!!

نبدأ نغطس الفرشاة في المية والشامبو لكن حاولي متخليش المية توصل لطرف الحديد متع الفرشاة حديد أو مش عارفة من شني مصنوع الطرف، لكن مش هذا موضوعنا، بعدما تغطسيها أبدي حركي الفرشاة في حركات دائرية على الصحن وكل مرة عدلي وغيري من تركينة لتركينة حسب التراكين اللي تحسي أنها مدايرة مفعول أحسن.

وهذي صور توضح استغلال تراكين الصحن وكيف تحركي الفرشاة، لو الصور مش موصلة الفكرة قولولي :)

ولما تكملي من كل واحدة حطيها وهي واقفة في طاسة ثانية، أهم حاجة في العملية كلها أنك تخلي الفرشاة واقفة باش تحاول تمنعي المية تتجمع فيها لأنها هكي مع الزمن حتفسد أو ممكن اللوح متع اليد يتأثر وممكن تدير فطريات أو عفن، فالهدف تفادي هذا كله لأنه حينعكس على بشرتك لو تضررت الفرشاة.

 وتوة بعدما كملت حننتقل لمرحلة أني ننحي الصابون من عليهم، شدي كل فرشاة بنفس الطريقة اللي في الصورة بحيث أن شعرات الفرشاة يقعدوا لوطة وبصوابعك مسدي عليها لعندما تحسي أن الصابون اختفى، اعصريها بلطف بصوابعك السبابة والابهام وبعدين حطيها على فوطة بنفس الفكرة يد الفرشاة فوق وشعرات الفرشاة للأسفل، أنا لفيت الفوطة زي الاسطوانة باش نخلي الفراشي يتكوا عليها، بعدين خليتهم في مكان فيه تهوية باش يجفوا بسرعة، بس ننصحك تخليهم يجفوا براحتهم تفاديا للتراب اللي حيتجمع عليها لو خليتيهم يجفوا في الهواء الطلق.



أتمنى تكون المقالة زادتكم معلومات أكثر عن اللي تعرفوها ويكون لها فائدة، وعلى فكرة كلما كانت نوعية الفرش كويسة وحافظتي عليها كلما طولت معك، حافظي على فرشك ودلعيها زيما تدلعي في روحك :)

محبتي ،،
سمر

#Kerastase #sigma