الكروشيه من زمان خاطري نتعلمه لكن كنت نحسه صعب، لهذا علمت ندير اللانة بالفيرو (مش عارفة شن يسموا فيها بالفصحى لكن زوز عيدان يديروا بيهم الصوف!)، الصيف اللي فات يعني من كم شهر كنت مكسدة وصاحبتي عالفيس كانت تدير في الكروشيه وتورينا، عجبني هلبة الموضوع، بالذات لما نشوف فيها تصنع طواقي وبطانية لولدها تشجعت، وحتى هي شجعتني، ضافتني لجروب أجنبي خاص بالكروشيه، النساوين يخدموا في حاجات ولما يكملوا يعرضوا فيهم، المنافسة كانت ممتعة جدا، وكل فترة تطلع طهقة جديدة تلقيهم كلهم داروها، عجبتني الفكرة فمشيت لمحل دازة في شارع الجمهورية، أخذت كم لون وعيدان الطي (مش عارفة شن يقولوهم بالفصحى أو العامية) روحت وخشيت على عمي اليوتيوب وعينك ما تشوف إلا النور، هلبة قنوات نساوين ورجالة من عشاق الكروشيه يشرحوا بالفيديوات وبالتفصيل الأكثر من ممل، يعني مستحيل مستحيل مش حتتعلمي منهم، المفروض الواحد يولي محترف.

أول فيديو تعلمت منه كان من قناة عاليوتيوب لسيدة اسمها ناستازيا وحطت زوز فيديوات لمبادئ الكروشيه، واللي هما السلسلة والغرزة الفردية والزوجية والثلاثية وكيف تسكري الشغل.

المميز هلبة أنها دارت زوز فديوات شرحت فيه الاساسيات وزيهم بنفس الفكرة لكن للي يستعملوا في اليد اليسرى، يعني معندكمش عذر حتتعلموه يعني حتتعلموه :D

نصيحة: نزلوا الفيديوات من اليوتيوب لأنه في البداية حتحتاجوا هلبة أنكم تتفرجوا عالفيديو تعاودوه مائة مرة باش تزبطوا الفكرة كيف وكيف دارت هكي الخ الخ.. لو عندك موبايل شاشته واسعة ايباد أو أي جهاز لوحي حيسهل عليك الموضوع أو لابتوب، هذي الحاجات مهمة باش تتعلمي عليها الكروشيه (الطيّ).

 هذي الأساسيات لكن بعدها لازمك مشروع تخدمي عليه باش تعودي ايدك على مسكة القصبة متع الطيّ، وكيف تزبطي بداية سطر الغرزات من نهايته وهكذا، يلزمك مشروع عبارة عن تكرار نفس الغرزة في عملية روتينية، حتحسابي الموضوع ممل، أبدا لأنك في المرة الأولى حتغلطي هلبة وتديري شوط بعدين لما تشوفي شغلك تلقي عندك غلطة فتقضيه كله وتعاودي وهكذا، صارت معي وبعدها بدت تتسرح الأمور ونفهم في الكروشيه ومع الوقت بديت نقرا الرموز متعهم من غيرما نضطر نحضر فيديو ونطبق وراه، بس مازال فيه رموز منفهمش فيهم ومازال نتعلم.

المشروع اللي تعلمته بعدما تعلمت الأساسيات في الفيديو هذا، البنت دارت غلاف للكمبيوتر متعها، تقدري تديري غلاف للموبايل ايباد أو حتى كتاب أو هندسة بنتك أو تزدان للأدوات للصغار وهكذا، هذي ميزة الكروشيه لما تشوفي فكرة حتجيك كمشة أفكار مشابهة وهنا يجي الإبداع.


ملاحظة مهمة: 
لما تمشي تشري لانة والعصا متع الطي باش تتعلمي متنبهريش هلبة باللي في المحل وتشري كل شئ، انتي توة تبي تتعلمي لهذا ننصحك جدا تاخذي عصا مقاسها 4 أو 4.5 أو 3 أو 3.5 المهم في الحدود هذي، ولما تشري لانة (الصوف) اشري الغليظة وحتلقي على ورقتها مكتوب أي مقاس عصا يناسبها، ليش؟ لأنك في البداية أكثر حاجة حتتدربي عليها هي كيف تشدي الخيط والعصا متع الطي وتسيطري عليها ما بينما تخدمي في الغرزات، لهذا بشويش لا تتسرعي، لما تحسي روحك سيطرتي عالموضوع وقتها نوعي في الخامات وأبدعي لبيتك ولكل من تحبيهم :)
هذي صورة لعيدان الطي اللي عندي، مازال فيه مقاسات هلبة وعالم ثاني خالص :)

أنصحك  جدا تتابعي مجموعات الفيسبوك اللي فيها تجمعات كبيرة من السيدات وكل واحدة تقعد تعرض في أعمالها، الشئ هذا حيزيد من إلهامك و الأفكار والحافز باش تكملي وتديري حاجات.

نتابع في عدة مجموعات بين العربية والأجنبية، وهما:

1- حصة أم مجد للكروشيه
2- CROCHET ADDICT
3- OFFICIAL CCC SOCIAL GROUP
4- Aslan Design

ولو تبي تشوفوا إبداعات الكروشيه تقدروا تتابعوا حسابي على موقع Pinterst نجمع في هلبة أفكار نبي نديرها إن شاء الله والبعض منها نخزن فيهم من باب الإلهام.
أكثر واحدة مبدعة جدا جدا نتابع في إبداعاتها اسمها ديدري Dedri عندها مدونة تصمم في تصاميم وتخدم فيهم و تنزل في تحف فنية الصورة هذي واحدة منهم، مؤخرا من فترة لابأس بها دارت فكرة بطانية اسمها عالم صوفي، هذي هدفي أني نديرها لكن الحق نأجل فيها لين نشري صوف نسبة القطن فيه عالية، لأني نبي نديرها حاجة على مستوى، الصورة هذي لبطانية ثانية دارتها والاثنين طريقة تنفيذهم على مدونتها اللي اسمها "شوف شن صنعت|" Look What I Made


الموقع الرسمي اللي يعتبر مركز تجمع التصاميم (Pattern) سواء المجانية أو اللي بفلوس هو www.ravelry.com

على فكرة تقدروا تصنعوا حاجات ولا تتوقعوها بالكرويشه والصور هذي باش تشجعكم أكثر للموضوع :)

محبتي ،،
سمر

لا تنسي تشاركي الموضوع مع صديقاتك :)

بداية خلونا نهدرزوا على منطقة ما تحت اليدين، وبناء على ذلك حنعرفوا كيف نديرولها حل، أول شئ المنطقة هذي مغمومة و لا تشوف الهواء ولا الشمس، يعني بيئة ممتازة للبكتيريا وغيرها من مشاكل.

ثاني شئ عدم الاهتمام بها وتعرضها كل مرة لمادة مختلفة عن الثانية منطقيا حتتأثر المنطقة هذي وزيدي على هذا استخدام شفرة الحلاقة ممكن يخدش الجلد ومع الوقت البشرة غادي حتتأثر ويتغير لونها وملمسها.

إيه حتى الملمس يتغير، ممكن بحكم أن الواحد مش ديما يتابع في نفسه لهذا ملحقش يميز أن حالة البشرة تحت الإبط تتأثر حتى هي، وتوة خلونا نتكلموا عن طريقتي في الاهتمام بها.

 ليا أكثر من سنة موقفة استخدامي للمزيلات الصناعية، الحق معنديش مشكلة من الموضوع هذا لكن لاحظت تغير بسيط لما درت نظام خاص بيا، أول شئ لو تقدري وقفي استخدام مزيل الرائحة الصناعي واستعملي حاجة طبيعية وأغلبنا يعرف الشبّ، عالأقل منتج طبيعي تضمني بيه سلامتك من الناحية الشكلية ومن الناحية الصحية لأنه حتى من نصائح الوقاية من سرطان الثدي حماكم الله جميعا الابتعاد عن مثل هذه المواد الكيماوية بالذات، واللي لتوة مش فاهمة كيف فيه ناس يستعملوا فيه وهو مزيل العرق!! يعني فيه ناس تبي تحبس العرق داخل جسمها (العرق عبارة عن وسخ الجسم قاعد يصفي فيه) لكن فيه ناس متبيش يطلع!!

العرق حاجة طبيعية وحتى لو كان يحطك في مواقف بايخة عادي طالما من غير ريحة، لكن الخروج عن نظام الجسم فهذي بصراحة جريمة.

أنا نستعمل في منتج طبيعي الحق نوصّي عليه من برا، لكن لو يهمكم تقدروا تستعملوه علما بأنه يومي، واكتشفت منتج ثاني طبيعي مائة في المائة ويعمل كمزيل لرائحة العرق وهو الليمون الحامض (الليم القارص) أنا نعصر نص ليمونة ونحطها في شيشة صغيرة ونخليها في الثلاثجة، لما نكون عارفة روحي مش طالعة من البيت نستعمله كمزيل وجديات فعلا مزيل رائحة ممتاز، ننصحك تعطيه تجربة في يوم عندك أشغال شاقة في البيت أعطيه فرصة للتجربة باش تعرفي قداش يتحمل.

ثاني شئ لما ترقدي بالذات في الصيف، الشتي ممكن صقع البعض مش حيتحملوا ارقدي ببيجاما من غير كمّ، باش تتهوي شوية :D  أغلبنا مازال لبسنا محترم قدام آبائنا وخوتنا الشباب، لهذا الفرصة الوحيدة لما نتمرقدوا :D 

وتوة نقوللكم طريقتي واللي لقيتها في بعض قنوات اليوتيوب وكانت منطقية وعجبتني هلبة ومشيت عليها،، 

أول حاجة وهي أن الطبقة الميتة لازم تتنحى وباش تتنحى نحتاجوا نديرولها عملية تقشير أو فرك (Scrub) ، التقشير لازم يكون لطيف لأن البشرة رقيقة والطريقة اللي عجبتني هي أنك تاخذي بيكربونات الصوديوم تحطي عليها كم قطرة مية، ولما تدوشي وتبللي تحت ايديك تديري تقشير بالبودرة متع بيكربونات الصوديوم، تحركي ايديك في حركة دائرية باش البيكربونات تدير شغلها. 

حتسألوني ليش بيكربونات الصوديوم؟ علميا او كيميائيا منعرفش لكن شكليا يعني حسب شعوري اللي استنتجته، أنه لو بتديري تقشير بالسكر أو الملح ملمسهم أحرش ويستخدموا لتقشير الجسم، لكن لأن الابطين جلدها حساس فبيكربونات الصوديوم مازال أنعم منهم وأريح، وحتلاحظي الفرق في أنها فعلا نظفت، مرة ورا مرة حتلاحظي أن اللون يتغير لأن البشرة الميتة الداكنة بدت تتنحى. لكن متكونيش قاسية هلبة عالجلد ديري مساج بيها بلطف لأنك لما تكملي الشاور أو الاستحمام حتدهني المنطقة بالليم القارص بس ( ولو جرحتي روحك أو خبشتي بشرتك الليم القارص يحرق هلبة )، وبعدما تدهني بيه خليه شوية يجف، متلبسيش حوايجك على طول باش ميمسحوش اللي درتيه!


نصيحة ثالثة بالذات في الصيف وهي حاولي تلبسي حوايج كمها واسع ومتخنقيش جسمك بحوايج لاصقة بالذات منطقة الابطين، خليها تتنفس هي من غير شئ مغمومة!

والأهم من هذا كله هو الاستحمام اليومي، هذي أهم حاجة في الموضوع، وبالنسبة لليمون القارص الشيشة متخليهاش تطول أكثر من خمس أيام، منعرفش لو فيه سبب علمي لكن أعتقد أن صلاحية الليمون ممكن تكون انتهت لهذا نص ليمة كل مرة يفي بالغرض.

والنصيحة المتعارف عليها أن العناية الطبيعية بالطرق هذي تبي وسعة بال، متتوقعيش نتائج من أول أو ثاني يوم هذي حاجة مستحيلة، واللي تقولك عندي كريم تبييض فوري على من تكذب؟؟!! أصلا كلمة تبييض قداش تستفز فيا، كيف يعني بتديري عملية للجلد وبتسحبي منه صبغة الميلانين باش تولي بيضاء زي الحليب، الاستخفاف بعقول الناس راهو مش كويس!

نسيت حاجة لما تنحي الشعر في المنطقة هذي بعده ادهني بعصير الليمون، معقم ويحمي المنطقة ويمنعها من التأثر، نصحتني قريبتي بيها من زمان والأمور تحت السيطرة :D 

وانتو شن الطرق اللي تستعملوا فيها، نستنى في آرائكم في التعليقات :)

محبتي ،،

سمر 

Like & Share 

#samars_coffee #قهوة_سمر #أنا_أدون

مسك العروس، في فترة ما انتشر هلبة على الفيس بوك والوصف اللي صار حوله أنه يدوخ ووصف خيالي للمنتج والي خلاني بصراحة نشك في الموضوع، فمشيت لمحل عبد الصمد القرشي باش نسأل ونكتشف الموضوع بنفسي.

لقيت عنده نوع واحد وقالي من كثر خرافات الفيس اللي فاقت حد المنطق والاسئلة اللي تجيه اضطر يسكر صفحة المحل عالفيس، لدرجة مرة في الليل جاه شبوب يقوله نبي هذاك المسك متع النساوين وصاحب المحل مفهمش فأخذه الشاب معه للشارع إذ  بصاحب المحل ينفجع بعروس في سيارتها بالفيلو وماشية للصالة ولآخر لحظة تلف وتبي تشري مسك العروس السحري!!
 لما حكالي القصة انصدمت وطلبت منه يوريهولي، شفته لونه بني غامق مده ليا باش نشمه والحق اعععععععععععع ريحته مش  حلوة بكل، وقالي أن هذا اسمه مسك الطهارة وتستخدمه المرأة بعد انتهاء فترة الحيض للطهارة، بس بس!!

مؤخرا لما فكرت نكتب المقالة هذي كان لازم ندور على مصادر معلومات موثوقة مش كلام نت ومنتديات و كلهم فالحين غير في كلمة "يدوخ" و "يهبل" و " راجلك بيذوب قدامك" !! لما نقرا كلام زي هذا نبدا متأكدة أن 80% منه بهارات وإضافات على الحقيقة، و بناء على ذلك استمريت في البحث لعندما لقيت المقالة هذي، درت طلة عالمدونة و الحق عجبتني وحسيتها تعتبر مصدر موثوق للمعلومة يعني شخص فعلي على أرض الواقع مش كلام منقول من موقع لموقع، ولقيت بعض المعلومات حول تركيبته وأنواعه من موقع عبد الصمد القرشي وعلى كل نوع شارحين التركيبة ومن شن يتكون في صورة.
المقالة على مدونة قورجس على الرابط هذا

 أنواع المسك اللي تم ذكرهم في المقالة متع مدونة جورجس كالتالي:

1. مسك العود
2. مسك الختام
3. مسك العروس
4. عرق مسك الغزال الأسود (مسك الطهارة). 
5. مسك المكعبات.

بالنسبة لمسك الغزال عن نفسي الحق شارياته من شهوووور وننسى نستعمله، حنخبركم عن رأيي حوله بعد فترة من تجربته إن شاء الله.
أرجو نكون أفدتكم.

محبتي ،،
سمَر

#عبدالصمد_القرشي #مسك_الطهارة #مسك_العروس #أنا_أدون

سنة 2013 كيف بديت نشري من الانترنت، مكنتش مهتمة بالموضوع ومكانش في بالي أصلا الحق، 2013 في هدرزة وتقريبا وقتها كنت نبي نشري طرف للكمبيوتر متعي والطرف هذا مش مضمون نلقاه أصلي في ليبيا، لهذا حد معرفة اقترح عليا الشراء من النت ومنها الشيشمة انفتحت ههههههه.

الشراء من الانترنت مريح جدا جدا وميزته أنك مش مضطرة تلفي وتدوري في الزحمة والحوسة وتقعدي ماشية جاية تتابعي في البضاعة وتستني في التخفيض لو كانت غالية وهكذا، عن نفسي أغلب الحاجات اللي شريتها نشري فيها في موسم التخفيض، إلا لو حاجة خلاص هبلت عليها لأني ملقيتش حاجة زيها ومنبيش نضحي بيها وتضيع عليا وقتها ناخذها بسعرها الحالي، لكن مش ديما ندير في الهبلة هذي، والحق الطلوع هني متعب هلبة وتشحيطه أكثر من فايدته بالذات البضاعة اللي نزلت الصيف هذا و أغلبكم شافها كيف كانت مهزلة وكأن مصنع واحد يخيط فيها خياطة عالسريع المهم يعبي المحلات هذا من غير الألوان بصراحة (البشعة الشعشوعية)، ولو بتمشي للمحلات اللي تجيب بضاعة مختلفة (ماركات) تلقى أسعارها مش منطقية أصلا، هذا من غير مواد التجميل اللي أغلبها هنا مغشوشة (عن تجربة أنا يئست من أني نلقى حاجة أصلية هنا من غير انجلوت) لهذا أغلب مواد التجميل اللي عندي خذيتهم من برا، حتقولوا غالية هلبة، إيه صح غالية لكن مضمونة وبهذا نكون ضمنت سلامة وجهي ومنلعبش فيه بحاجة مجهولة المصدر + بدلما ندفع فلوس على مزينات نهتم بروحي والفلوس هذي نشري بيها مواد تجميل أصلية تقعدلي خير (هذي نظريتي بخصوص الموضوع هذا).

ما علينا، نرجعوا لموضوعنا، أول حاجة باش نشري أونلاين مشيت درت فيزا من مصرف الأمان، أيام ما كانت الفيزا بالشحن من غيرما نضطر ندير حساب غادي، و من بعدها للأسف الموضوع أصبح أصعب.

صارتلي هلبة فلايط في بداية شرائي من النت لأن هلبة حاجات غايبة عني ومكنتش نعرف وشكله كان لازم ندير فلايط باش نتعلم الدرس بالطريقة الصعبة، حنكتب تجارب ونصائحي في نقاط وكلما نتذكر حاجة حنزيدها في البوست ونديرله ابديت (تحديث).

تقدروا تتواصلوا مع مكتب أرامكس في حي الاندلس وتستفسروا عن خدماتهم بالذات خدمة Shop and Ship تسوق واشحن، وهما حيردوا على استفساراتكم بالخصوص. 

الايميل اللي يردوا عليه: Tip@shopandship.com

رقم الهاتف: 0917991941 - 0918804626 - 0918804628

ممكن تكون فاتت عليا معلومات حنضيف اللي يخطر على بالي للمقالة هذي أول ما نتذكره، و أي حد عنده استفسار أتمنى لا يتردد عن السؤال ونفيدوا بعض ونستفيدوا.

محبتي ،، 

سمر

#Aramex #amazon 3أنا_أدون #قهوة_سمر #visa #paypal #libya #ليبيا

إزالة الماكياج مهم هلبة بقدر أهمية أنك تديري ماكياج، شقلبت هلبة طرق عالنت والغالبية لقيت طريقتهم أن يهروا وجههم بالذات العيون بالمناديل المعطرة، للأسف العين مش ناقصة لأن هذا حيهري الرموش ويزيد قابلية أنهم يطيحوا أكثر من قبل.

فيه طريقة عجبتني هلبة بالذات لما تبي تنحي الرموش الإضافية، الطريقة هذي لطيفة هلبة على العيون و عن نفسي اعتمدتها رسميا، الطريقة هي أنك تاخذي شرائح القطن الخاصة بإزالة الماكياج، تصبي عليها كمية كويسة من مزيل الماكياج و ننصح بمزيل بيوديرما للبشرة الحساسة، ممتاز جدا ولطيف على البشرة.

حطي كل قطعة قطن على عينك ومتمسحيش بيها، ديري عليها مساج بصوابعك من غيرما تحركي القطنة، حاولي تخيلي المزيل يوصل لكل تركينة في عينك بالذات خط الرموش باش تتنحى الرموش، لما تحسي أنك مسدتس كويس اجبدي القطنة كأنك تمسحي لكن مرة واحدة، وشوفي للقطنة، حيعجبك المشهد الختامي.

أول شئ حتلقي كمية كبيرة جدا من ماكياج العين اختفى بلمسة واحدة، والرموش حتلقيها حصلت في شريحة القطن وتنحت من عينك بكل سلاسة.

الفيديو هذا لخبيرة التجميل ليزا إلدريدج حيوريكم الطريقة بالضبط ومنه تعلمت الطريقة هذي، مشاهدة ممتعة :) 

محبتي ،،

الرموش هدية من ربي تزيد العين جمالا، فيه اللي ربي عاطيهم النعمة هذي ورموشهم ماشاء الله تبارك الرحمن، طوال وغزيرة، فعلا تخليك تنتبه لعينهم وجمالها، في ذات الوقت فيه اللي رموشهم خفيفة وفيه اللي رموشهم متوسطة الطول لكن تطيح وتختفي والبركة في التفنيص في شاشة الكمبيوتر و السهر (حقيقة عن تجربة كلما نرجع للكمبيوتر رموش يتفترشوا، جديات نتكلم مش يطيحوا لا طولهم ينقص بدرجة ملحوظة جدا)، وطبعا بما أنه فيه ناس تعاني زي حالاتنا في الموضوع هذا وقلة الرموش أحيانا تخلي المكياج يبان ناقص جدا لمسة الأنوثة هذه، عليه نضطروا لتركيب رموش باش يكتمل المشهد، وللمصداقية عن نفسي أعتقد أني حنستعملهم في المناسبات القومية فقط لا غير (عرسي ولو عندي مناسبة حفلة أو عرس) لكن في الحياة اليومية مش حنضحي بروحي علاش؟؟ لأني حاصلة في راجل حشيشته يعلق على طهقات النساوين ولو يسمع بيا نحط في رموش صناعية حيستلمني رسمي لخمسين عام قدام، عليه وجب التعتيم عن هذا المخطط :D

بداية نتكلموا عن اللصقة متع الرموش، فيه نوعين من اللصقة، لصقة بيضاء وهذي تنفع لما تحطي رموش مفيش خط أسود يربط بينهم أو لما متكونيش راسمة رسمة العين (الاي لاينر)، لو كنتي راسمة رسمة العين مش حيكون فيه فرق لو استعلمتي اللصقة البيضاء أو السوداء، البيضاء في الحالتين حتجف و يختفي لونها، بس السوداء لما تجف حتخلي أثر ليها بالأسود، لهذا تستعملي اللصقة البيضاء للرموش الفردية واللي من غير قاعدة سوداء والسوداء لو رموشك بقاعدة ومكياجك ثقيل وعندك رسمة العين.

ملاحظة ثانية مهمة جدا جدا لازم تحطيها في بالك لما تحطي اللصقة عالرموش متحطيش الرموش على طول على عينك، استني شوية اربعين ثانية أو دقيقة ما بينما اللصقة بدت تشد روحها باش اول ما تحطي الرمش يلصق بسرعة ويثبت مكانه، بس لو على طول تحطيه على عينك لان اللصقة مازال سائلة حتصير حوسة ومش حتقدري تسيطري على الوضع.

اللصقة الزرقاء اللي لونها أبيض من نوع DUO مش ضد الماء، لكن اللون الأسود منها ضد الماء وتطول أكثر، تلقوها عند انجلوت،

بس فيه حاجات يفضل تديريها قبلما تحطي الرموش، أولها أنك تستخدمي الجهاز اللي يثني الرموش لأن الرموش الصناعية حتكون من الأول مثنية باش تبين العين ناشطة ومنتعشة، فلو خليتي رموشك في نفس الوضع الطبيعي حيبان الفرق واضح بينهم وبين الرموش المش حقانية.

ثاني حاجة حطي الماسكارا قبل، لأنه حيكون صعب تحطيها بعدين، زيدي على هذا كلما بعدتي الماسكارا عن رموشك الصناعية كلما حافظتي علهيم أكثر وقدرتي تستعمليهم في أكثر من مناسبة، وهذي صورة للحاجات اللي تلزمك.

بالنسبة ليا شريت زوز باكوات رموش، الأول من انجلوت والنوعية ممتازة و مريحة لكن للأسف كل صف منها بطول وتصميم مختلف عن الصف اللي بعده، فيه صفين مش عارفة لو كنت حنستعملهم أو لا وهذا محبط، كأنك شريتي حاجة باش تلوحيها، في ذات الوقت لقيت نوعية عالنت الباكو كله طول واحد، وصّيت عليه من برا وكان المفروض ناخذ أقصر طول بس للأسف تلخبطت وطلبت المتوسط، يعتبروا طوال شوية، كان بودي أقصر باش المشهد يكون أقرب للحقيقة، لما نفتح عيني نحس بيهم يمسوا في المنطقة فوق ثنية العين، الشعور مزعج وواضح أنهم مزيفين، ممكن نجرب ننقص من طولهم ونشوف هل حيكون فيه فرق أو لا، على أمل نقدر نشري من بره الطول الأقصر.

النوع الأول من انجلوت وزيما تلاحظوا فيه أكثر من موديل، أول واحد عاليمين قصير وممتاز، اللي بعده شعرة غليظة شوية قصيرة والثالث صف رموش متوسط الطول عجبني والصف الرابع رمشة واحدة طويلة هلبة :(

هذا باكو من آرديل لكن للأسف متوسط الطول ويعتبر طويل شوية، أنا معجبنيش طوله هلبة لكن ممكن غيري يحب يبين أنه مركب رموش!

توة نتكلموا عن الرموش وهي نوعين، نتكلم عليهم في خلاصة ..

النوع الأول خط رموش كامل:

يعني مع بعضهم تلصقيهم مرة واحدة، النوع هذا جميل و أسرع في تلصيقه و تكملي المهمة، مشكلته أنه يمكن أن يكشف بسرعة من قبل الرجل، و الحق أنا متعقدة من نقطة يوم العرس لو لبستهم و نبان شكل ولما ننحيهم ينكشف المخطط!! لهذا فتهم وقررت مناخذهمش.

فيه هلبة أنواع وماركات، فيه اللي خط ولوح وفيه اللي لو اهتميتي بيه تقدري تستعمليه لأكثر من ثلاثين مرة، الفيديو هذا يوضح كيفية تركيب الرموش هذي على العين.

النوع الثاني الرموش المنفصلة:

النوع هذا عبارة عن رموش منفصلة بححيث تركيبهم و تحطيهم وين ما تبي، الخصلة الواحدة ممكن فيها رمشتين أو ثلاثة، تقدري تشريهم بأكثر من طول وتركبيهم باش توصلي للشكل اللي تبيه، ميزتهم أنهم يخلوا شكل العين يبان طبيعي أكثر وواقعي من رموش الخط الكامل، لكن مشكلتهم أنهم ياخذوا وقت أطول، عن نفسي وقت زيادة و شكل طبيعي أقرب للواقع أحسن عندي من وقت سريع ونحصل تسهويكة نسمعها في كل مناسبة هههههه

الفيديو هذا فيه شرح ممتاز لطريقة تركيبهم وتبوا الحق فيه حتى رموش خط كامل لكن للرموش السفلية، ولا أعتقد أنه فيه واحدة مستعدة تحطهم من غير عارضات الازياء وجماعة مجلات الموضة لأن فكرتهم أصلا حسيتها عبيطة!! مش للدرجة هذي الواحد بيركز على كل شئ، هلبة عالجمعية !!

أتمنى نكون وضحت الموضوع كويس :)

محبتي ،،

أول حاجة نهدرزوا عن أجزاء العين زيما في الصورة (أتمنى نكون رسمتها صح)
العين فيها هلبة زوايا عريضة و دقيقة، ثنايا ومساحات واسعة ومساحات ضيقة، فيه تراكين من العين تستلتزم ألوان فاتحة باش تبين العين مصحصحة، و أجزاء ثانية محتاجة لون أدكن شوية باش يطلع العين عندها شوية عمق أو مغمورة شوية وهكذا، خلونا نفصلوا شكل العين من بره .. ونبدوا من فوق لتحت.

أول شئ تحت الحاجب لو تحطي صبعك وتضغطي عليها حتحسي بوجود عظمة غادي هذي اسمها عظمة الحاجب، حتقولولي كل الوجه فيه عظم!! لا،، حطي إيدك على خدك حتلقي صبعك انغمست فيه لكن حطي صبعك أعلى الخد حتلقي عظمة طول، هذي اسمها عظمة الخد.
نرجعوا لموضوعنا، عظمة الحاجب هي لما توقفي في مكان فيه إضاءة من جهة موجهط عليك حتلاحظي أنه تحت الحاجب بالضبط مكان العظمة فيه انعكاس للضوء، بالضبط هنا تحطي الهايلات في نفس مكان الإضاءة الطبيعي هذا لأن هذي هي الفكرة من الهايلات، حتقولولي طب ليش نحطوه طالما هو موجود من الاول؟ حنرد أنه لما تحطي كريمات و بودرة على وجهك حيمشي شكل جلدك الطبيعي وبهذا متطلبات الانعكاس حتختفي، يعني لما تغطي وجهك بالكريم والبودرة والظلال البشرة حيولي لونها مطفي من غير لمعة لهذا حيلزمك لمعة هايلات مزيفة ههههه نقصد بهذا لمعة من ظل العين، في أغلب باكوات ظلال العين اللي فيها هلبة ألوان حتلقي لون فاتح، هذا هو لون الهايلات.
باللون الأصفر المنطقة هذي مهمة جدا و هي منطقة أعلى ثنية العين، لما تتفرجوا على الفيديوات متع الماكياج حتلقوا أن أحد مراحل وضع الماكياج هي وضع لون الخلفية و فيالعادة يكون هادئ لكن له تأثيره لما تنحط باقي الألوان، اللون هذا عالأغلب تحطيه في المنطقة هذي، وبالانجليزي يقولوا للون هذا Transition color يعني الانتقال من درجة فاتحة وهي درجة اللون هذا للدرجة الداكنة اللي حتجي في المرحلة التالية اللي لونها بنفسجي، واللي في منطقة ثنية العين، هني حتدكني في اللون باش تلعبي بالألوان، أساسا الفكرة من الماكياج كلها اللعب بالألوان و الإضاءة، تخيلي منظر ستائر معلقة، مش الستارة فيها ثنيات، الثنية اللي بره تبان إضاءتها أفتح من الثنية اللي من داخل، هذي هي الفكرة اللي نبوا نطبقوها عالعين باش تخليها وكأنه عندها أبعاد يعني مثلا (ثلاثية الأبعاد)، حتقولولي ماهو هي أصلا ثلاثية الأبعاد، حنرد إيه صح بس مش حكينا أن لكل عين شكلها؟ لهذا كل عين تبي لعب عالظلال بالطريقة اللي تناسبها باش تبين الأبعاد هذي أكثر وهذا اللي حيبرز جمال العين زيادة وهذي هي الحكمة من الماكياج "إبراز الجمال".

جفن العين اللي باللون الأزرق، جفن العين حسب نوع الماكياج سهرة أو يومي، لكن باش تعطي عينك الأبعاد اللي هدرزنا عليها وتخلي التركيز منصب عالعين في الحوار بالذات لما تهدرزي مع زوجك تبيه يفوت كل شئ ويذوب في جمال عينيك :D هنا يا عزيزاتي نقسموا المنطقة هذي لثلاث أقسام، الأول يبدا من الزاوية الداخلية للعين، في الزاوية هذي ديما حطي لون فاتح، سواء أكان سادة من غير لمعة أو بلمعة، لكن عالأغلب حيكون بلمعة وأنصح جدا اللي تشري ماكياج لمعة تشري اللي لمعتهم ناعمة هلبة باش ميبانش مكياجها شلافطي، فيه اللي لمعتهم بُقَّاصِي قوية هلبة أرجوكم تفوتوهم مش حلوات أبدا، وانجلوت ظلاله ممتازات جدا.
توة ننتقلوا لنصف جفن العين، المنطقة الوسطى منه تكون لون ظل فاتح أو فيه لمعة لكن المهم فاتح مش غامق لأن الغامق حيجي بعده في الزاوية الخارجية للعين، ليش؟ لأن طالما هو غامق فاللي حيبان أكثر هو المنطقة الفاتحة من العين، يعني تقدري تقولي سينقل التركيز على منتصف الوجه أي العيون، حنوريك صور أمثلة باش تزبطوا الفكرة أكثر، و على فكرة متربطيش نفسك ديما أنه لازم الزاوية الخارجية تكون لونها أسود، ردي بالك مش الأسود بس معناها لون داكن، أي لون درجته غامقة أو انتي تحطي وتعاودي فيه (طبعا يفضل يكون أدكن شوية) حيكون كافي للمهمة هذي زي هذي الصورة.

لكن على فكرة زيما قلت حسب نوع الماكياج اللي بتحطيه، أحيانا لو بتديري مكياج سموكي امممم يعني العين كأنها محصلة بوكس لكن بطريقة جميلة :D كمثال الصور هذي.


خط الرموش العلوي والسفلي أكيد تزبطوه وخط دموع العين هو نفسه خط الكحل، اللي نكحلوا بيه العين، والعين تتكحل بعدة ألوان، اللون اللي يزيد جمال العين لكن يصغرها هو الكحل، لكن حسب الماكياج و الظلال لانها ممكن تغطي عالموضوع ولو تبي العين تبان أوسع و أكبر خليه فاضي أو ارسميه بقلم كحل لكن مش أسود، عن نفسي منحبش القلم الأبيض يبان عبيط وواضح فخذيت قلم لونه بيج فاتح.

توة ثاني حاجة حنديروا أمثلة عن فرش الماكياج اللي تستعمل في ماكياج العين

فيه نقطة مهمة وهي ان كل تركينة من العين تلزمها فرشاة ليها مواصفات أو حجم مناسب، حى لو انتي محترفة وتقدري تستعملي فرشاة واحدة لكن فيه حاجات محتاجة فرشاة خاصة زي مثلا رسمة العين eyeliner هذي يا ودي متندارش الا بفرشاتها الا لو حترسميها بالقلم هذا موضوع ثاني، في الصورة هذي الفرش اللي حيلزموك وحطيتهم جنبك بعض باش تزبطوا الفرق في مقاس كل واحدة عن الثانية.

هذي مجموعة الفرش اللي نستعمل فيها لماكياج العين، أو للدقة هذي الفرش الأساسية لكن عالاغلب متع رسمة العين منستعملش فيها إلا لما نرسم العين لأني مش من النوع اللي يحبها هلبة.

أهم فرشاتين ننصح بيهم، مش حنتكلم على النوع أو الماركة التركيز حيكون على الحجم، الفرشاة السوداء مهمة و حجمها أكبر من البيضاء ليش؟ لأنه اللي حتستعمليها في أول درجة لون فاتحة تحطيها في منطقة أعلى ثنية العين، هذي مهمة جدا لو استعملتيها في منطقة ثنية العين حتكون كويسة باش تحطي درجة اللون الأغمق عشان تلعبي بالدرجات، لو حسيتي أنها مش مساعدة و اللون ينتشر هلبة بعيد عن المساحة اللي تبيها وقتها ننصحك تاخذي فرشاة ثانية بمقاس أصغر زي اللي البيضاء على اليمين، عن نفسي جربت ندير بس بالسوداء لكن لقيت الموضوع محتاج لفرشاة أصغر حيكون أفضل هلبة، بس لو نبي نمشي الأمور عادي واحدة تكفي.

ثالث حاجة الماكياج هو عملية لعب بالظلال الطبيعية لإبراز جمال العين و توسعتها و غيره . 
حنهدرز على الظلال في مقالة منفصلة، بصراحة دهشت وحسيت روحي تكلمت هلبة ومحتاجة ناخذ فاصل إعلاني .. 

الماكياج لعب بالظلال محتاج منك تتأملي في الحاجات وتركزي على منطقة الظل ومنطقة الإضاءة وشبه الظل، تأملي من حولك وركزي في التفاصيل وتخيلي لو طبقتيها على نفسك، الماكياج ممتع متخخميش هلبة في الموضوع و جربي و ألعبي بيه باش تتعودي وتولي محترفة، ولما تطلعي مع زوجك توتي روحك فيسع وتوريه أن نظرية أن النساوين ياخذوا ساعة في اللبس وساعة ماكياج كذب وافتراء :D :D

محبتي ،،
سمر

عارفة العنوان مضحك لكن في نفس الوقت الموضوع مهم جدا، بعض البنات يخلو في مكياجهم أوفر (قوي لين بيّخ) ويخفي شكلهم الحقيقي وبصراحة الحركة هذي خلتنا مضحكة عند الرجالة وهذا خطأ، لدرجة فيه بنت مبدعة قداش تعجبني صفحتها اسمها يوميات رسامة ليبية دارت فيديو عن الموضوع هذا.

ننصح كل بنت تبان على طبيعتها من غير تصنع، مع ان هلبة بنات توة عايشين يومهم تمثيل في تمثيل مش عارفة على من يكذبوا لتوة مفهمتش .. ما علينا، الفيديوات الزوز هذو لماكياج فيف جدا يبرز جمالك الطبيعي مع شوية لمسات خفيفة جدا.


حاجة جميلة تخفف من مشهد المكياج على الوجه هي بعض المنتجات، مثلا أحمر خدود كريما، وفيه اللي يستعملوا الروج ادهني شوية على ايديك و دفيه بصبعك باش ينتشر كويس، خوذي شوية على الاصبع و بحركة حفيفة حطيه على الخد كأنك تطبطبي، مش مسح، ونفس الفكرة بالنسبة للهايلات فيه أنواع زي قلم الروج، وبالطريقة هذي مكياجك حيبان أحلى بالذات الماكياج اليومي أو العملي.


الفيديو الثاني لخبيرة التجميل ليزا، قالت هلبة نصائح حنعددهم لكم.
قعدت تحكي عن مديري الممثلين لما كانت تديريلهم في الماكياج متعهم في المهرجانات العالمية عالبساط الأحمر، وأغلب الرجال ميحبوش الماكياج، والبنات يحسابوا أنه كلما هلبة حطوا على وجههم كلما أصبحوا أحلى، إيه أنا معك انك حتباني أحلى لكن في الصور بس لو عن قرب أنا نفسي مش حنركز في الجمال جنركز عالطبقات عالوجه زيما صار في عرس صاحبتي، وأنا مروحة من عرسها نسلم عليها وهي تكلم فيا مش متذكرة شن كانت تقول بس متذكرة التشققات على وجهها بسبب طبقات الماكياج و قاعدة نفكر في شعور زوجها لما يشوفها أول نظرة عن قرب، أول نظرة المفروض تكون رومنسية، هل فعلا حيقدر يركز مع هذا الكم من الفواصل بينه و بين وجه زوجته الحقيقي؟ على فكرة من يومها وأنا مقررة أنه في عرسي إن شاء الله حندير الماكياج بروحي باش محد يلعب بوجهي!

أول نصائها أنك تحطي كريم أساس خفيف جدا ميخفيش بشرتك و يغطيها كليا.
ثاني نصيحة انها استعملت هايلات نوع كريمي دهنت بيه على الوجه بلطف ومكثرتش منه وحتى حتى احمر خدود نوع كريمي، زادت شوية كونسيلر تحت عينها باش تخبي  السواد الخفيف اللي عندها مع أنه شبه معندهاش ههههه ، ولو عندك اثار حبوب او حاجات تبي تخفيها استعملي الكونسيلر، بدلما تكثري من طبقات كريم الاساس عشان تخفيها.
استعملت ظل عين درجته ترابية، يعني لون مقارب للون البشرة الطبيعي اللي خلقنا بيها ربي ولوطة قريب من العين استعلمت درجة أغمق وتحت العين.
رسمت خط العين بالقلم وبعديم مشت عليها بالفرشاة لأن هكي حتبان أحلى والحق هكي ندير فيها في طلعاتي اليومية للخدمة بس كنت نستعمل في قلم بني، كنت نتفادى في الاسود لأن عيوني يدمعوا هلبة.
ماسكارا وشوية لمسات عالحواجب، و نصحت تفوتي الكونتور اليوم هذا كليا الا لو كنتي فالحة فيه، بس مش حلو أن الرجل يلاحظ الكونتور في اليوم هذا، خليه ينتبه لك انتي بدلما يشتت الماكياج انتباهه!

هذي نصائح خبيرة التجميل، والحق أنصحكم تتبعوها، لأنه مفيش أحلى وأجمل من أنك تكوني واثقة من نفسك و من جمالك الطبيعي اللي خلقك ربي بيه، كل امرأة جميلة بس لازم تعرف كيف تبرز الجمال هذا بلمسات خفيفة جدا، وصدقوني يا بنات كوني على طبيعتك وفوتي المسلسلات التركية على جهة، مش حتقدري تعيشي حياتك كلها في التمثيل.


وإن شاء الله ربي يعثلكم جميعا الأزواج الصالحين ويجعل حياتكم سعيدة و مريحة :)

محبتي ،،