مرحبا :)
كان في بالي من فترة ندير هدية مقدمة من مدونة سمَر ويبدولي أن مناسبة بداية عام جديد مناسبة جدا، أكيد كل واحدة منا دارت مراجعة لنفسها وللسنة الماضية وسواء أكانت راضية أو غير راضية عن اللي فات فالأكيد أننا كلنا في قرارة أنفسنا مقررات أن العام الجديد بإذن الله حيكون أفضل سواء أكان هذا على الصعيد الشخصي، الديني العاطفي أو العلمي، او الصحية أو غيره.
عن نفسي قرارات هلبة قررت نبدأ جديا في تنفيذها، 2015 مش راضية عنها أبدا ومشكلة كبيرة لو حتى 2016 تكون بنفس المنوال، علما بأننا داخلين على سنة يعلم بيها ربي ووضعها متوقف على وضع البلاد الاقتصادي، لهذا لازم يكون فيه بدائل لرفع المعنويات والتغيير للأفضل، أنصحكم تحطوا أهداف للسنة هذي وتديروا جهدكم باش تنفذوها خلال الـ 365 يوم.
حبيت بداية العام هذا تكون مختلفة بأنها تكون بداية وقرار استمرارية لمدونة قهوة سمَر، تقدروا تقولوا أنها مشروع حياتي الجديد، لهذا يهمني هلبة أني نفيد الجميع من خلالها ونحكيلكم كل اللي نتعلمه من خلال تجاربي وفلايطي، ونعطيكم العبرة لعلّ وعسى نفيد حد بيها.
توة نحكيلكم على الهدية ♥♥
أول شئ وهو حاجة نشوف فيها مهمة جدا جدا لأي فتاة أو سيدة ونعتبر فيها من الأساسيات لأنها تقدروا تقولوا خمسة في واحد، تستفيدي منها في خمس حاجات.
هديتي الأولى وهي اسفنجة الماكياج Blender اسفنجة الدمج، استعمالاتها في وضع كريم الأساس والكونسيلر والكونتور لو تستعملي في الكونتور الكريمي مش البودرة وتقدري تستعمليها باش تحطي بودرة الوجه ولو أحمر الخدود متعك كريمي، اخترت اللون الوردي لأنه زي شعار المدونة ♥
الهدية الثانية روج (أحمر شفاه) احترت أي لون ناخذ لكن لقيت أن أحسن لون هو اللون اللي تستعمليه يوميا وعن نفسي اللون اليومي لما نطلع ناخذ فيه لون قريب من لون الشفاه الطبيعي، فخذيت لون من انجلوت قريب من اللي عندي، على اليمين الروج اللي نستعمل فيه لما نطلع طلعة عادية يومية وعاليسار الروج اللي اخترته للفائزة :)
الهدية الثالثة هي ألوان الظلال اللي حسب رأيي نشوف فيها أساسية جدا أنهم يكونوا في مجموعتك، وهي تدرجات لون البشرة من البني الفاتح للغامق، وعجبني أني لقيتهم مع بعض عند انجلوت، حرت أي درجة ناخذ لأنهم ثلاث درجات، وعجبتني الدرجة الفاتحة فخذيتها، فيه زيه أغمق بدرجتين لو حابات تجربوه في المحل.
الهدية الرابعة وهي أربع CDs اثنين منهم CD واحد خزنت عليهم كل الفيديوات المهم اللي نزلتهم لكلوِي مورولّو والثاني لخبيرة التجميل ليزا الدريدج.
الزوز الثانيين DVD الأول لجاكلين هيل وحجمه 2 جيجا :D قنبلة هههههه جمعت كل فيديواتها المهمة اللي عندي واللي تعلمت منهم هلبة تقنيات و طرق للماكياج.
هذو أكثر خبيرات تجميل نتابع في فيديواتهم أول بأول وهما اللي تعلمت منهم هلللللللبة حاجات لهذا فضلتهم على البقية كهدية :)
الرابع والأخير حجمه 1 جيجا وفيه دروس للكروشيه، عن نفسي 2015 كانت سنة ضغوطات وتوتر في بعض الفترات فكان تعلّم الكروشيه أحسن علاج نفسي وابتعاد عن التوتر والحصول على جلسة استرخاء مميزة، و على فكرة هذا رأي الكثيرات من اللي يديروا في الكروشيه.
هديتي الخامسة هي مق له غلاف خدمته بنفسي بالكروشيه، ودرت عليه قلب لأن الهدية اخترتها وخدمت عليها من قلبي، باش تستمتعوا بشرب القهوة في الشتوية وانتو تقروا في مقالات المدونة ♥ ولأن مدونة سمَر الهدف منها المشاركة في كل ما تعلمته لهذا حبيت ننقل متعة المشاركة لكم، الهدية عبارة عن زوز مق، لكِ ولصديقتك أو أختك أو أي حد يعز على قلبك حابة أنه يشاركك التجربة هذي، هدية من قهوة سمَر ومنك ♥♥
هديتي السادسة والأخيرة هي لانة لونها أبيض، مقاسها مناسب للي يبي يتعلم الكروشيه، مع الفيديوات اللي في الـ DVD حيكون عندك فرصة مليحة للتدرب شوية عالموضوع، ومعه إبرة الكروشيه أو الطيّ مقاس 4.5 وهو مقاس مناسب جدا لتعلم الكروشيه زيما هدرزتلكم مرة عالموضوع.
مسابقة لها شروط محددة باش تدخلي في السحب، وهي:
1- حطي الصورة هذي على حسابك الفيس أو انستاجرام أو تويتر ومنشن لخمسة من صاحباتك، قوليلهم شن رأيك في المدونة وهل
استفدتي منها وشن أكثر المواضيع اللي شدت انتباهك (النقطة هذي تساعدني في
تطوير المدونة ونعرف بها أنك متابعة جيدة مش خاشة للمسابقة وخلاص) ،
والبوست لازم يكون ببلك Public عالعام باش نقدر نشوفه سواء عالفيس، تويتر
أو انستاجرام.
2- حطي الهاشتاق #قهوة_سمر #هدية_سمر باش نقدر نلقاك عالنت وتدخلي في السحب (لأنه من غيره صعب نلقى المشاركات).
3- ديري منشن @قهوة سمَر عالفيس أو @samarscoffee على انستاجرام أو تويتر.
4- ديري منشن لصاحبتك اللي تبي تهديلها المق في تعليق على الصورة على صفحة قهوة سمر عالفيس.
5- ديري طلب إضافة للجروب هذا Tripoli Girls - Where Can I Find لأنه من خلاله نقدر نعرف حساب الفيس أصلي أو مؤقت، تقدروا تطلعوا من الجروب بعدين هذي حرية شخصية لكن لوازم المسابقة فقط :)
المسابقة حتبدأ يوم 15 ديسمبر وتنتهي يوم 31 ديسمبر إن شاء الله، يعني أسبوعين، واختيار الفائزة حيكون بالقرعة والاختيار حيكون على ابن أختي الصغيرون، الاسماء كلها حتكون في ورق، وهو يختار :P
المسابقة حتكون في ليبيا كلها، ولو أنك من خارج طرابلس يفضل تكوني ضامنة طريقة نبعتلك بيها الهدية، لو عندك حد هنا أو بالبريد.
المسابقة حتكون في ليبيا كلها، ولو أنك من خارج طرابلس يفضل تكوني ضامنة طريقة نبعتلك بيها الهدية، لو عندك حد هنا أو بالبريد.
تقدروا تشاركوا على جميع حساباتكم الاجتماعية سواء على الفيس بوك، تويتر أو انستاجرام، لكم حرية الاختيار، لكن الحسابات المزيفة أو الخاصة بالمسابقات مش حتكون محسوبة.
الهدية هذي كانت بسيطة وكان خاطري تكون فيها هلبة حاجات من أساسيات الماكياج، لكن إن شاء الله المتابعات الحقيقيات للمدونة لكم هدية على مستوى أقوى المرة الجاية إن شاء الله لما تكبر المدونة، وشكرا لكم على دعمكم وتشجيعكم الدائم في تعليقاتكم، انتو مميزات والدافع لي باش نستمر في الكتابة ♥♥♥♥
ملاحظة: الهدية مقدمة من مدونة سمَر، كَون أن أغلبها من انجلوت لا يعني أنها برعاية انجلوت (للعلم فقط).
لنا لقاء قريب بإذن الله تعالى :)
محبتي ،،
سمّر
#قهوة_سمر #هدية_سمر #giveaway
5 تعليقات
Black Lily
ردحذفالسلام عليكم ...
حبيت نشكرك ع البادره الطيبه .. بصراحه شئ حلو وماشاء الله عليك قايمتيها بمتابعاتك .. نتمنالك التوفيق والاستمرار لان مدونتك بصراحه فيها هلبا معلومات مفيده واني شخصيا استفدت منك بشكل كبير .. ومتابعاتك حتى لو ماعلقتش ديما .. المهم نتمنى التوفيق لجميع اللي بيشاركوا ف هالمسابقه وبصراحه يا حظها اللي بتربح وخاصة السي دي متع المكياج عجبتني الفكره.. وكمان اسفنجت المكياج وشغلك متع الكروشيه اللي ع المق ..
شكرا ليك وبالتوفيق ..
Black Lily
وعليكم السلام ،،
حذفهلا عزيزتي، شكرا كثيرا على كلامك الطيب وسعيدة جدا أن الهدف من المدونة تحقق معك، لو حابة شاركي ممكن تكون من نصيبك :* :* ممكن تكون من نصيبك :)
شكرا هلبة على تشجيعك ونقاء كلامك :* :*
مرحبا بيك :)
ردحذفنحييك هلبا ع معاملتك الحلوه وروحك الطيبة واخلافك العالية ♡ الشي هدا يوضح قداش انتي انسانه راقية وطيوبه
كل مواضيعك استفدت منها هلبا رغم اني ما نعلقش بس مافيش موضوع فاتني :)
جعله الله في ميزان حسناتك
كان ب ودي نشارك في المسابقة ونفوز رغم انشغالي و وقتي الضيق .. وتمنيت الفوز مش طمعا في الهدايا الراقية ﻻنه ابسسسسسط هديه منك لها معنى كبير بس فكرت لو انتي اللي بتسلمي الهديه ف لقاءك وشوفتك احلى هديه بالنسبة ليا :) بجد والله مش مجامله حبيت روحك هلبا ونتمنى لو تجمعنا صدفة في يوم ما
بس للاسف ما نقدرش نشارك ﻻن من شروط المسابقة منشن لصحباتك وانا ما نقدرش ندير منشن ع الفيس مش عارفة اعلاش وتاني شي متابعة حساب المدونة ع التويتر وما عنديش تويتر :)
يا حظها اللي بتفوز وخصوصا بالمق وغلاف الكروشيه اللي من شغلك ﻻنها بجد شي حلوووووووو هلبا منك
ربي يوفقك عزيزتي ويكتبلك الخير وين ما كنتي
سلام .
كلامك حلو جدا جدا جدا وبجد فرحني هلبة ♥♥ وهذا أغلى مكسب ليا من المدونة هذي :*:* بس طالما معندكش حساب في تويتر انتي مش مضطرة تفتحي حساب على خاطر المسابقة لنها أصلا حيعتبر حساب مؤقت وقتها ..
حذفمنشن الفيس المفروض قبله تكتبي علامة @ وبعدها على طول من غير فاصل تكتبي اسم الشخص، ولو الحرف الاول من اسمه حروف انجليزية كبيرة انتبهي ليه وحيطلع الاسم توموتيكي المفروض :) والهدية بإذن الله حنقدمها بنفسي مع هدرزة مع الرابحة ،، وليش لا ممكن تكوني أنت :)
وشكرا هللللللبة على كلامك الأكثر من رائع ،، فرحتيني هلبة ♥♥♥
تسلمي حبوبة ودوم الفرح يارب :)
ردحذفاي عارفة المنشن كيف وكنت ندير فيه بس فجأة بين يوم وليلة ندير نفس الطريقة وما يطلعش الاسم :(
عموما طالما الحكاية فيها لقاءك وهدرزة زياادة ف حنحاول اعلاش ﻻ هههههه
مشكورة ♡