1. لما تشري من موقع واحد تمهلي شوية، مش لازم تخشي عالموقع تختاري اللي تبيه وتشري طول، عادي تقعدي بالأيام تشقلبي في الموقع والأسعار وتعبي سلة المشتريات وتفضي فيها وهكذا لعندما تحسي روحك خلاص استقريتي عاللي تبي تشريه واشريه مع بعضه بالذات مواد التجميل، ليش؟ لان مثلا شركة ارامكس حسب أخر معلومة عندي أقل وزن عندها تدفعي عليه 28 دينار، يعني لو شريتي طرف روج بس لما تستلميه تدفعي عليه الرقم هذا، لهذا لو عارفة روحك تبي تاخذي أكثر من حاجة اصبري شوية وعبي سلة المشتريات طالما انتي شارية شارية وعارفة أنك تبي هذو كلهم، باش تنقصي على روحك مصاريف الشحن في ليبيا.
2. أحيانا للأسف حتى لو عبيتي سلة المشتريات من موقع ماركة معين مرات يبعتولك المشتريات على أكثر من شحنة، يعني مش مع بعضهم، اللقطة هذي قداش نكرهها، نذالة بامتياز، ولو بتشري من امازون ففي بيانات المنتج حتلقي مكتوب هل الحاجة هذي اللي يبيعها امازون او الموقع الأصلي، يعني لو من امازون نفسهم حتجيك الحاجات اللي بتشريها من مخزن امازون في شحنة واحدة (صندوق مع بعضهم) لكن مثلا لو درتي طلب شراء وكنت معبية سلة المشتريات بأكثر من حاجة وكل حاجة من ماركة مختلفة فكل واحدة منهم حتجيك في شحنة بروحها لأنها حتنبعث لك من مقر الشركة اللي اشبح في أي دولة، مثلا مرة شريت قفاطين من مونسون عن طريق أمازون، الشحنة طولت شهر باش وصلتني لأنه اتضح أنهم بعتوهالي من مونسون بريطانيا يعني من المحل نفسه وأنا كنت حاطة عنواني في امريكا كعنوان شحن، لهذا انتبهي للنقطة هذي.
3. الفالطة الثالثة هي ردي بالك تتسرعي ديما راجعي طلب الشراء قبلما توافقي عليه، ليش؟ مرة قعدت نشقلب في موقع مرة اثنين عشرة وكلما تعجبني حاجة نضيفها لسلة المشتريات، فمرة لقيتهم مدايرين تخفيضات فجري درت طلب الشراء من غيرما نراجع الكمية، فاكتشفت أنه فيه جاكيت درت عليها مرتين طلب شراء فوصلتني زوز جاكات والمصيبة طلعت غالطة في المقاس وكان ضخم!!الصورة هذي توضح الفكرة لو تلاحظوا الدائرة الصغيرة مكتوب فيها رقم 2 وهذا معناها الكمية يعني قطعتين، لهذا انتبهوا.
4. نقطة مهمة هلبة حتى هي في الصورة وهي عرض التخفيض، في العادة يكون فيه عروض تخفيض وباش تحصلي على التخفيض لازم تكتبي كود التخفيض في المكان فوق اللي داخل الفراغ البيضوي الأحمر، الموقع هذا درته كمثال، باش نوريكم سلة المشتريات لأحد المواقع.
   
   
5. المقاسات، وهذي هي المشكلة الأكبر، عن نفسي ننصح الكنادر متشريش الا لو فيه فرع لهم زرتيه مرة وخذيتي مقاسك وزبطتيه، و على فكرة المقاس في الكندرة بالكعب العالي يختلف عن الأرضية، لأن فكرة أنك ترجعي الحاجة يا ودي خسارتها أكثر من مردودها.
6. مونسون مقاساته ممتازة عن تجربة وأكثر من حاجة خذيتها اونلاين، امشي لمحلهم هنا وجربي الجاكات والقفاطين والجونات وازبطي مقاسك لأن تخفيضاتهم عالنت تهبل!
7. مقاسات الملابس، هذي هي الحاجة اللي مكنتش نعرفها واللي بسببها أكثر من حاجة شريتها قاعدة ننقص فيها، اكتشفت أن مقاسات الملابس نوعين Regular وهو للمقاسات الكبيرة، والمقاس Petite للمقاسات الصغيرة، ومش قصدي الصغار لا قصدي البنات الظريفونات اللي مقاساتهم 8 و 10 حسب المقاس الانجليزي، انا مكنتش متوقعة أني نصنف على أني من المقاسات الصغيرة، فأكثر من حاجة شريتها طلعت كبيرة وأختي المتزوجة حصلت من وراي أكثر من لبسة هههههههه لهذا انتبهوا للنقطة هذي هلبة.
8. فيه خدمة مهمة وننصح بيها الجميع اللي يشروا اونلاين أنكم تعطوها أهمية وهي خدمة الرسائل الالكترونية News letter  شبه في كل موقع حتلقوها الميزة هذي وهي عبارة عن فراغ تكتبي فيه ايميلك باش توصلك اخر عروض الماركة هذي وتخفيضاتها أول بأول، ميزة مهمة جدا على فكرة للي متعود يشري أونلاين.
9. نقطة ثانية مهمة جدا جدا جدا، وهي أنك تقري آراء الناس اللي شروا الحاجة هذي قبلك Reviews، الميزة هذي في أغلب المواقع موجودة بما فيهم أمازون، لما تلقى خمس نجوم جنب الحاجة اللي تبيها وتلقي هلبة آراء أقريهم، لأن هذي آراء الناس اللي شرت قبلك، تقييمها للحاجة وكيف وصلتهم وخامتها وبعدما غسلوها كيف ولّت وهكذا.
10. لما تشري حاجة من أمريكا مرات تعطل عشرة أيام لأسبوعين ومرات أكثر لهذا وسعي بالك، علما بأنه فيه حاجات ممنوع تشريها أونلاين زي العطور، لأنها مواد قابلة للاشتعال، الحاجات السائلة، المجوهرات زي الذهب والأحجار الكريمة، لكن الفالصو العادي مفيش مشكلة شريت اكسسوارات ووصلتني سليمة.
11. مواد التجميل، ننصحك متشريش أرواج أونلاين أو كريمات الأساس إلا لو جربتيها وعرفتي درجة لونك شن هو، لأن اللون صعب تزبطي شكله عالنت، الإضاءة تفرق، لون البشرة متع الشخص اللي حاط الروج او كريم الاساس مختلف وهكذا، فيه كريم أساس نبي نشريه معاش عرفت درجتي شني، شفت عرررم فيديوات لبنات استعملوه وكل بنت قالت درجتها لكن البنات هذوا حاطين إضاءة قدامهم وهذا خلا الموضوع صعب، لأنه الاضاءة متعطيكش اللون مزبوط، لهذا انتبهوا.
12. لو تبي تشري أونلاين لازم يكون عندك حاجتين، فيزا أو بطاقة شراء من الانترنت وحساب أو عنوان شحن باش تحطيه في بيانات الشحن، وهو العنوان اللي حتوصلك عليه الحاجات اللي تشريها، أرامكس يقدموا الخدمة هذي أنك تشري عنوان عندهم تقريبا القيمة حاجة وسبعين دينار، الحساب هذا يعطوك عليه 14 عنوان حول العالم موزع حسب الدول الأكثر متوقع معدل الشراء منها، و القيمة هذي تدفعيها مرة واحدة لفتح الحساب، لكن الدفع على الشحنات مع كل شحنة توصلك وحسب الوزن تكون القيمة.

امزجي الألوان جيدا جدا جدا جدا

لما تحطي الماكياج سواء أكان البودرة أو ظل العين أو أحمر الخدود وحتى الكونتور وسعي بالك هلـــــــــــــــبة في مزج الألوان بالفرشاة لأنه بالطريقة هذي الماكياج مش حيبان في خطوط واضحة وبالمزج حيبان المظهر أحلى بالذات لأحمر الخدود لأني شفت عروس جديدة كان أحمر خدودها زي ماروكو بالضبط، دائرتين في وسط الخد!!

في ذات الوقت متنسجميش هلبة في ظل العين باش ميوصلش للحواجب ويا خوفي يفوتهم :P

فرش الماكياج مهمة جدا 

الماكياج الهدف منه التجميل وليس التبشيع 

كثيرات يتمادين في وضع المساحيق لدرجة تجعلهن خرجن عن المنطق، فالماكياج الهدف منه أن يقوم بتعديل بعض العيوب أو بهتان البشرة أو البثور، فلا يوجد انسان ببشرة متجانسة اللون، زد على هذا فهو يبرز الجمال وهذا يعني الحفاظ على الشكل الطبيعي الذي خلقنا الله به مع بعض اللمسات التي تزيدنا جمالا.

الكونتور (نحت الوجه) والهايلايت (بودرة زوايا الإضاءة في الوجه)

الكونتور مش قانون سماوي فرض تنفيذه!!

تقدري تقولي أنه إضافة جميلة في السهرات والطلعات المميزة، لكن أنك تفكري فيه كل يوم فالموضوع لا يستحق أبدا، زد على هذا فيه اللي يتمادوا فيه جدا لدرجة أن معالم وجههم تولي غير منطقية، ايه صح الماكياج يخليك جميلة لكن في ذات الوقت لما يزيد عن الحد المنطقي يمكن يخليك مش حلوة أبدا!!

الكونتور ميزته أنه يحدد معالم الوجه بطريقة جميلة كإبراز الوجنتين لكن لما يولي رسم للتفاصيل حيكولي شكلك مش حلو ومش واقعي وفوقها مش منطقي!! وبالنسبة للهايلايت فالفكرة منه أن يكون في الأماكن اللي ينعكس عليها الضوء، و باش تعرفي الاماكن هذي في وجهك اوقفي قدام المراية بحيث يكون فيه مصدر ضوء ويفضل طبيعي وحركي وجهك في عدة اتجاهات ولاحظي وين الجهات اللي ينعكس عليها الضوء، غادي ينحط الهايلايت.

رسم الحاجب

كريم الأساس