مرحبا بكم في مدونتي ،،

اسمي سمَر، عمري ثلاثين سنة وعلى وش جواز، بعد الفضانية من شهور ما بينما كنت نستعد لعرسي اكتشفت أن هلبة حاجات غايبة عني وأن عالم المرأة والاهتمام طلع علم تبيله قراية، شقلبت هلبة النت وقريت هلبة آراء واقتراحات ونصائح من مجموعات الفيس للمواقع والمنتدريات والفيديوات عاليوتيوب، يعني من الأخير درت دراسة عميقة :D

أخذ مني الموضوع فترة طويلة باش وصلت لعدة قناعات، منها واللي كانت بعد عدة تجارب تعيسة في المزينات، أن المزينات مش أفلح مني ومش من المنطقي أني منقدرش نهتم بروحي وكل شئ هما يديروه ويا ريت عالحاجة المبهرة، والمصيبة ندفع وبعد ساعتين نغسله!!هذا مش منطقي، زيدي على هذا عدم ثقتي في نظافة خدماتهم من ناحية الفرش مثلا، فرش الماكياج زعما فكرتوا على كم واحدة استعملوهم قبلما يستعملوهم عليك؟ كم مرة يغسلوا فيهم في حال كانو يغسلوا فيهم أصلا؟؟ هل يعقموا فيهم؟ تعرفوا الأمراض الجلدية والبلاوي الزرقاء اللي ممكن تنتقل بهذه الطرق، القشرة من خلال فرشاة السشوار وهكذا. بعد تجارب تعيسة جدا معهم وكذب البعض وسرقتهم لعربون دفعته ومصارش من المناسبة فتهربوا من إرجاعه قررت أني منعتبش أي مزين إلا لما نقص شعري لأن هذي الحاجة الوحيدة اللي منقدرش نديرها بروحي بإتقان، لكن الباقي حنتدرب عليه ومش حنحتاج لواحدة تتجمل عليا والمصيبة بفلوسي (قلبي معبي منهم فاعذروني)!!

تعلمت هلبة حاجات خذت مني وقت باش نفهمها ونختار الأحسن منها واللي يناسبني أكثر، ولقيت أن هلبة بنات غايبة عليها الأمور اللي تعلمتها فقررت ندير المدونة هذي باش نسهل عليكم الموضوع وتكون مرجع للجميع، في أكثر من حاجة تخص كل بنت وسيدة، وإن شاء الله تستفيدوا منها.

محبّتي ،،