الكونتور أو نحت الوجه، الفكرة فيه هي اللعب بالظل والإضاءة بعدة أدوات ولكل طريقته وكل طريقة تتناسب مع نوع وحالة بشرة عن الأخرى، حنكتبلكم  الطرق بالتسلسل وكل نوع ومراحله.

بداية هذي هي الحاجات اللي نستعمل فيها لما ندير كونتور، حنسميها ونوضح استخدام كل واحدة ونوعها، وهذوا هما الحاجات اللي وصلتلهم واقتنعت بيهم بعدما حضرت كمشة فيديوات واخترت الطريقة اللي تناسبني وتريحني، والحق مازال مجربتش الكونتور بالمستحضرات الكريمية لأنه مش مستعدة ندفع حقهم باش نجرب، أنا مش فاتحة مركز تجميل ههههه لكن مستقبلا ممكن نجرب.

المستحضرات حسب الترتيب في مراحل الاستخدام (متنخلعوش من كثرتهم لأن هذا مش معناها ان كل واحد منهم نستعمل فيه على الوجه كله، البعض منهم يا دوب بخفة وخلاص)..

1- كريم الاساس حاليا نستعمل اللي موجود وخلاص مش مهم.
2- كونسيلر، حاليا نستعمل M·A·C Pro Longwear Concealer ونمزج في درجتين باش نحصل اللون الأنسب لي، لكن يوما ما حنشري واحد أخف لأن هذا ثقيل والحق شريته على خاطر مكياج حفلة العرس لأنه حيتحمل ويطول أكثر وممتاز كبرايمر للعين.
3- بودرة فاتحة اللون باش نثبت الكونسيلر وميبانش منظره مش حلو لأنه حشيشتي السهر فللأسف فيه علامات تعيسة تحت العين وإن شاء الله يهديني ربي ونرقد بكري باش يتعدل وجهي،  نستعمل في Soft Focus + Emphasize هذو درجتين واحدة لونها أصفر داكن مائل للبرتقالي وواحدة بيضاء، نثبت بيها الكونسيلر في أماكن الهايلايت (الإضاءة) وتقدري تستعملي بودرة فاتحة خفيفة حطيت خيارين في الصورة.
4- نثبت كريم الأساس ببودرة يومية عادية أو Transparent Finishing Powder / Pressed فيه منها البودرة أنا خذيت المضغوطة، أسهل في تفادي فلايطها ومتاخذش مساحة في الشنطة.
5- الباودر اللي ندير بيه الكونتور اسمه HOOLA اخترته لأنه حسب اللي قريت وعرفت عنه أن درجة لونه مناسبة لهلبة درجات للبشرة، فبدلما نحير في الشراء اونلاين وبعدما ندفع نطلع شريت لون مش مناسب هذي أضمنلي (درت فلايط في الشراء من النت حنحكيلكم عنها في بوست منفصل).
6- بعدما نكمل منها ننتقل لأحمر الخدود ويادوب نحط طشة وخذيت لونين واحدة وردي خفيف جدا وجميل والثاني عادي وفي الغالب نخلط فيهم مع بعض (مش عارفة شن قصتي مع الدمج؟!؟!) نستعمل في Melba + Rosy Outlook
7-شوية هايلات عالخفيف وبعدها نمسح عليه بصبعي باش نخفف من حدته ويكون أقرب للواقع، للهايلات نستعمل في أكثر من حاجة وأغلبها ظلال وألوانها كالتالي:

يناسب أصحاب البشرة الجافة أكثر وذلك لأن المنتجات الكريمية حتنقص من ظهور الجفاف على البشرة نتيجة لقوامها الكريمي.

الفيديو الأول لجاكلين هيل ومراحل الكونتور كالتالي:

1- أول شئ بعدما غسلت وجهها طبعا حطت كريم مرطب باش تهيئ الوجه للكوارث اللي بتحطها عليه :D
ثاني مرحلة البرايمير ومتفكروش أنه هلبة طبقات، البرايمر وكريم الترطيب حاجة خفيفة للحماية وميبانش وجودها أصلا على الوجه وهذي المرحلتين أساسيات في أي ماكياج لهذا مش حنعاود كتابتها على كل فيديو
2- بعدها حطت كريم الأساس لكن مكثرتش لأنها مازال حتحط مستحضرات ثانية باش تنقص من كثرة الطبقات، لهذا انتبهوا للنقطة هذي لأني نشوف في بنات في محلات مواد التجميل للأسف منظرهم يبان تقول حاطة زواق وستوك على وجهها وبصراحة المنظر مش حلو أبدا!!
3- الكونسيلر، تحط فيه على شكل مثلث أسفل العين لأن الشئ هذا يأثر في اللعب على الإضاءة في الوجه، في الفيديو متع جاكلين حول الكونتور بالبودرة حتفهموا الفكرة علاش داراته زي المثلث.
4- بعدها مستعملتش كريم بل استعملت قلم الكونتور، قلم كريمي الملمس رسمت بيه جهة أسفل الخد اللي تبي تبين معالمها ومن خلالها حتدير نحت للوجه.
5- بعدين مشت عليه بالفرشاة وأهم قاعدة هنا هي أنك توسعي بالك هلبة لما تحاولي تخفي الخطوط اللي رسمتيها باش يبان المشهد ناعم ومفيش حواشي واضحة، يعني كأنه فعلا ظلال الوجه اللي تبان مع الإضاءة.
6- جاكلين زمان لما كان عمرها 13 حصلت طريحة على خشمها ففيه كسر خلاه مش مستقيم، لهذا تتفادى اللعب بالكونتور على خشمها باش متبانش عيوبه أكثر ولو دارت الكونتور فتعطيه وقت باش يطلع مزبوط، وبنفس الفكرة رسمه وبعدها خطمت عليه بالفرشاة لكن فرشاة أصغر لأن المساحة صغيرة للأنف ولو خذت فرشاة أكبر فمع التحريك حينتشر اللون أكثر من الحدود المطلوبة للخشم.
7- رسمت على الجبهة من جوانبها باش تحدد الاضاءة وين تجي، لو جبهتك مش عريضة يا دوب ديري خط صغير من فوق ولو صغيرة هلبة تقدري تفوتي الموضوع بس لو عريضة فيها مساحة تقدري تزيدي تنزلي لكن لما تمزجيه بالفرشاة حاولي تخفي حدود الكونتور.
8- بعدها انتقلت للون أفتح للهايلات (الإضاءة) لأنه منطقيا طالما فيه مناطق مظللة في الوجه يعني فيه منطق مضاءة، انتي تخيلي روحك واقفة قدام المراية وشدي شمعة حطيها جهة اليمين، حيكون فيه جهات مضاءة وجهات مظللة، وهذي هي فكرة الكونتور، اللعب بالإضاءة.
9- حطت جاكلين اللون الفاتح وين ما تبي وبعدا الفرشاة بنفس الفكرة.
10- بعدما كملت خطمت على كل الكريمات هذي بالبودرة باش كل شئ يشد مكانه،  خلي ايدك خفيفة ومتكثريش، لكن انتبهي مكان الكونتور حطي بودرة داكنة ولأماكن الهايلات (الإضاءة) حطي بودرة فاتحة وهذي قاعدة في الكونتور.
11- بعدما كملت حطت هايلات بودرة وهي اللي تلمع وتعكس في انعكاس إضاءة الوجه لما تحركه (شرحت عن النقطة هذي في المقالة الاولى) وحطت أحمر الخدود وانتهت القصة :)


1- الكونتور حسب طريقة كلُوِي موروللّو وهنا استخدمت كريم اساس ثقيل في أربع درجات، الأولى درجة الكونتور اللي حتلعب بالظل، ودرجة أفتح منه شوية لكن أدكن من الدرجة الثالثة وهي زي لون بشرتها واللون الرابع اللي استعملاته في أماكن الاضاءة.
2- بعدما كملت استعملت ثلاث فرش وكل فرشة خلطت بيها درجة لانها لو استعمت نفس الفرشاة لكل الدرجات حتولي الحكاية طبيخة وشبه الألوان بتخش بعضها.
3- بعدما كملت وأصبح المشهد متناسق صار لازم تثبت الكريمات هذي بالبودرة وزيما قلت بودرة داكن للجهة الداكنة وبدورة فاتحة لأماكن الاضاءة وحطيها بخفة متكثريش.
4- بعدها الهايلات و أحمر الخدود، وكلما حطيتي بخفة كلما طلعت شكل وجهك أجمل، الاكثار من أحمر الخدود مش حلو.

هذا يناسب أكثر البشرة الدهنية لانك حتحددي معالم وجهك عن طريق البودرة، ولأن بشرتك دهنية بعد وقت من حطانك للماكياج حتبدا بشرتك تطلع افرازات الدهون شوية شوية و هذا حيخلي المظهر يولي طبيعي بسرعة وميبانس أن وجهك معبي بودرة!!

في نفس الوقت فيه منتجات كريمية للكونتور جافة شوية يعني نسبة السيولة متعها ناقصة و مايلة لأنها تكون جافة فالدهون اللي في بشرتك حتتحمل الكريم اللي حتحطيه لما تديري الكونتور.

طريقة جاكلين في الكونتور بالبودرة هي أنها حطت كريم الاساس والكونسيلر (المكونات السائلة) بعدين حطت بودرة فاتحة على جهة الاضاءة باش تثبت اللون وميصيرش جو الكريم يحصل في ثنايا وتجاعيد الوجه لأن المشهد حيطون مش حلو+ هي تبي تخدم بالبودرة فلازم الوجه يكون ناعم لأنه لو بتحط بودة الكوتنور الداكنة على وجه كريمي حتلصق البودرة الداكنة طول وشن يمزجها بعدين!! لهذا تحط بودرة خفيفة باش يادوب الكريم يمتص ويولي الكونتور بالبودرة أسهل.

نِيكي وجهها معبي ووزنها زايد لهذا الكونتور ممتاز معها لأنها تلعب بيه لعب في جهة الاضاءة والظل فتخلي ملامحها تبين أنها أضعف وأنحف، استعملت الكونتور بالبودرة، وعلى فكرة نيكي دارت كونتور بظل عين لونه داكن لأن درجته عجبتها وكانت الأنسب لها ولون بشرتها، لهذا مش قاعدة أنك تشري بودرة خاصة بالكونتور.


الطريقة اللي عجبتني ونستعمل فيها هي لخبيرة التجميل ليزا إلدريدج، يعجبني فيها أنها متكثرش وطريقتها ناعمة جدا ومنطقية، تستعمل في أقل قدر ممكن من المنتجات وطبعا هذا يبي بشرة صافية باش الواحد ميضطرش يحط عليها هلبة حاجات لتغطية الحبّ (البثور) أو أي حاجات ثانية تبان في الوجه.

أتمنى نكون وضحت و شرحت الفكرة قدر الإمكان، هذي الطرق هي أكثر الطرق المنطقية اللي عجبتني، البقية يحطوا في كميات رهيبة جدا ويرسموا في وجههم وأنفهم زيادة عن اللزوم والمنطق، ممكن الأذواق مختلفة بس مازال نظريتي تقول الماكياج وجد للتجميل وليس للتبشيع، طبقي النظريات ولكن بما يتناسب معك بحيث متبعديش عن شكلك الطبيعي اللي خلقت ربي بيه.

أكثر كونتور تقدري تستعمليه يوميا هو الأخير لأنه خفيف، البقية تفاصيلهم هلبة ومش منطقي البشرة تختنق هكي يوميا، أصلا مفيش وقت ههههههههه ،، خليه للمناسبات والسهرات حيكون أجمل، و أهم نقطة وسعي بالك هلبة في المزج.

لو عجبتكم المقالة يا ريت تشاركوها مع صديقاتكم وأخواتكم باش الكل يستفيد من خلال أزرار التواصل الاجتماعي أسفل المقالة.

محبتي ،،