خلال تشقليبي لهلبة صفحات ليبية ملاحظتش ولا مرة حد تكلم عن الماركة هذي بالرغم من أن أسعارها ممتازة مقارنة بأنواع ثانية هلبة يشروا فيهم وفي ذات الوقت جودتها تنافس ماركات عالمية زي MAC ، خذيت منهم أربع ألوان لأنهم من ضمن الألوان اللي نبي نستعملها في ماكياج عرسي إن شاء الله بحكم أني من زمان مقررة ندير ماكياجي بروحي.
تعرفت على الماركة هذي من خلال متابعتي لفيديوات جاكلين هيل على اليوتيوب وكانت تستعمل فيهم هلبة وتمدح وتشكر في جودتهم مقارنة بالماركة العالمية المشهورة جدا MAC ، وطبعا بما أني نشوف فيها تستعمل فيهم باستمرار فهذا دليل على أنهم فعلا ممتازين، زدت شقلبت النت على آراء ناس ثانيين وفعلا كان نفس المديح، ومع الوقت وبينما نشقلب في الفيديوات ندور على فيديو تعليم ماكياج عروس وشفت هلبة منهم وعجبوني، لكن اللي استقريت عليه حفظته صممممممم :D من كثرما نتفرج عليه، وبالتأكيد شريت شبه كل الحاجات اللي استعملتها في الفيديو، حتقولوا شن هالهبال اللي تشوفيه تشريه يعني؟!؟! حنقوللكم لا، وقتها أنا أصلا مشريتش حاجة وقررت أن الحكاية حتكون اثنين في واحد، منها حنكون شريت الماكياج اللي يلزمني للحفلة + شريت عدة الماكياج الشخصية لي!
كل فترة نشري كم حاجة وبعدين نلحق مجموعة ثانية، والحق مازال حاجتين بس مشريتهمش، وان شاء الله نلحق نحصلهم قبل العرس.
نرجعوا لموضوعنا، الماركة هذي قصتها جميلة وهي أن صاحبتها اسمها مارلينا Marlena كانت مدرسة موسيقى وعندها شغف وحب للماكياج، فدارت قناة عاليوتيوب لتعليم الماكياج، تنزل فيها دروس وتشرح في هلبة حاجات، ومع الزمن سيبت الخدمة كمدرسة وتفرغت للموضوع هذا وبدأ في العمل على إنشاء شركتها وخط إنتاج خاص بها تحت اسم Makeup Geek وتعني (المهووس بالماكياج).
الموقع الخاص بالماركة هذي مقسم لثلاث أقسام:
1- القسم الأول للمبيعات وفيه معروض كل الحاجات اللي ليها علاقة بالماركة مع بعض الحاجات الثانية من ماركات اخرى اللي تباع من خلال موقعها.
2- القسم الثاني للدروس، وهو تابع لقناتها اللي دارتها زمان و تنزل عليها دروس ماكياج لأنها مازال تصور في دروس موقفتش.
3- القسم الثالث للأفكار يعني البنات عالنت يديروا ماكياج باستخدام منتجاتها وهي تحط في الدروس متع البنات هذو.
من أسبوعين تقريبا كان عرس مارلينا، الحق فرحتلها هلبة لأني نعتبر روحي عندي تجربة شخصية معها، مرة كان عندي استفسار حول نقطة معينة حول الماكياج فراسلتها وبعد يومين تقريبا ردت عليا هي شخصيا، وكانت طريقة ردها لطيفة وهادئة، ومن خلال ردها كان عندي استفسار ثاني فزيادة ردت ثاني عليا، حتقولوا حاجة عادية أنها ترد، حنرد عليكم لا، راسلت أكثر من حد مرات نستفسر ميردوش، وهذي مع أنها صاحبة بزنس والمفروض تكون مشغولة جدا بس ردت عليا شخصيا، مش فريقها أو حد ثاني او السكرتيرة او مديرة اعمالها .. الخ، صدقوني تفرق هلبة بالذات في التعامل مع الايميلات لهذا فرحتلها هلبة هلبة لما تزوجت :)
بعد يومين من عرسها صورت فيديو لماكياج عرسها اللي فعلا في الصور كان مميز (ملاحظة لو كنتي من النوع اللي تحبي الزحمة في الماكياج والماكياج الأوفر فمكياجها مش حيعجبك) أنا منحبش كثرة الخمنتش على وجهي لأني مش حنطيق روحي، بصراحة كلما نحط ماكياج منرتاحش إلا لما ننحيه، ونبدأ نشوف لروحي ونحمد ربي عالخلقة المساوية وفعلا ربنا خلقنا في أحسن هيئة والماكياج واللي هو مش حيقدر يغير الفكرة هذي، الجمال المتوسط بالتأكيد هو أجمل من جمال صناعي يغطيك بطبقات مترتاحيش لين تنحيها (هذا رأيي ولكل وجهة نظر مختلفة) لكن هذا لا يمنع أن الماكياج ممتع ويدير في حركات إضافية جميلة وجو :D
هذا الفيديو متع الماكياج اللي داراته في عرسها..
أسعار الماكياج متعها تعتبر ممتازة للي تعود يشري من بره، لكن لو متهمكش جودة الماكياج، عن نفسي تعجبني طريقة اني نشري باللون، لأنه لو بتشري علبة ألوان كاملة تكوني ملزمة بشرائها وغير مخيرة في الألوان احتمال تطلعلك فيها ألوان عبيطة مش من ذوقك.
ظلال الماكياج العادية اللون الواحد سعره 6$
وباقي الانواع أسعارها متفاوتة وتصل إلى عشرة دولار، لكن النوع الأول يكفي جدا باش الواحد يشريه، إلا لو كنتي من عشاق الماكياج وتحبي اي حاجة تجربيها او عندك مركز تجميل ويهمك تنوعي لزبائنك، وقتها ننصحك تديري جولة على منتجات الموقع.
وتوة نرجعوا لموضوعنا ونعطيكم وصف لكل لون على حدة.
Beach Smoothie
لونه مشماشي فاتح جدا مع لمسة بيج، ناعم جدا في الاستعمال ومريح، نستعمل فيه كلون أساسي، هو أحيانا وفي أحيان أخرى لون من ماك حنتكلم عليه في مقالة منفصلة. في العادة أول درجة لون تحطيها على العين اللي حتكون أفتح درجة أو اللي حتنتقل بيك من درجة الفاتح للداكن هي اللون هذا.
هي واحدة من درجات البني الفاتح اللي لو كان مكياجك داكن الألوان تستعمليه هو الأول بدل من اللون Beach Smoothie
وهو بني اللون لكن درجته أغمق من Crème Brulee لكن فيه درجة تميل شوية للحني، مش هلبة يا دوسة بوادر هههههه (عليك وصف)!!
هذا اللون يميل للدرجات الباردة وهو رمادي فيه لمسة بني، جميل جدا اللون هذا، ينفع يكون اللون الأساسي لو ماكياج ألوانه باردة، زي الاسود والرمادي والأزرق والجو هذا..
ميزة ألوان الماركة هذي أنها ناعمة جدا وسهل التعامل معها، متحسيش أنها خشنة، إيه في ألوان خشنة في الماكياج لأنك أصلا تتعاملي مع بودرة تحطيها على عينك لهذا فيه أنواع مش ناعمة هلبة وفيه أنواع من نعومتها تقدري تتحكمي فيها أكثر لما تتعاملي معها بالفرشاة أو حتى أصابعك لأنه مرات تحطي ماكياج بصوابعك :)
خلاصة المقالة أني إيه ننصحكم لو تبوا تشروا من النوعية هذي لأنها جميلة جدا، ولو متبوش تشروا منها وهذا منطقي ومن حقكم أنصح جدا أنك لما تبي تشري ألوان ظلال ماكياج بصفة عامة ومن أي نوع أنك تاخذي ألوان قريبة من الألوان الثلاثة الأولى اللي ذكرتهم، لأنها تعتبر درجات أساسية لأي ماكياج عيون، وننصحك أنهم يكونوا ضمن مجموعتك.
والروابط هذي خاصة بمارلينا وكل حساباتها على الانترنت.
حسابها على اليوتيوب
صفحتها على الفيسبوك
صفحة ماركتها على الفيسبوك
حساب مارلينا على انستاجرام
حساب الماركة على انستاجرام
حساب مارلينا على تويتر
موقع مارلينا الخاص
موقع ماركة Makeup Geek
وتوة قوليلي، هل جربتي النوعية هذي من قبل؟ لو جربتيها شن هي الألوان اللي تستعملي فيها وشن رايك فيها؟ وهل تنصحي باستخدامها أو لا؟
محبتي ،،
سمّر
#makeup_geek #marlena #crème_brulee #beach_smoothie #frappe #barcelona_beach #أنا_أدون
0 تعليقات