سلسلة ماكياج العروس - مقدمة

by - الخميس, نوفمبر 12, 2015


بناء على طلب أكثر من متابعة للمدونة ممن راسلوني على الصفحة وسؤالهم عن الحاجات اللي المفروض يشروها من ماكياج العروس، قررت نبدا سلسلة من المواضيع وكل مرة نشد قسم معين لعندما نكملوا الاساسيات اللي يفضل تكون مع العروس أو مع أي بنت أو سيدة تبي تشري ماكياج متكامل بالأساسيات، ولو حبت تزيد بعدين تقدر تنوع وتنتقل للثانويات او الإضافات.
المقالة هذي حنكتب فيها قائمة بالحاجات اللي ننصح تشريها، واللي حيصدف انك تحتاجيها، وبعدها حنبدأ سلسلة مقالات كل مرة نتكلم عن حاجة منهم بالتفصيل، النصائح والحاجات اللي تعلمتهم بخصوص كل حاجة، شن البدائل عن كل حاجة منها وكم استخدام تقدري تستخدميهم من غير الاستخدام اللي هي صنعت لأجله.
السلسلة هذي حتكون عن الماكياج فقط وبعدها نخشوا في باقي الاحتياجات فيما يتعلق بالماكياج، لكن نخلو الموضوع خطوة خطوة أحسن للاستيعاب وكثرة المعلومات مرة واحد تخلي الواحد يدوخ.

أنا في العادة لما نحط ماكياج نبدأ بالعيون وبعدها نحط البرايمير وننتقل للوجه، وعلى هذا الأساس حيكون التسلسل.

3- ماسكارا Mascara
4- جل لاينر لرسمة العين Gel Eyeliner
5- اللي يثني في الرموش :D (ملقيتش ترجمة قريبة - اختياري جدا) Lash Curler
6- الرموش الصناعية واللصقة متعها (اختياري لو رموشك غزيرة وطويلة أو متوسطة نصيحة فوتيهم لأنه عندك كنززز).
7- قلم العين Eye Pencil
8- قلم الحواجب Brow Pencil
9- البرايمر الخاص بالوجه Primer
10- كريم الأساس Foundation
11- الكونسيلر Concealer
12- البودرة Powder
13- أحمر الخدود Blush
14- الهايلايت (الإضاءة) Highlight
15- قلم الشفاه Lip Pencil
16- أرواج (أحمر الشفاه) Lipstick
17- ملمع الشفاه Lip Gloss
18- مثبت الماكياج (اختياري) Setting Spray
19- مزيل ماكياج وقطن للماكياج مع كلينكس معطر Makeup Remover

هذي هي الحاجات اللي تلزمك، مكتبتش كل حاجة حتلزمك في القائمة بالاسم لأن كل واحدة أحيانا تنقسم لعدة حاجات حناخذها بالتفصيل زيما قلت في مقال منفصل.
عندي ملاحظة واحدة مهمة جدا للجميع، اللي حنتكلم عنهم حتلقوهم هنا من ناحية الوصف واللون والهدف منها، أنا حالة خاصة، ضاربني الوسواس هذا علاش خذيت من بره ومبيتش ناخذ حاجة مش ضامنة أنها أصلية أو لا، لأني مريت بتجارب سابقة من محلات ادعت وكسبت شهرة على أن بضاعتها أصلية لكن للأسف، حتقولولي لكن فيه انجلوت هنا، انجلوت سمعت بيه مؤخرا الحق، أو اهتميت بزيارته لما عرفت أنه وكيل شركة فنلندية تقريبا، لكن في ذات الوقت أغلب الالوان اللي شريتها خذيتها بناء على هلبة بنات نتابع فيهم عاليوتيوب ولأن كل لون له اسمه وعجبني فقررت ناخذه، والغالبية منهم خذيتها على خاطر هي اللي استعملوها في ماكياج العرس لأني زيما قلتلكم نبي نديره بروحي، لهذا متربطيش روحك أبدا بأنه لازم تاخذي من برا أو نفس اللي عندي، بالعكس حنوريكم الحاجات اللي خذيتها وندير جهدي نقربها من البضاعة الموجودة هنا قدر الامكان باش نسهل عليكم المهمة.
في المدونة هذي نقدم في نصائح مش ندير جو شوفوا شن شريت شوفوا شن خذيت، كل شئ فيها لسبب وعنده وجهة نظر حنوضحها ديما.
حاجة ثانية اعذروني فيها وهي أني ديما نحط في روابط فيديوات بالانجليزي، الهدف منه بالنسبة لي أنه كلما سمعت للانجليزي كلما حسنت لغتي أكثر، وكلما بعدت عنها كلما نسيت هلبة كلمات وغيره، فديما نتابع في الأجانب أكثر، زد على هذا ذوقهم أبسط من العرب بصراحة، العرب زحمة ماكياجهم هلبة أنا ذوقي يميل للبساطة، ولما نحط فيديوات للاجانب السبب ان طريقتهم تعجبني أكثر ولأن في المدونة قلتلكم حنوريكم اللي تعلمته وكيف تعلمته، لهذا نحط في روابط للأجانب لاني تعلمت منهم.

محبتي ،،
سمر 

#bride #makeup #advices #نصائح #العروس #قهوة_سمر

You May Also Like

4 تعليقات

  1. السلام عليكم
    مشكوره وبارك الله فيك ع الافاده بالمعلومات وخاصة لما تكون بعد خبره وتجربه شخصية .. وعندي هلبا استفسارات بس راح نستنى الموضوع بلكي نلقى اجابة ..واني عن نفسي ماعنديش مشكله حتى لو كانت الفيديوات بالانجليزي لان انجليزيتي كويسه ونقدر نفهم ممكن نواجه شويه مصاعب ف فهم بعض المصطلحات الخاصة بالمكياج بس راح نسئلك عليها ..
    بالتوفيق وان شاء الله تطلعي ف عرسك زي ماتتمني وربي يهنيك ان شاء الله ... لكن كيف بتديري ف التسريحه او تعرفي اتديري بروحك او فيه حد بيساعدك !؟
    black lily

    ردحذف
    الردود
    1. تسلمي يا رب، هو يعتبر تدريب حتى أنا لغتي هي اللي تعلمناها في المدرسة مع افلام ومسلسلات أجنبية هذا هو، خشيت كورس ومكملتش مستوى واحد (مليت) :D
      بالنسبة للعرس مازال التسريحة اللي في بالي مجربتهاش، لكن حتكون حاجة بسيطة جدا تعبر عن شخصيتي، وتبرز الأنوثة الناعمة، إن شاء الله لما ربي يسخر ويتحدد موعد حنكتب لكم كل التفاصيل بعدما نجربها على أرض الواقع، هل طريقتي نفعت أو المزينات أحسن.

      حذف
  2. أكثر أي لاينر ننصح بيه وينصح بيه الجميع وعن تجربة شخصية هو الأروع من إنجلوت، ومؤخرا بديت نستخدم في البرايمر واكتشفت انه مهم جداً والأفضل هو من Collistar

    ردحذف
    الردود
    1. فعلا ، متع انجلوت هلبة يشكروا فيه وشفت من استعمله ودرجة سواده ممتازة جدا ،، من ناحية البرايمر فيه هلبة أنواع وميقدرش الواحد يفضل نوع عن الثاني من غير تجربتهم جيمعا، لكن لكل نوع مميزات وحتى البشرة تحكم في الموضوع.

      حذف