تعرفت على الماركة هذي من خلال متابعتي لفيديوات جاكلين هيل على اليوتيوب وكانت تستعمل فيهم هلبة وتمدح وتشكر في جودتهم مقارنة بالماركة العالمية المشهورة جدا MAC ، وطبعا بما أني نشوف فيها تستعمل فيهم باستمرار فهذا دليل على أنهم فعلا ممتازين، زدت شقلبت النت على آراء ناس ثانيين وفعلا كان نفس المديح، ومع الوقت وبينما نشقلب في الفيديوات ندور على فيديو تعليم ماكياج عروس وشفت هلبة منهم وعجبوني، لكن اللي استقريت عليه حفظته صممممممم :D من كثرما نتفرج عليه، وبالتأكيد شريت شبه كل الحاجات اللي استعملتها في الفيديو، حتقولوا شن هالهبال اللي تشوفيه تشريه يعني؟!؟! حنقوللكم لا، وقتها أنا أصلا مشريتش حاجة وقررت أن الحكاية حتكون اثنين في واحد، منها حنكون شريت الماكياج اللي يلزمني للحفلة + شريت عدة الماكياج الشخصية لي!

هذا اللون يميل للدرجات الباردة وهو رمادي فيه لمسة بني، جميل جدا اللون هذا، ينفع يكون اللون الأساسي لو ماكياج ألوانه باردة، زي الاسود والرمادي والأزرق والجو هذا..

ميزة ألوان الماركة هذي أنها ناعمة جدا وسهل التعامل معها، متحسيش أنها خشنة، إيه في ألوان خشنة في الماكياج لأنك أصلا تتعاملي مع بودرة تحطيها على عينك لهذا فيه أنواع مش ناعمة هلبة وفيه أنواع من نعومتها تقدري تتحكمي فيها أكثر لما تتعاملي معها بالفرشاة أو حتى أصابعك لأنه مرات تحطي ماكياج بصوابعك :) 

خلاصة المقالة أني إيه ننصحكم لو تبوا تشروا من النوعية هذي لأنها جميلة جدا، ولو متبوش تشروا منها وهذا منطقي ومن حقكم أنصح جدا أنك لما تبي تشري ألوان ظلال ماكياج بصفة عامة ومن أي نوع أنك تاخذي ألوان قريبة من الألوان الثلاثة الأولى اللي ذكرتهم، لأنها تعتبر درجات أساسية لأي ماكياج عيون، وننصحك أنهم يكونوا ضمن مجموعتك.

والروابط هذي خاصة بمارلينا وكل حساباتها على الانترنت. 

حسابها على اليوتيوب

صفحتها على الفيسبوك

صفحة ماركتها على الفيسبوك

حساب مارلينا على انستاجرام

حساب الماركة على انستاجرام

حساب مارلينا على تويتر

موقع مارلينا الخاص

موقع ماركة Makeup Geek

وتوة قوليلي، هل جربتي النوعية هذي من قبل؟ لو جربتيها شن هي الألوان اللي تستعملي فيها وشن رايك فيها؟ وهل تنصحي باستخدامها أو لا؟

محبتي ،، 

سمّر 

#makeup_geek #marlena #crème_brulee #beach_smoothie #frappe #barcelona_beach #أنا_أدون

يستعمل كغسول يومي للمناطق الحساسة، يطهر بلطف وفعلا ضد التهيجات التي تحدث كالحكة مثلا، كما أنه يحافظ على توازن المنطقة الحساسة أي أنه لا يسبب الجفاف لها، لأنها عندها إفرازاتها وفي العادة مينصحوش باستعمال الصابون العادي لها لأنه يسبب لها الجفاف وهذا يعني نقص المواد اللي تحميها واللي ربي خلقها  لحمايتنا.

الغسول هذا تستعمليه يوميا مرة أو مرتين والأفضل لما تديري دوش، رغوته لطيفة و ريحته حلوة وناعمة، تديري منه رغوة و نقطة واحدة منه تكفي وبعدها تشفطي بالمية لعندما تتأكدي أنه كله تنحى.

URIAGE GYN-8

الغسول هذا له نفس الوظيفة كغسول للمناطق الحساسة، لكن للاستعمال كغسول لو عندك حكة أو تهيج، تستعمليه بروحه أو مع العلاج لو الدكتور أعطاك علاج، الرغوة متعه مهدئة ومطهرة وشوية شوية تمشي إن شاء الله، الحق هذا مستعملتاش لأنه يبدو أن الأول مداير مفعول ممتاز للحماية.

ملاحظة: 

1- هذا الغسول مدة صلاحيته 9 شهور لهذا انتبهي، من لحظة ما تفتحيه تبدأ الصلاحية تحسب، عن تجربة ردي بالك تستعملي غسول أو أي حاجة صلاحيتها منتهية، ممكن تديرلك مشكلة في بشرتك.

2- الغسول للاستعمال الخارجي فقط وليس الداخلي. 

3- زيادة على الغسول المنطقة الحساسة أصلا لازم تهتمي بيها ومتكونش رطبة، لأنك في الحالة هذي وفرتي بيئة ممتازة للبكتيريا والفطريات، لهذا حتى الاهتمام من هذي الناحية مهم جدا.

4- الغسول هذا بعد الاستعمال لفترة حتلاحظي أن بشرة المنطقة الحساسة أصبحت أفتح في اللون مما كانت عليه.
5- ريحته الحلوة مع الاستعمال اليومي حتغنيك عن التفكير هلبة في موضوع الريحة اللي تشكي منها بعض النساء، صدقيني حيريح بالك هلبة :).

6- السعر للأسف منعرفش لأن الصيدلية ميعطوش في وصل ومن الزحمة يومها محاولتش نسأل عن سعره وخذيته من صيدلية ذات الصواري وشفته في صيدلية الشريف في السايحية.

تجربتكم للغسول تأكد من تجربتي معه، وتأكيدكم لذلك سيطمئن الكثيرات للجوء إليه، لة حابة تخبري صاحباتك عنه ديري مشاركة أو خبريهم عن المدونة :) 

أتمنى نكون فدتكم من تجربتي الشخصية لهذا الغسول.

محبتي ،،