الرموش هدية من ربي تزيد العين جمالا، فيه اللي ربي عاطيهم النعمة هذي ورموشهم ماشاء الله تبارك الرحمن، طوال وغزيرة، فعلا تخليك تنتبه لعينهم وجمالها، في ذات الوقت فيه اللي رموشهم خفيفة وفيه اللي رموشهم متوسطة الطول لكن تطيح وتختفي والبركة في التفنيص في شاشة الكمبيوتر و السهر (حقيقة عن تجربة كلما نرجع للكمبيوتر رموش يتفترشوا، جديات نتكلم مش يطيحوا لا طولهم ينقص بدرجة ملحوظة جدا)، وطبعا بما أنه فيه ناس تعاني زي حالاتنا في الموضوع هذا وقلة الرموش أحيانا تخلي المكياج يبان ناقص جدا لمسة الأنوثة هذه، عليه نضطروا لتركيب رموش باش يكتمل المشهد، وللمصداقية عن نفسي أعتقد أني حنستعملهم في المناسبات القومية فقط لا غير (عرسي ولو عندي مناسبة حفلة أو عرس) لكن في الحياة اليومية مش حنضحي بروحي علاش؟؟ لأني حاصلة في راجل حشيشته يعلق على طهقات النساوين ولو يسمع بيا نحط في رموش صناعية حيستلمني رسمي لخمسين عام قدام، عليه وجب التعتيم عن هذا المخطط :D

بداية نتكلموا عن اللصقة متع الرموش، فيه نوعين من اللصقة، لصقة بيضاء وهذي تنفع لما تحطي رموش مفيش خط أسود يربط بينهم أو لما متكونيش راسمة رسمة العين (الاي لاينر)، لو كنتي راسمة رسمة العين مش حيكون فيه فرق لو استعلمتي اللصقة البيضاء أو السوداء، البيضاء في الحالتين حتجف و يختفي لونها، بس السوداء لما تجف حتخلي أثر ليها بالأسود، لهذا تستعملي اللصقة البيضاء للرموش الفردية واللي من غير قاعدة سوداء والسوداء لو رموشك بقاعدة ومكياجك ثقيل وعندك رسمة العين.

ملاحظة ثانية مهمة جدا جدا لازم تحطيها في بالك لما تحطي اللصقة عالرموش متحطيش الرموش على طول على عينك، استني شوية اربعين ثانية أو دقيقة ما بينما اللصقة بدت تشد روحها باش اول ما تحطي الرمش يلصق بسرعة ويثبت مكانه، بس لو على طول تحطيه على عينك لان اللصقة مازال سائلة حتصير حوسة ومش حتقدري تسيطري على الوضع.

اللصقة الزرقاء اللي لونها أبيض من نوع DUO مش ضد الماء، لكن اللون الأسود منها ضد الماء وتطول أكثر، تلقوها عند انجلوت،

بس فيه حاجات يفضل تديريها قبلما تحطي الرموش، أولها أنك تستخدمي الجهاز اللي يثني الرموش لأن الرموش الصناعية حتكون من الأول مثنية باش تبين العين ناشطة ومنتعشة، فلو خليتي رموشك في نفس الوضع الطبيعي حيبان الفرق واضح بينهم وبين الرموش المش حقانية.

ثاني حاجة حطي الماسكارا قبل، لأنه حيكون صعب تحطيها بعدين، زيدي على هذا كلما بعدتي الماسكارا عن رموشك الصناعية كلما حافظتي علهيم أكثر وقدرتي تستعمليهم في أكثر من مناسبة، وهذي صورة للحاجات اللي تلزمك.

بالنسبة ليا شريت زوز باكوات رموش، الأول من انجلوت والنوعية ممتازة و مريحة لكن للأسف كل صف منها بطول وتصميم مختلف عن الصف اللي بعده، فيه صفين مش عارفة لو كنت حنستعملهم أو لا وهذا محبط، كأنك شريتي حاجة باش تلوحيها، في ذات الوقت لقيت نوعية عالنت الباكو كله طول واحد، وصّيت عليه من برا وكان المفروض ناخذ أقصر طول بس للأسف تلخبطت وطلبت المتوسط، يعتبروا طوال شوية، كان بودي أقصر باش المشهد يكون أقرب للحقيقة، لما نفتح عيني نحس بيهم يمسوا في المنطقة فوق ثنية العين، الشعور مزعج وواضح أنهم مزيفين، ممكن نجرب ننقص من طولهم ونشوف هل حيكون فيه فرق أو لا، على أمل نقدر نشري من بره الطول الأقصر.

النوع الأول من انجلوت وزيما تلاحظوا فيه أكثر من موديل، أول واحد عاليمين قصير وممتاز، اللي بعده شعرة غليظة شوية قصيرة والثالث صف رموش متوسط الطول عجبني والصف الرابع رمشة واحدة طويلة هلبة :(

هذا باكو من آرديل لكن للأسف متوسط الطول ويعتبر طويل شوية، أنا معجبنيش طوله هلبة لكن ممكن غيري يحب يبين أنه مركب رموش!

توة نتكلموا عن الرموش وهي نوعين، نتكلم عليهم في خلاصة ..

النوع الأول خط رموش كامل:

يعني مع بعضهم تلصقيهم مرة واحدة، النوع هذا جميل و أسرع في تلصيقه و تكملي المهمة، مشكلته أنه يمكن أن يكشف بسرعة من قبل الرجل، و الحق أنا متعقدة من نقطة يوم العرس لو لبستهم و نبان شكل ولما ننحيهم ينكشف المخطط!! لهذا فتهم وقررت مناخذهمش.

فيه هلبة أنواع وماركات، فيه اللي خط ولوح وفيه اللي لو اهتميتي بيه تقدري تستعمليه لأكثر من ثلاثين مرة، الفيديو هذا يوضح كيفية تركيب الرموش هذي على العين.

النوع الثاني الرموش المنفصلة:

النوع هذا عبارة عن رموش منفصلة بححيث تركيبهم و تحطيهم وين ما تبي، الخصلة الواحدة ممكن فيها رمشتين أو ثلاثة، تقدري تشريهم بأكثر من طول وتركبيهم باش توصلي للشكل اللي تبيه، ميزتهم أنهم يخلوا شكل العين يبان طبيعي أكثر وواقعي من رموش الخط الكامل، لكن مشكلتهم أنهم ياخذوا وقت أطول، عن نفسي وقت زيادة و شكل طبيعي أقرب للواقع أحسن عندي من وقت سريع ونحصل تسهويكة نسمعها في كل مناسبة هههههه

الفيديو هذا فيه شرح ممتاز لطريقة تركيبهم وتبوا الحق فيه حتى رموش خط كامل لكن للرموش السفلية، ولا أعتقد أنه فيه واحدة مستعدة تحطهم من غير عارضات الازياء وجماعة مجلات الموضة لأن فكرتهم أصلا حسيتها عبيطة!! مش للدرجة هذي الواحد بيركز على كل شئ، هلبة عالجمعية !!

أتمنى نكون وضحت الموضوع كويس :)

محبتي ،،

هلبة يلبسوا النظارات سواء الطبية أو للحماية من الكمبيوتر أو الشمسية، فيه نصائح ممكن تتبعيها وانتي لابسة النظارة، وكل نصيحة متعلقة بنوع معين من النظارات، أخصائية التجميل ليزا الدريدج دارت فيديو شرحت فيه عن الموضوع وقالت فيه هلبة نصائح نلخصها في نقاط.

ملاحظة: 

ليزا دارت الفيديو ولبست نظارة العين اليمين منها عدستها حتبين العين أكبر واللي عاليسار حتبين العين أصغر، لهذا دارت لكل عين طريقة مختلفة عن الثانية باش تورينا الفرق بين الحالتين.

1- كريم الأساس لا تكثري منه في منطقة الأنف وين ما يجي مكان النظارة لأن الأساس حيتنحى بينما تكوني لابسة النظارة وحيبان المنظر مش حلو، لهذا لما تحطي كريم الاساس حطي على الوجه كله واللي يفضل عالفرشاة اخطمي بيه على الأنف، ولو محتاجة زيارة أسفل الأنف زيدي، بس المهم فوق نقصي قدر المكان. 

2- لو بشرتك دهنية استعملي كريم أساس مطفي ويمتص الدهون لأنه كلما زادت دهون البشرة والكريم كان خفيف أو ميساعدش في امتصاص الزيوت كلما زاد ساح الكريم على وجهك بالذات جهة العين والأنف.

3- الكونسيلر اختاري نوع يطول، فيه كونسيلر خفيف وفيه كونسيلر long wear يعني يتحمل، ومتحطيش هلبة وامزجيه كويس هلبة باش ميبانش شكله لو النظارة عدستها تكبر في عينك.

4- حطي برايمر في العين وتحت العين لأنه حيزيد من ثبات الكونسيلر تحت العين أكثر.

5- لو العدسة تكبر عينك لازم يكون عندك مهارات ممتازة في الماكياج لأن أي شئ بتحطيه لو طريقتك غلط حيبان الغلط بوضوح مع العدسة المكبرة (لتفادي الموضوع متكثريش ماكياج في النهار).

6- لو عيونك كبيرة وعدستك تصغر في العين فهذا مليح، فيه توازن في المعادلة، بس لو عينك صغيرة والعدسة تصغر ففيه نقاط تحطيهم في بالك باش ميبانش شكل عينك أصغر مع النظارة.

7- لو العدسة تكبر تقدري تحطي ألوان داكنة لماكياج العين ويفضل خلال النهار تستعلمي ألوان مطفية مفيهاش لمعة، اللمعة مع عدسة تكبر حوسة، بس لو العدسة تصغر حطي على جفن العين لون فاتح لأنه حيخلي العين تبان مساحتها أوسع شوية ومش حيخلي تركيز النظر عالى داخل العين بس زيما لو درتي الظل داكن، خلي يكون فيه توزيع في لفت الانتباه للعين.

8- الكحل الأسود استعمليه مع العدسة المكبرة براحتك لأنها حتكبر العين، بس لو عينك صغيرة والعدسة تصغر يفضل تستعملي قلم فاتح أبيض أو بيج لأنه حيزيد يوسع في شكل العين.

9- لو رموشك طوال هلبة ويضايقوا فيك لما تلبسي النظارة حتى لو قصار استعملي اللي يثني في الرموش لأنه حيثنيهم لفوق، والماسكارا للعدسة المكبرة متكثريش منها، وردي بالك تكثري لدرجة تدير كلاكيع بين الرموش لأنه كله حيبان ويتكبر وهذا مش حلو، وافصلي الرموش عن بعض لو الماسكارا جمعتهم باش الشكل يكون أحلى، بس لو عدسة نظارتك تصغر تقدري تخلي شوية كلاكيع بس متكثريش لأن الكلاكيع أصلا مش حلوة عالرموش وإن كان البعض يحسابها تخلي الرموش كثيفة بس يقعد اسمها ومنظرها كلاكيع!

10- بالنسبة للحواجب لو نظارتك صغيرة واطارها صغير ارسمي حواجبك عادي بس لو الاطار اسود داكن هلبة وعريض تقدري تدكني شوية لون الحواجب باش يكون فيه تناسب.

هذي هي نصائح ليزا، وفي الحالتين فيه هلبة اختلافات لأنه فيه اللي عينه واسعة وفيه اللي صغيرة، العدسات فيه  اللي تصغر العين وفيه اللي تكبر، اللي اطارها وعدستها كبيرة وفيه اللي صغيرة، لهذا جربي كل هذي الأفكار والآراء واختاري اللي يناسبك وريحك، أتمنى تكون المقالة أعطتكم بعض الاساسيات وتكون مفيدة.

محبتي ،، 

سمَر

إزالة الماكياج مهم هلبة بقدر أهمية أنك تديري ماكياج، شقلبت هلبة طرق عالنت والغالبية لقيت طريقتهم أن يهروا وجههم بالذات العيون بالمناديل المعطرة، للأسف العين مش ناقصة لأن هذا حيهري الرموش ويزيد قابلية أنهم يطيحوا أكثر من قبل.

فيه طريقة عجبتني هلبة بالذات لما تبي تنحي الرموش الإضافية، الطريقة هذي لطيفة هلبة على العيون و عن نفسي اعتمدتها رسميا، الطريقة هي أنك تاخذي شرائح القطن الخاصة بإزالة الماكياج، تصبي عليها كمية كويسة من مزيل الماكياج و ننصح بمزيل بيوديرما للبشرة الحساسة، ممتاز جدا ولطيف على البشرة.

حطي كل قطعة قطن على عينك ومتمسحيش بيها، ديري عليها مساج بصوابعك من غيرما تحركي القطنة، حاولي تخيلي المزيل يوصل لكل تركينة في عينك بالذات خط الرموش باش تتنحى الرموش، لما تحسي أنك مسدتس كويس اجبدي القطنة كأنك تمسحي لكن مرة واحدة، وشوفي للقطنة، حيعجبك المشهد الختامي.

أول شئ حتلقي كمية كبيرة جدا من ماكياج العين اختفى بلمسة واحدة، والرموش حتلقيها حصلت في شريحة القطن وتنحت من عينك بكل سلاسة.

الفيديو هذا لخبيرة التجميل ليزا إلدريدج حيوريكم الطريقة بالضبط ومنه تعلمت الطريقة هذي، مشاهدة ممتعة :) 

محبتي ،،

بناء على طلب أكثر من متابعة للمدونة ممن راسلوني على الصفحة وسؤالهم عن الحاجات اللي المفروض يشروها من ماكياج العروس، قررت نبدا سلسلة من المواضيع وكل مرة نشد قسم معين لعندما نكملوا الاساسيات اللي يفضل تكون مع العروس أو مع أي بنت أو سيدة تبي تشري ماكياج متكامل بالأساسيات، ولو حبت تزيد بعدين تقدر تنوع وتنتقل للثانويات او الإضافات.

المقالة هذي حنكتب فيها قائمة بالحاجات اللي ننصح تشريها، واللي حيصدف انك تحتاجيها، وبعدها حنبدأ سلسلة مقالات كل مرة نتكلم عن حاجة منهم بالتفصيل، النصائح والحاجات اللي تعلمتهم بخصوص كل حاجة، شن البدائل عن كل حاجة منها وكم استخدام تقدري تستخدميهم من غير الاستخدام اللي هي صنعت لأجله.

السلسلة هذي حتكون عن الماكياج فقط وبعدها نخشوا في باقي الاحتياجات فيما يتعلق بالماكياج، لكن نخلو الموضوع خطوة خطوة أحسن للاستيعاب وكثرة المعلومات مرة واحد تخلي الواحد يدوخ.

أنا في العادة لما نحط ماكياج نبدأ بالعيون وبعدها نحط البرايمير وننتقل للوجه، وعلى هذا الأساس حيكون التسلسل.

1- البرايمر الخاص بالعين (مثبت ظل العين) Eyeshadow Primer 

2- ظلال ماكياج العين Eyeshadow

3- ماسكارا Mascara

4- جل لاينر لرسمة العين Gel Eyeliner

5- اللي يثني في الرموش :D (ملقيتش ترجمة قريبة - اختياري جدا) Lash Curler

6- الرموش الصناعية واللصقة متعها (اختياري لو رموشك غزيرة وطويلة أو متوسطة نصيحة فوتيهم لأنه عندك كنززز).

7- قلم العين Eye Pencil

8- قلم الحواجب Brow Pencil

9- البرايمر الخاص بالوجه Primer

10- كريم الأساس Foundation

11- الكونسيلر Concealer

12- البودرة Powder

13- أحمر الخدود Blush

14- الهايلايت (الإضاءة) Highlight

15- قلم الشفاه Lip Pencil

16- أرواج (أحمر الشفاه) Lipstick

17- ملمع الشفاه Lip Gloss

18- مثبت الماكياج (اختياري) Setting Spray

19- مزيل ماكياج وقطن للماكياج مع كلينكس معطر Makeup Remover

هذي هي الحاجات اللي تلزمك، مكتبتش كل حاجة حتلزمك في القائمة بالاسم لأن كل واحدة أحيانا تنقسم لعدة حاجات حناخذها بالتفصيل زيما قلت في مقال منفصل.
عندي ملاحظة واحدة مهمة جدا للجميع، اللي حنتكلم عنهم حتلقوهم هنا من ناحية الوصف واللون والهدف منها، أنا حالة خاصة، ضاربني الوسواس هذا علاش خذيت من بره ومبيتش ناخذ حاجة مش ضامنة أنها أصلية أو لا، لأني مريت بتجارب سابقة من محلات ادعت وكسبت شهرة على أن بضاعتها أصلية لكن للأسف، حتقولولي لكن فيه انجلوت هنا، انجلوت سمعت بيه مؤخرا الحق، أو اهتميت بزيارته لما عرفت أنه وكيل شركة فنلندية تقريبا، لكن في ذات الوقت أغلب الالوان اللي شريتها خذيتها بناء على هلبة بنات نتابع فيهم عاليوتيوب ولأن كل لون له اسمه وعجبني فقررت ناخذه، والغالبية منهم خذيتها على خاطر هي اللي استعملوها في ماكياج العرس لأني زيما قلتلكم نبي نديره بروحي، لهذا متربطيش روحك أبدا بأنه لازم تاخذي من برا أو نفس اللي عندي، بالعكس حنوريكم الحاجات اللي خذيتها وندير جهدي نقربها من البضاعة الموجودة هنا قدر الامكان باش نسهل عليكم المهمة.
في المدونة هذي نقدم في نصائح مش ندير جو شوفوا شن شريت شوفوا شن خذيت، كل شئ فيها لسبب وعنده وجهة نظر حنوضحها ديما.
حاجة ثانية اعذروني فيها وهي أني ديما نحط في روابط فيديوات بالانجليزي، الهدف منه بالنسبة لي أنه كلما سمعت للانجليزي كلما حسنت لغتي أكثر، وكلما بعدت عنها كلما نسيت هلبة كلمات وغيره، فديما نتابع في الأجانب أكثر، زد على هذا ذوقهم أبسط من العرب بصراحة، العرب زحمة ماكياجهم هلبة أنا ذوقي يميل للبساطة، ولما نحط فيديوات للاجانب السبب ان طريقتهم تعجبني أكثر ولأن في المدونة قلتلكم حنوريكم اللي تعلمته وكيف تعلمته، لهذا نحط في روابط للأجانب لاني تعلمت منهم.

محبتي ،،
سمر 

أول حاجة نهدرزوا عن أجزاء العين زيما في الصورة (أتمنى نكون رسمتها صح)
العين فيها هلبة زوايا عريضة و دقيقة، ثنايا ومساحات واسعة ومساحات ضيقة، فيه تراكين من العين تستلتزم ألوان فاتحة باش تبين العين مصحصحة، و أجزاء ثانية محتاجة لون أدكن شوية باش يطلع العين عندها شوية عمق أو مغمورة شوية وهكذا، خلونا نفصلوا شكل العين من بره .. ونبدوا من فوق لتحت.

أول شئ تحت الحاجب لو تحطي صبعك وتضغطي عليها حتحسي بوجود عظمة غادي هذي اسمها عظمة الحاجب، حتقولولي كل الوجه فيه عظم!! لا،، حطي إيدك على خدك حتلقي صبعك انغمست فيه لكن حطي صبعك أعلى الخد حتلقي عظمة طول، هذي اسمها عظمة الخد.
نرجعوا لموضوعنا، عظمة الحاجب هي لما توقفي في مكان فيه إضاءة من جهة موجهط عليك حتلاحظي أنه تحت الحاجب بالضبط مكان العظمة فيه انعكاس للضوء، بالضبط هنا تحطي الهايلات في نفس مكان الإضاءة الطبيعي هذا لأن هذي هي الفكرة من الهايلات، حتقولولي طب ليش نحطوه طالما هو موجود من الاول؟ حنرد أنه لما تحطي كريمات و بودرة على وجهك حيمشي شكل جلدك الطبيعي وبهذا متطلبات الانعكاس حتختفي، يعني لما تغطي وجهك بالكريم والبودرة والظلال البشرة حيولي لونها مطفي من غير لمعة لهذا حيلزمك لمعة هايلات مزيفة ههههه نقصد بهذا لمعة من ظل العين، في أغلب باكوات ظلال العين اللي فيها هلبة ألوان حتلقي لون فاتح، هذا هو لون الهايلات.
باللون الأصفر المنطقة هذي مهمة جدا و هي منطقة أعلى ثنية العين، لما تتفرجوا على الفيديوات متع الماكياج حتلقوا أن أحد مراحل وضع الماكياج هي وضع لون الخلفية و فيالعادة يكون هادئ لكن له تأثيره لما تنحط باقي الألوان، اللون هذا عالأغلب تحطيه في المنطقة هذي، وبالانجليزي يقولوا للون هذا Transition color يعني الانتقال من درجة فاتحة وهي درجة اللون هذا للدرجة الداكنة اللي حتجي في المرحلة التالية اللي لونها بنفسجي، واللي في منطقة ثنية العين، هني حتدكني في اللون باش تلعبي بالألوان، أساسا الفكرة من الماكياج كلها اللعب بالألوان و الإضاءة، تخيلي منظر ستائر معلقة، مش الستارة فيها ثنيات، الثنية اللي بره تبان إضاءتها أفتح من الثنية اللي من داخل، هذي هي الفكرة اللي نبوا نطبقوها عالعين باش تخليها وكأنه عندها أبعاد يعني مثلا (ثلاثية الأبعاد)، حتقولولي ماهو هي أصلا ثلاثية الأبعاد، حنرد إيه صح بس مش حكينا أن لكل عين شكلها؟ لهذا كل عين تبي لعب عالظلال بالطريقة اللي تناسبها باش تبين الأبعاد هذي أكثر وهذا اللي حيبرز جمال العين زيادة وهذي هي الحكمة من الماكياج "إبراز الجمال".

جفن العين اللي باللون الأزرق، جفن العين حسب نوع الماكياج سهرة أو يومي، لكن باش تعطي عينك الأبعاد اللي هدرزنا عليها وتخلي التركيز منصب عالعين في الحوار بالذات لما تهدرزي مع زوجك تبيه يفوت كل شئ ويذوب في جمال عينيك :D هنا يا عزيزاتي نقسموا المنطقة هذي لثلاث أقسام، الأول يبدا من الزاوية الداخلية للعين، في الزاوية هذي ديما حطي لون فاتح، سواء أكان سادة من غير لمعة أو بلمعة، لكن عالأغلب حيكون بلمعة وأنصح جدا اللي تشري ماكياج لمعة تشري اللي لمعتهم ناعمة هلبة باش ميبانش مكياجها شلافطي، فيه اللي لمعتهم بُقَّاصِي قوية هلبة أرجوكم تفوتوهم مش حلوات أبدا، وانجلوت ظلاله ممتازات جدا.
توة ننتقلوا لنصف جفن العين، المنطقة الوسطى منه تكون لون ظل فاتح أو فيه لمعة لكن المهم فاتح مش غامق لأن الغامق حيجي بعده في الزاوية الخارجية للعين، ليش؟ لأن طالما هو غامق فاللي حيبان أكثر هو المنطقة الفاتحة من العين، يعني تقدري تقولي سينقل التركيز على منتصف الوجه أي العيون، حنوريك صور أمثلة باش تزبطوا الفكرة أكثر، و على فكرة متربطيش نفسك ديما أنه لازم الزاوية الخارجية تكون لونها أسود، ردي بالك مش الأسود بس معناها لون داكن، أي لون درجته غامقة أو انتي تحطي وتعاودي فيه (طبعا يفضل يكون أدكن شوية) حيكون كافي للمهمة هذي زي هذي الصورة.

لكن على فكرة زيما قلت حسب نوع الماكياج اللي بتحطيه، أحيانا لو بتديري مكياج سموكي امممم يعني العين كأنها محصلة بوكس لكن بطريقة جميلة :D كمثال الصور هذي.


خط الرموش العلوي والسفلي أكيد تزبطوه وخط دموع العين هو نفسه خط الكحل، اللي نكحلوا بيه العين، والعين تتكحل بعدة ألوان، اللون اللي يزيد جمال العين لكن يصغرها هو الكحل، لكن حسب الماكياج و الظلال لانها ممكن تغطي عالموضوع ولو تبي العين تبان أوسع و أكبر خليه فاضي أو ارسميه بقلم كحل لكن مش أسود، عن نفسي منحبش القلم الأبيض يبان عبيط وواضح فخذيت قلم لونه بيج فاتح.

توة ثاني حاجة حنديروا أمثلة عن فرش الماكياج اللي تستعمل في ماكياج العين

فيه نقطة مهمة وهي ان كل تركينة من العين تلزمها فرشاة ليها مواصفات أو حجم مناسب، حى لو انتي محترفة وتقدري تستعملي فرشاة واحدة لكن فيه حاجات محتاجة فرشاة خاصة زي مثلا رسمة العين eyeliner هذي يا ودي متندارش الا بفرشاتها الا لو حترسميها بالقلم هذا موضوع ثاني، في الصورة هذي الفرش اللي حيلزموك وحطيتهم جنبك بعض باش تزبطوا الفرق في مقاس كل واحدة عن الثانية.

هذي مجموعة الفرش اللي نستعمل فيها لماكياج العين، أو للدقة هذي الفرش الأساسية لكن عالاغلب متع رسمة العين منستعملش فيها إلا لما نرسم العين لأني مش من النوع اللي يحبها هلبة.

أهم فرشاتين ننصح بيهم، مش حنتكلم على النوع أو الماركة التركيز حيكون على الحجم، الفرشاة السوداء مهمة و حجمها أكبر من البيضاء ليش؟ لأنه اللي حتستعمليها في أول درجة لون فاتحة تحطيها في منطقة أعلى ثنية العين، هذي مهمة جدا لو استعملتيها في منطقة ثنية العين حتكون كويسة باش تحطي درجة اللون الأغمق عشان تلعبي بالدرجات، لو حسيتي أنها مش مساعدة و اللون ينتشر هلبة بعيد عن المساحة اللي تبيها وقتها ننصحك تاخذي فرشاة ثانية بمقاس أصغر زي اللي البيضاء على اليمين، عن نفسي جربت ندير بس بالسوداء لكن لقيت الموضوع محتاج لفرشاة أصغر حيكون أفضل هلبة، بس لو نبي نمشي الأمور عادي واحدة تكفي.

ثالث حاجة الماكياج هو عملية لعب بالظلال الطبيعية لإبراز جمال العين و توسعتها و غيره . 
حنهدرز على الظلال في مقالة منفصلة، بصراحة دهشت وحسيت روحي تكلمت هلبة ومحتاجة ناخذ فاصل إعلاني .. 

الماكياج لعب بالظلال محتاج منك تتأملي في الحاجات وتركزي على منطقة الظل ومنطقة الإضاءة وشبه الظل، تأملي من حولك وركزي في التفاصيل وتخيلي لو طبقتيها على نفسك، الماكياج ممتع متخخميش هلبة في الموضوع و جربي و ألعبي بيه باش تتعودي وتولي محترفة، ولما تطلعي مع زوجك توتي روحك فيسع وتوريه أن نظرية أن النساوين ياخذوا ساعة في اللبس وساعة ماكياج كذب وافتراء :D :D

محبتي ،،
سمر

مساء الخيرات وأعتذر عن تأخري بهذي المقالة، انشغلت الأيام الماضية كان من الصعب نحصل قعدة مليحة لموضوع مقالة اليوم، لكن توة بعون الله نبدأ موضوعنا اليوم واللي هو الجزء الثاني من سلسلة ماكياج العروس (الأساسي) والمرة هذي نتكلموا عن ظلال العين.

حسب تجربتي شريت مجموعة، لكن هذا لا يعني أنها كلها ضروري تاخذوها لأن كل اللي خذيته خذيته لسبب وجيه، وحنوضح طريقتي وخطوات شرائي للألوان اللي عندي وشن هي الألوان اللي ننصحكم تشروها سواء لو كنتوا حابات تاخذوا نفس اللي عندي، لكن ننصح تاخذي أي ماركة بس بالدرجات اللي حنوريهم لك، لأن العبرة في اللون طالما الجودة موجودة بغض النظر عن الماركة، لهذا تركيزنا اليوم حيكون على الألوان وليس الماركات.

شرائي لظلال الماكياج خطم على ثلاث مراحل، الأولى شريت الألوان اللي تلزمني لماكياج العرس، بعدين اكتشتف أنه فيه ألوان ناقصتني بحكم أن ألوان العرس البعض منها خفيف ونفضل يكون عندي ألوان أقوى شوية، وزيادة فيه ألوان مكانتش موجودة في ظلال ماكياج العرس زي الأسود مثلا فكان لازم نشريه، بعدما شريت مجموعة مناسبة، وكنت مقررة يكون نوع ماكياجي كله خفيف اكتشفت أنه معنديش ولا ظل فيه لمعة :D لهذا لازمني شوية مؤثرات للسهرات والمناسبات القومية (الأعراس) واللمات النسائية، دروت عالنت وشقلبت بحكم أني مقررة مناخذش إلا أصلي (الوسواس القهري هذا حنحكيلكم عليه مرة ثانية) فلقيت باكو ألوان لماركة MAC على موقعهم، الباكو هذا فيه 15 لون، الماركة هذي تبيع في اللون الواحد اللي معه علبة بـ 16 دولار، و والباكو او العلبة اللي شريتها فيها 15 لون، يعني فرضاََ بنشري كل واحد بروحه حتكون القيمة 240 دولار، ولنفرض أني بنشريهم كل لون بروحه من غير علبة ونحطهم في باكو زي اللي عندي بقاعدة مغناطيسية حتكون القيمة لو كل لون بـ 10 دولار هي 150 دولار، ولو بروحي نعبي باكو زي هذي فيه 15 لون لكن الالوان من اختياري معناها حيكون سعرها 160 دولار، بس الموقع متعهم كان عندهم عرض لزوز باكوات واحد ألوانه ترابية تندرج تحت درجة الألوان الدافئة والثاني للألوان الباردة، وبما أني منحبش نحط ماكياج أخضر و أزرق على وجهي ونبان كأن حد عطاني بوكس، ولأني مقتنعة أن الماكياج الهدف منه إضافة لمسات لإبراز الجمال مش أن وجهي يكون كراسة رسم لجميع الألوان، لهذا اخترت الباكو اللي ألوانه دافئة وسعره كان 85 دولار، صفقة ممتازة وعلى فكرة العرض مازال ساري على موقعهم.

قبلما نشري باكو الألوان بالتأكيد قارنت الألوان اللي فيه مع الألوان اللي عندي، والألوان اللي شريتها قبله تأكدت أنها مش موجودة في العلبة هذي باش مننخلعش ونلقى روحي خذيت لونين متشابهين، وبالطريقة هذي شريت الألوان الخاصة بماكياج العين واللي نعتبر روحي مكتفية جدا جدا بها ومش عارفة لو حيخطر ببالي نزيد يوما ما أو لا، الله أعلم!!

هذي صورة للباكو اللي ألوانه دافئة وتحت منه صورة الألوان الباردة.

وتوة نخشوا لموضوعنا الأهم، شن هي الألوان اللي يفترض أو يفضل تكون عند كل فتاة، سيدة أو عروس؟؟

طريقة وضع ماكياج العين لها أساسيات الاهتمام بها حيخلي فيه جمال في ظهور العين، طبعا هذا لما ينحط الماكياج بطريقة صح، بس لو كنتي تحطي أي لون في أي مكان ومع طريقة تطبيق غلط، فالمشهد حيكون كارثة حتى لو كنتي شارية أغلى الماركات العالمية.

شوفي لعينك في المراية، حتى اللي عندها هالات فوق العين أو تحتها، تدرج لون الهالات يبدا من الفاتح للداكن من لون البشرة، حتى لما حد يعطي حد بوكس، ثاني يوم لون البوكس حيكون متدرج ههههههه ، و بنفس الفكرة الماكياج ينحط بتدرج، ماعدا طرق مختلفة هذيكا لما الواحدة تبي تدير جو وحركات واللزي منو وهذا مش موضوعنا، نحن هنا نتكلموا على الأساسيات مش الثانويات، غير نضمنوا شكلنا يبان تمام بالطريقة التقليدية بعدين الباقي ساهل.

لما تحطي الماكياج عالعين، سواء أكانت طريقتك أنك تبدي بالألوان الداكنة بعدين تهفتي من اللون وتنتقلي للألوان الفاتحة أو تدرجات لون البشرة في النهاية حيكون تسلسل الماكياج من تحت الحاجب لخط الرموش هو ثلاث درجات، درجة فاتحة، درجة متوسطة وهي درجة الانتقال من الدرجة الفاتحة للداكنة وبعدها الدرجة الداكنة وممكن طريقة الماكياج ان الدرجة الثالثة فاتحة مش شرط يكون الماكياج داكن، لكن المحصلة هي التدرج هذا.

الألوان  اللي ننصح بها هي عبارة عن ثلاث درجات للألوان الترابية للون البشرة باش تستعمليهم في التدرج للانتقال من درجة فاتحة لدرجة لون الماكياج الرئيسي ومعها اللون الأسود + ظلال بلمعة للسهرة واللمات والمناسبات القومية، وتقدري تحطيهم الصبح (في البيت) لكن بدرجة خفيفة حيديروا لقطة جميلة لكن لو برا ومع الشمس امممم مش حلو أو الحق حيكون ملفت وعبيط لهذا فوتيه برا البيت في الصبح.

قسمت الألوان اللي عندي على أربع أقسام، كل قسم منهم لو لقيتي منه درجة خوذيها، لكن مش تاخذي كل الدرجات لو تبي توفري وتاخذي اللي يلزمك بالذرجة الأولى، اللي عندي متركزيش عليهم كلهم لأني واخذة زيادة عن حاجتي للأسباب اللي قلتها سابقا.

الدرجة الأولى وهي الأفتح واللي في العادة تكون أفتح من لون بشرتك شوية ولما تحطيها عالعين بالفرشاة حيبان جمالها لكن حتكون درجة خفيفة جدا يا دوب تبان وهذا كويس، حاليا اللي عندي زي الصورة هذي، نستعمل لما نطلع من البيت (طلعة رايقة) نحط من اللون الأول عاليسار BEACH SMOOTHIE وهو من ماركة MAKEUP GEEK طشة فوق جفن العين بعدها نخطم على كسرة العين بلون من الدرجة الأغمق واللي حنتكلم عنهم بعد المجموعة هذي.

اللون الثاني اللي ننصح بيه كدرجة فاتحة من ألوان ظلال العين وهو BAMBOO وهذا من ماركة MAC لونه بني فاتح خفيف جدا جدا يكاد يبان، لهذا فهو مريح للمرحلة الأولى كلون انتقالي لدرجة أغمق.

اللون الثالث SOFT BROWN من ماركة MAC ودرجته أغمق شوية من BAMBOO لكن مازال يعتبر فاتح وتحت الدرجة الأولى من ألوان ظلال العين، نصيحتي لو حتشري تختاري لون قريب من واحد من الألوان هذي، ووقتها حتكوني ضمنتي درجة لون حتستعمليها بدوم مبالغة كل يوم!

وتوة ننتقلوا للدرجة الأغمق، الدرجة هذي نستعمل فيها بعدما نحط من الدرجة الأولى ونحط فيها في ثنية العين، باش ندير شوية عمق للعين، ولو نحط درجة فيها لمعة فاتحة أو حتى بدون لمعة بس لونها فاتح هذا يخلي شكل العين مصحصحة شوية، انتي جربي وقارني.

أول لون عاليسار يعجبني وهو واحد من الألوان اللي حنستعملها في العرس إن شاء الله، في العادة نحط فيه بعد اللون الأول حتى في طلعاتي اليومية، لكن منكثرش لأنه يبان واضح هلبة، منحبش لما نحط حاجة في عيني نبين أني حاطة حاجة، أنا بس ندور على حاجة تزبط المشهد، اللون هذا اسمه CREME BRULEE وهو من ماركة MAKEUP GEEK واللون الثاني حتى هو من نفس الماركة واسمه FRAPPE، يعجبني هلبة اللون هذا، بنّي داكن وفيه شوية ميول للحني، لما نحطه على درجات لون البشرة اللي أفتح منه حيبان ميوله القريب للون الحنّي، ننصح بيه جدا ولو تلقي لون زيه خوذيه ولا تترددي.

اللون الثالث الأول على اليمين TEXTURE من ماركة MAC ممتاز ويعتبر درجة غامقة قليلا من درجات اللون البني.

الدرجة الثالثة وهي الدرجة اللي أغمق من لون البشرة بدرجتين أو أكثر، لأنها حتدير جو في اللعب الكلي بالظلال، تقدري تستعمليها مع الماكياج اللي تبي تعطيه قوة، إلا لو كنتي تحطي في ماكياج داكن خلال اليوم مش السهرة، ممكن الاذواق تختلف أو طريقة وضع الماكياج تختلف وبهذا يكون استخدام الالوان هذي مناسب للصباح، الألوان اللي عندي من اليسار SWISS CHOCOLATE من MAC درجة الشوكولا لو نبي نوصف لونه، درجة البني متعه جميلة جدا وننصح بيه أكثر واحد أو بلون قريب منه للفئة الداكنة من الألوان المطفية اللي تبي تاخذيها.
اللون الوسطي من MAKEUP GEEK واسمه BARCELONA BEACH درجة لونه غريبة منتقلة بين الدرجات الدافئة لأنه فيه البني وبين الدرجات الباردة لأنه يغلب عليه اللون الرمادي، ممتاز في موديلات الماكياج المختلفة اللي حتديرها ويجي على أغلبها (يعني حيخلص حقه ههههه).
اللون الأخير هذا يعجبني بحكم أني مش النوع اللي يميل لاستخدام الاسود هلبة، وحتلاحظوا هذا بوضوح على اللون متعي لأنه شبه مازال جديد، هذا اللون بني غامق جدا جدا، كأنه قهوة محروقة لكن مازال محافظة على لونها البني القريب للسواد اسمه EMBARK من ماركة MAC، هو واللي قبله خذيتهم لأنهم من ألوان ماكياج العرس.

آخر درجة مهم تكون عندك وهي اللون الأسود، عن نفسي مازال محاولتش ندير بيه حاجة حاسة بالرهبة ههههه ،، مشكلتي معه أن عيوني يدمعوا هلبة، فمازال نتحاشى فيه، لكن شريته من مبدأ أنه لازم يكون موجود في مجموعتي، اللون الرمادي اللي جنبه خذيته لأنه لازمني في ماكياج العرس وخذيت الرمادي لأنه مازال أخف من الأسود في اللون، وأهون شوية بالنسبة لي، اللونين من ماركة MAC الاسود اسمه CARBON والرمادي اسمه TYPOGRAPHIC.



توة كملت من الكلام عن الألوان الاساسية لأساس أي ماكياج عين، وتعتبر ألوان مهمة لأي ماكياج، لكن لو حابة تزيدي لمسة سهرة ولمعة للعين ننتقلوا للألوان بلمعة، وحنذكر الألوان اللي عندي ونشوف أنها مهمة تكون عند أي عروس، لكن في حال العروس من النوع اللي يلبس في الصدرة هلبة ومتمشيش للمزين فزيدي ألوان لها علاقة باللبس العربي لأني نشوف فيهم يحطوا في قنابل أنا مستحيل نحطها وبصراحة الموضوع هذا مش حنفتي فيه لأنه مش تخصصي (حنتكلم عن النقطة اللي تخص اللبس العربي مرة ثانية، لأنه عندي وجهة نظر خاصة).
ننصحك عالأقل يكون عندك درجة طبيعية قريبة للبشرة بلمعة، البني أو البرونزي، هذو مهمات وجميلات سواء حطيتيهم هلبة أو طشة خفيفة يا دوب تدير لمعة بسيطة كمياج يومي نهاري، بعدين انتقلي بين الذهبي ودرجات العنّابي لأنها جميلة جدا جدا وتعتبر قريبة من لون البشرة باعتبارها تدرج بسيط للبني بس خش فيه لون العنب.
توة حنحكي عالألوان اللي عندي من اللي ننصحكم بيهم، ونبدا باللونين هذو، اللي عاليمين من بكري نشبحله نحاول نلقاله وصف بس معرفتش، مش زهري فاتح جدا جدا وفيه لمسة ميول للبرونزي لكن خفيفة جدا الدرجة هي والوردي، جميلة جدا درجته وممكن تستعمل كهايلات للعين (إضاءة العين)، اسمه Vanilla Extract من ماركة MAC (ملاحظة كل الألوان اللي عندي بلمعة من MAC لهذا مش حنوضح النقطة هذي مع كل لون).
اللون الثاني لونه ذهبي مع درجة من عصير التفاح، معجبنيش هلبة من ناحية ملمسه، لمعته مش ناعمة زي باقي ألوان MAC في بعض الالوان بمجرد ما تحطيها على يدك تبان وتثبت شكل ملفت، هذا تخطمي أكثر من مرة، ولمعته مش ناعمة او قوامه أصلا مش ناعم هلبة لهذا لازمه عوامل مساعدة ومثبتة باش يبان لونه مزبوط.

الألوان التالية ننصح بيهم جدا لكن الوسطي حسب الذوق، عن نفسي امممم مش عارفة لو حنعتمد عليه هلبة أو لا، وبصراحة لونهم مش محتاج وصف، نخليكم تتأملوا في صمت :D


المجموعة الأخيرة ممتازد بالذات أول لون عاليسار هو المفضل عندي، والوسطي هو درجة زيتوني لكن فاتح جدا جدا، و الأخير ذهبي فاتح، الأخير ممل عادي مش حاجة ضرورية يكون موجود، تلقيله بدائل لو عندك ذهبي أقوى منه.


هذوا الألوان بلمعة اللي ننصح بيهم، مازال عندي زوز لكن ألوانهم فاتحة وعادية تعتبر مش مهمة هلبة، بس توة أنا نتكلم عن المهم وليس الثانوي. حاجة واحدة هي مسك الختام لكن حنتكلم عنها في مقالة منفصلة اللي حتكون عن الهايلايت (إضاءة الوجه).

وهذي صورة قريبة للألوان اللي في الباكو مع بعض.


توة السؤال المهم، كيف طريقة وضع الماكياج أو الظلال الأساسية؟؟ خلونا توة في الأساسية، لأن الظلال بلمعة هذي موضوع ثاني ولها هلبة أفكار وفنيات لكن توة المهم هو الألوان الأساسية، لقيت الفيديو هذا وعجبني هلبة والبنت فيه وضحت الطريقة اللي تحطي فيها الألوان الأساسية بسهولة، والفيديو للمبتدئين في الماكياج، استمتعوا بمشاهدته وأتمنى نكون شرحت بالتفصيل ولو مازال فيه أسئلة نستنى فيكم في التعليقات :)
 



محبتي ،،
سمر

مرحبا عزيزاتي ،،
كانت فترة غياب طويلة وأخيرا رجهت، المقالة هذي حتكون إجابة لهلبة أسئلة وصلتني بخصوص حفلة العرس والاستعداد ليها بالذات التسريحة، أهم شئ تقووا قلبكم لأني خليت راحة البال هي العنوان الرئيسي للعرس، حاولت منعقدش روحي قدر الممكن ونخلي البساطة والروقان هي عنوان حفل زفافي.

1- تسريحة الشعر:

بالنسبة لي الموضوع كان مهم جدا، لأني حضرت هلبة مناسبات وسمعت قصص عرائس عن معاناة التسريحة وكيف ينحوها، وبصراحة عن نفسي نفضل التسريحة اللي تبين ملامح الأنوثة عند المرأة واللي هي الشعر المسدول، هذا من جهة ومن جهة ثانية كانت سبلة باش نغطي أكبر قدر من الظهر لأن الفستان حتشوفوه في الصور كيف، و متعودتش على هكي وبصراحة منبيش لقطة اللي في عرسها تلبس فستان غير محترم هلبة، يعني حاولي يكون محترم قدر الممكن في حدود الجمال والأناقة والأهم النعومة.
التسريحة اللي في بالي كانت شعر مسدول فشقلبت موقعين متأكدة أني حنلقى فيهم اللي نبيه، انستاجرام وبنترست هذو كنز من الافكار وبالفعل شقلبت وشقلبت وفي الاخير وصلت لفكرة شعر مسدول ووردة عالجنب زي الصور هذي.



وأكثر واحدة عجبتني كانت التسريحة هذي.


وتوة السؤال الأهم كيف حنتصرف يوم العرس؟ نمشي للمزين تديرلي شعري بعدين نروح جري للحوش باش نحط الماكياج ونبدل أو ندير شعري في البيت؟ لكن أصلا من حيفضى بيا، فكرت نديره بروحي لكن على من الكذب مش وقت توتر وفلاحة زايدة وحوسة، من هنا وهنا صاحبتي قالتلي عن بنات يجو للبيت يديرو في تسريحات وماكياج، ولعت اللامبة فوق راسي قصقصت من الشعب لو فيه واحدة بتجي للبيت باش ننحي من بالي فكرة المشي للمزين كليا، وفعلا لقيت واحدة ممتازة جت للبيت  وقعدنا بمزاجنا أنا وخواتي وجتنا هي عالموعد وكانت خدماتها سريعة وممتازة، دارتلي شعري ولما كملت وروحت كل واحدة كانت لاهية في روحها وأنا خذيت العدة وسكرت على روحي في أكثر مكان فيه إضاءة طبيعية في البيت وبديت مرحلة الماكياج.

بالنسبة للتسريحة طبعا كانت تبي اكسسوار اللي هو الوردة، من وين بنجيب وردة كويسة وحلوة (لأني شخص ميعحباش العجب)، ولانه معنديش فيزا كارد باش نشري وبصراحة التكلفة حتكون عالية على خاطر وردة تلتبس كم ساعة وتتنحي وفوقها مصاريف الشحن لهذا فتت الفكرة وقررت نصنعها بروحي!! شقلبت اليوتيوب والنت وفعلا لقيت نساوين يصنعوا في توكات ورد، لكن بعد كم فيديو حسيت روحي نبالغ في المغامرة، وبعدين اتخذت القرار النهائي، التوكة حنديرها بوردة طبيعية!!! تاداااااااااا

مشيت لمحل ورد قبل العرس بثلاث ايام، سألت عالاسعار وكانت الوردة بدينارين، سألته كم تلزمني وردة لباقة عروس قالي زي هذي (وراني باقة) عدينا كم فيها تقريبيا طلعوا عشرين وكان المقاس ممتاز بالنسبة لي، قلتله يزيد عليهم وردتين ومنبيهمش مفتوحات هلبة باش يتحملوا، وبصراحة الورد الطبيعي أحلى، خلصت عربون وأعطيت الوصل لبنت خالي جابتلي الورد يوم الحفلة، حطيته في مزهرية وكان عندي أشرطة هدايا (حشيشتي تغليف الهدايا لهذا عندي هلبة خمنتش زي هذا، ومعها مسدس اللصقة) شرحت لبنت خالي شن نبي، قلتلها تلم الورد مع بعضه، تشده بخيط الاول بعدين تلف عليه الشريط أو المسطرو وتقص الزايد وتلصقه، بس!! بكل بساطة كلفتني الباقية 40 دينار نياهاهاهااها وجهزناها يوم العرس، لأني كنت عارفة روحي مسافرة والموضوع مش مستاهل نوصي على باقة و نحرق دمي بعدين ما عندي وين نحطها!! وهذي صورة الباقة بعدما تشحطت في ليلة عرس هههههه، متنخلعوش المهم قبل الحفلة كيف كانت :D


بالنسبة للوردة اللي في اكسسوار الشعر قبلما نمشوا للصالة بالضبط، وكلنا كنا لابسين وواتيين طلعت مشبك شعر غرقاته بنت خالي  في اللصقة متع المسدس وقبلما تجف ثبتت عليها الوردة بعدما نحيت العرف متعها، لكن حطيتها على شعري لما وصلنا الصالة باش متبهدلش في الطريق بسبب الكاب (والله الأمور بسيطة بس نحنا اللي معقدين حياتنا).
هذا شكل المشبك بعدما روحت، الوردة خلاص معاش عندها حيل تشد روحها، بس المهم تحملت الحفلة.


الماكياج:

من زمان كلما نشوف عروس نقول كان سخر ربي وصار مني وتزوجت هل حنخلي مزينة تلبزني زيما يلبزوا في هلبة عرايس ويخلوا فيهم وجههم أبيض زي المهرج؟؟ المرة اللي قررت فيها قرار نهائي أن مكياج عرسي حنديره بروحي كان في عرس صاحبتي، الماكياج لغى كليا جمالها الحقيقي والمزينة تعاملت معها كأنها لوحة رسم بيضاء ولازم تخفي أي معلم من معالم وجهها الحقيقي ورسمت كل شئ من الصفر، يومها وانا نسلم على صاحبتي ونشوف في تشققات الماكياج، قعدت نفكر زعما شن حيكون شعور زوجها في أهم لحظة لما يكون قريب منها وتكون أول نظرة بينهم عن قرب ؟؟ نعم من 2010 اتخذت القرار هذا وتم حسم الأمر.

لما سخر ربي وتمت الخطوبة بديت في المخطط وجمع المعلومات، تذكرت أني زمان شفت فيديوات لواحدة اجنبية كانت تعلم في كيف نحطو ماكياج، ودارت مرة مكياج عروس هندية كنت مقررة نديره هو، لكن لما سخر ربي وخشيت عاليوتيوب بعد غياب عن متابعة فيديوات المكياج اكتشفت ان المنافسة قوية هلبة بين البنات عالنت، ومنها شلقبت هلبة فيديوات لعندما لقيت اللي يعجبني، لكن الحق مع الوقت كل مرة نتفرج على واحدة وناخذ في نصائحها، ونزيد فيها على اللي نبي نديره، استقريت في النهاية على فيديو واحد وهو اللي طبقته حرفيا في العرس.

فيه حاجة عجبتني في مكياج الأجنبيات وهي واقعيتهم فيه، أغلبهم يستعملوا في الألوان والدرجات الترابية اللي تعتبر تدرجات لون البشرة، هذا تفكير منطقي لأنه زيما قلتلكم الماكياج هو إبراز جمال المرأة مش تلوين بألوان قوس قزح وحاجات غريبة عجيبة، أغلب نصائحهم حنحطها في النقاط هذي:

1- الماكياج حاولي تخليه مناسب ولا ينتمي لأي موضة باش لما تشوفي صورك بعد سنين متقوليش خيره ذوقي كان شلافطي زمان؟؟ اعتقد أغلبكم يعرف موضة رسم الشفاه زمان بالقلم الداكن والروج فاتح والمنظر كيف كان عبيييييييييط!!
2-  ابعدي عن الألوان القوية والأسود قدر الامكان، عن نفسي ديما نفكر في شعور الرجل لما تنحي الماكياج، تخيلي تكوني حاطة مكياج اسود قوي وفجأة تنحيه، حتباني كأنك مريضة!!
3- تغذية البشرة والعناية بها أساس الماكياج الممتاز، لما البشرة تكون رطبة وصحية الماكياج حيبان حلو، لكن لو جافة ومتبهدلة حتعاني شوية من الموضوع هذا.

الفيديوات اللي تعلمت منها وتابعتها فيما يخص مكياج العرس هما:
الفيديو الأول للمبدعة كلوي موروللو: خفيف هلبة لين بيخ لكن لقيت أحسن منه



وهذا أعجبني داراته واحدة اسمها سونا، دارت المكياج على صديقة حتى هي عندها قناة مكياج عاليوتيوب.


الفيديو هذا ممتاز و يعكس هلبة حاجات من ذوقي وتناسبني، تقدروا تقولي شبه حفظته هههههه ننصح جدا بمتابعته :)



هذي منتابعش فيها لكن تفرجت على الفيديو متعها وكان مفيد، فيديو مشترك بينها و بين صديقة كل واحدة دارت فيديو مكياج العرس.



 الفيديو هذا ميزته نعومة ألوانه وهذا أكثر شى عجبني في الاجنبيات، البساطة، وبالله ركزوا في جمال العيون كيف بان مع ألوان خفيفة جدا.



وهذا هو المكياج اللي عجبني واستقريت عليه وقعدت نتدرب عليه فترة قبل العرس، وشريت أغلب الحاجات اللي استعملتهم، وبالمرة اعتبرت أن هذا هو المكياج اللي نبي نشريه. يعني استغليت الفيديو باش نعرف شن ناخذ لروحي من مكياج، ومن باب البرود أختي مرعشتني باش نوتي روحي بسرعة ونمشي معهم للصالة مع بعض لأنه مفيش من يقعد معي وزوجها يبي يتفرج عالمباراة هههههههه يعني من الأخير سقدي روحك واطلعي لهذا مقدرتش نحط كمية لا بأس بها من الرموش لأني اخترت نحطهم بالرمش باش يبانوا واقعيين أكثر، وعادي مشت الأمور من غيرما نحط الكمية اللي كنت مخططة لها!!


وهذي جلسة الماكياج يوم الفرح، نشرت الصورة لايف على انستاجرام لما بديت يوم الحفلة :)


وهذي صورة الاستعداد للماكياج في الحفلة الثانية :)


فستان الفرح:
فستان الفرح كان فيه مواصفات معينة لازم تتوفر فيه أولها البساطة والنعومة والرقي وأهم شئ مريح في الحركة، مش كلما نتحرك يكون فيه حد وراي يكر معي أو مش قادرة نمشي طبيعي لأن الفستان معقد، وأكره ما عندي القونة اللي من تحت اللي تنفخ فيه، قصدي مش حلوة حاجة تزوير للحقائق ههههه يا ينتفخ بالقماش والتول يا بلاش، ولأن حالتي خاصة  جدا لأني حندير حفلتين فالبساطة كان لها الأولوية.

دورت هلبة وفكرت نخيط وفي الأخير قررت ندور عالنت، شقلبت هلللللبة مواقع لعندما لقيت اللي عجبني، بسيط هللللبة لكن أنيق جدا وقماشته ممتازة، سعره كان غالي فقعدت نتابع فيه وفجأة مع نهاية 2014 بدت التخفيضات لتصفية البضاعة، فالموقع في البداية دار تخفيضات 20% مازال غالي فته، بعدين بعد فترة لقيتهم داروا تخفيض 50% فته، لأني كنت مشتركة في اخبار الموقع فكانت إعلانات التخفيضات توصلني أول بأول، وفجأة في أخر اسبوعين من السنة داروا تخفيض 70% وهنا كان لازم نتحرك، وفعلا درت كل جهودي باش نشريه، اونلاين منشراش وفي الاخير وصيت معرفة مشيتهم للمحل غادي باش يشروه ولحقوا على آخر واحد مقاسي والحمد لله، و خذيت معه طرحة طويلة يعني اطول بشوية، منبيش نكر حاجة وراي، وصل القفطان بالشحن ومشيت نستلمه من ارامكس وقعد القفطان سنة كاملة مركون في الدولاب لأن العرس تأجل هلبة كل مرة يصير ظرف يخلينا نأجلوا.

المرحلة الثانية كانت الحفاظ على مقاسي باش لما يجي وقت العرس منطلعش سمنت أو نقصت فكل فترة نطلعه نقيسته وبناء عليه نعرف وضعي.

القفطان أخذته من موقع مونسون على الانترنت، وأحلى حاجة أنهم بعتوا معه عينة قماش من الفستان نفسه وعينة من الطرحة، الموضوع هذا ساعدني هلللبة لأني كنت نبي نخيط جاكة للفستان، بعدين حنقوللكم علاش نبي الجاكة، المهم لفيت جميع المحلات المعروفة باش نلقى قماش مناسب للفستان وبمستوى قماشه ملقيتش اللي نبيه والاسعار كانت خرافية، فصدفة مشيت مرة لبوسليم وسبحان الله من أول محل نخشله نلقى قماش قريب هلبة واللون نفسه و المتر ب 15 دينار، شريت اللي لازمني وخذيت بزيادة من باب الاحتياط وبديت رحلة البحث عن خياطة واستقريت على مشغل طراز في النوفليين، وكانت أول مرة في حياتي نخيط حاجة ونكون فعلا راضية عن النتيجة و ميعكوليش فيها، وحتى الجاكة قعدت مركونة في الدولاب لشهووور هههههههه.





جو ههههههه كلما نتذكر روحي ومن وين جبت الجرأة هذي نستغرب وفي نفس الوقت نحس بالسعادة لأن النتيجة كانت ممتازة بشهادة الجميع، الكل فهموا أني كنت نقصد البساطة في اللي درته و هذا اللي وصللهم فعلا والحمد لله، وكانت الاراء اللي وصلتني كلها شخصيا أو عن عن شخص بالإعجاب حتى اللي يخدموا في الصالة قالوا بروحهم "دارت اللي في راسها" :) .. الحمد لله

الفستان أخذته بسيط لأني كان عندي حفلتين للعرس، واحدة في ليبيا نسائية والثانية في مصر مختلطة، لأن زوجي وأهله من أيام جدهم وهم عايشين في مصر، لهذا عندهم أقارب وأصدقاء غادي، فكان لازم نتقبل الفكرة، في البداية كانت صعبة لكن لما لقيت فستان الفرح اللي يناسب المناسبة هذي أصبح الموضوع مريح جدا بالنسبة لي.

فصلت جاكة للفستان أنيقة وبسيطة جدا، قبلها شقلبت النت على تصاميم وأفكار وجمعت هلبة ودورت حتى على الخياطات في طرابلس لأني متعقدة منهم وتجاربي في الماضي كلها تعيسة، مش متذكرة من قالي على مشغل طراز أنهم خيطولها فستان الفرح وبعتتلي صورة للفستان وشكرتهم هلبة، وفعلا مشيتلهم في مقرهم في النوفليين وأخذت معي صور للأفكار وأخذت الفستان، لكن الخياطة كان لها نظرة مختلفة واقترحت عليا فكرة مختلفة وعجبتني وفعلا التنفيذ كان حلو ومريحة جدا في اللبس، ومرت ترامب خنبت مني الفكرة لما زوجها استلم منصبه كرئيس في الجاكت متعها ههههههه باش تعرفوا بس.


طبعا اللمسة المصرية التعيسة كان لازم تفرض روحها في المشهد، مكانش فيه في البيت مكواة بخار فاضطريت نبعت الفستان لمغسلة على أساس تكوي بالبخار، جي واحد للبيت وأخذ فستاني وبدلة زوجي، ورجعهم في نايلو ما اكتشفتش أنه شوه الفستان الا لما لبسته، لو تلاحظوا في الصور الاولى الفستان عنده ثنيات من قدام، العبيط اللي كوى الفستان زاد ثنية منه ليه و شوه المنظر وطلعه متشرد جدا، ومن تلك اللحظة فقدت ثقتي كليا في الحصول على أي خدمات على أي مستوى هنا، بس نعتبرها عين وطارت وخلاص!!


حذاء العروس:
بالنسبة للكندرة مكنتش نبي كندرة بكعب عالي لأنها حتتعبني وتخليني نمشي زي الانسان الالي، نبي حاجة مريحة باش نتحرك براحتي، نطلع الدرج وننزل براحتي، نركب السيارة من غير تشحوير، فاخترتها من محل الفصول الأربعة في شارع الجمهورية خلف قصر الملك، هو محلي المفضل وخذيت لونها ذهبي أنيق مش بقاصي، على أساس بنلبسها أكثر من مرة وهذي من أهم النصائح لما تشري كندرة العرس، اشري حاجة تستفيدي بيها مستقبلا.


العطر:
قصته مضحكة، مرة شريت حاجة اونلاين، فلما وصلتني بعتولي معها عينة عطور من ضمنها عطر Si وأول ما شميته عيوني ولوا قلوب قلوب، وقررت أن هذا هو عطر العرس، وفعلا قعدت نقصقص وين نلقى عطور أصلية مضمونة فالغالبية نصحني بدبنهامز، وشريت العطر بالشئ الفلاني، ودسيته لعندما ربي يسخر ويتحدد موعد للعرس، للأسف العطر انتشر هلبة لين بيخ، ولما جي وقت العرس أختي رفضت أني نحطه ونصحتني نشوف عطر ثاني من كثرما ضاعت هيبة عطر Si لأن البنات يحطوا فيه في كل طبيخة حتى وهما ماشيين للدوام مع أنه قوي ومتع سهرات!! وفعلا دورت وشقلبت واستقريت على عطر Dolce اللي فعلا كان تحفة، خذيت ست كامل وست ثاني هدية لأخت زوجي، و الحمد لله طلع خاطرها فيه من الأول، وأحلى شئ أن زوجي عجبه العطر ومرة بخيت Si شرق قعد يكح معجباش بكل ههههههه ربي ستر وغيرته في اخر لحظة.


الطرحة:
الاشارب اللي لبسته في حفلة مصر دورت هلبة في طرابلس وملقيتش حاجة مناسبة في الأخير وصيت أخت زوجي وجابتهولي مناسب جدا زيما وصيتها. والطرحة حتى الطرحة من مونسون لكن ملقتلهاش صورة واضحة عالنت للأسف، المهم خذيتها طويلة شوية با دوب توصل للأرض باش تريحني في الحركة ونستعملها في الطرحة زي لفة الوشاح وخليت الباقي ينزل بروحه.


بالنسبة للبدلة الكبيرة والصغيرة والجو هذا كله فته ومعدلتش عليه، أولا مصاريف زايدة وانا من أنصار أن الواحد ميكثرش على العريس، نشوف فيهم كماليات زايدة جدا، مدرتش سهرية ولا قفة ولا الجو هذا كله، مدرتش حنة لأني كنت عابية صاحبتي تتدرب عليا وتزخرفلي حنة لكن خوها فاتها ممشاش باش يوصلها ههههههه افتكيت من الحنة لأني منحبهاش، درنا سهرية للنساوين اللي ميجوش للصالات فعزمناهم على عشاء في البيت، وثاني يوم كان الحفلة في قاعة الملكة، والعشاء كله من موزارت لأن العرس تحدد في زمن ضيق وكان كل شئ عالسريع، البكلاوة من معازيم وكل باقي الضيافة من موزارت باش نريح بالي لأنهم هما اللي يوصلوا الاكل للصالة وهما اللي يوتوها في الاطباق فهذا ريحني هلبة، القهوة من الصالة وتصدقوا حتى السيارة مفكرتش فيها ولا عدلت، خالي وصلنا للصالة وزوجي من عنده زبطوا السيارة.

لما جوا أهل زوجي أول مرة باش يخطبوا زوجي كان متوقع قائمة طلبات من أبي، لكن أبي مقالش أي كلمة والكلمة الوحيدة اللي قالها له خلال القعدة، هي خيرك ساكت؟ هههههههه كانت القعدة كلها رجالة كبار وهو الصغيرون بينهم.

موضوع زواجي كان صعب بالنسبة لأبي لأني أمازيغية وزوجي مصراتي، كبيرة هلبة عندنا لما البنت تطلع برا العيلة فما بالك أنها تتزوج مش امازيغي مرة واحدة، استغرق الموضوع شهر باش رد أبي على زوجي باش يجوا أهله لخطوبة رسمية، وليوم العرس وأبي متوتر ومش قادر يشد دموعه.

خلاصة كلامي حبيباتي، يسروا ولا تعسروا، واختاروا الرجل المحترم اللي يخاف عليكي، اللي يحترمك ويقدرك، اللي أخلاقه عالية ويعرف حدود الله. وإن شاء الله ربي يهني كل بنت و يرزقها الزوج الصالح.

وأهم شئ بسطوا الامور في فرحكم متغالوش في التفاصيل، عيشوا كل لحظة، وخليكم بسيطين والله راحة البال حلوة و التوتر مش وقته بكل.

محبتي ♥♥
سمر