سنة 2013 كيف بديت نشري من الانترنت، مكنتش مهتمة بالموضوع ومكانش في بالي أصلا الحق، 2013 في هدرزة وتقريبا وقتها كنت نبي نشري طرف للكمبيوتر متعي والطرف هذا مش مضمون نلقاه أصلي في ليبيا، لهذا حد معرفة اقترح عليا الشراء من النت ومنها الشيشمة انفتحت ههههههه.
الشراء من الانترنت مريح جدا جدا وميزته أنك مش مضطرة تلفي وتدوري في الزحمة والحوسة وتقعدي ماشية جاية تتابعي في البضاعة وتستني في التخفيض لو كانت غالية وهكذا، عن نفسي أغلب الحاجات اللي شريتها نشري فيها في موسم التخفيض، إلا لو حاجة خلاص هبلت عليها لأني ملقيتش حاجة زيها ومنبيش نضحي بيها وتضيع عليا وقتها ناخذها بسعرها الحالي، لكن مش ديما ندير في الهبلة هذي، والحق الطلوع هني متعب هلبة وتشحيطه أكثر من فايدته بالذات البضاعة اللي نزلت الصيف هذا و أغلبكم شافها كيف كانت مهزلة وكأن مصنع واحد يخيط فيها خياطة عالسريع المهم يعبي المحلات هذا من غير الألوان بصراحة (البشعة الشعشوعية)، ولو بتمشي للمحلات اللي تجيب بضاعة مختلفة (ماركات) تلقى أسعارها مش منطقية أصلا، هذا من غير مواد التجميل اللي أغلبها هنا مغشوشة (عن تجربة أنا يئست من أني نلقى حاجة أصلية هنا من غير انجلوت) لهذا أغلب مواد التجميل اللي عندي خذيتهم من برا، حتقولوا غالية هلبة، إيه صح غالية لكن مضمونة وبهذا نكون ضمنت سلامة وجهي ومنلعبش فيه بحاجة مجهولة المصدر + بدلما ندفع فلوس على مزينات نهتم بروحي والفلوس هذي نشري بيها مواد تجميل أصلية تقعدلي خير (هذي نظريتي بخصوص الموضوع هذا).
ما علينا، نرجعوا لموضوعنا، أول حاجة باش نشري أونلاين مشيت درت فيزا من مصرف الأمان، أيام ما كانت الفيزا بالشحن من غيرما نضطر ندير حساب غادي، و من بعدها للأسف الموضوع أصبح أصعب.
صارتلي هلبة فلايط في بداية شرائي من النت لأن هلبة حاجات غايبة عني ومكنتش نعرف وشكله كان لازم ندير فلايط باش نتعلم الدرس بالطريقة الصعبة، حنكتب تجارب ونصائحي في نقاط وكلما نتذكر حاجة حنزيدها في البوست ونديرله ابديت (تحديث).
- لما تشري من موقع واحد تمهلي شوية، مش لازم تخشي عالموقع تختاري اللي تبيه وتشري طول، عادي تقعدي بالأيام تشقلبي في الموقع والأسعار وتعبي سلة المشتريات وتفضي فيها وهكذا لعندما تحسي روحك خلاص استقريتي عاللي تبي تشريه واشريه مع بعضه بالذات مواد التجميل، ليش؟ لان مثلا شركة ارامكس حسب أخر معلومة عندي أقل وزن عندها تدفعي عليه 28 دينار، يعني لو شريتي طرف روج بس لما تستلميه تدفعي عليه الرقم هذا، لهذا لو عارفة روحك تبي تاخذي أكثر من حاجة اصبري شوية وعبي سلة المشتريات طالما انتي شارية شارية وعارفة أنك تبي هذو كلهم، باش تنقصي على روحك مصاريف الشحن في ليبيا.
- أحيانا للأسف حتى لو عبيتي سلة المشتريات من موقع ماركة معين مرات يبعتولك المشتريات على أكثر من شحنة، يعني مش مع بعضهم، اللقطة هذي قداش نكرهها، نذالة بامتياز، ولو بتشري من امازون ففي بيانات المنتج حتلقي مكتوب هل الحاجة هذي اللي يبيعها امازون او الموقع الأصلي، يعني لو من امازون نفسهم حتجيك الحاجات اللي بتشريها من مخزن امازون في شحنة واحدة (صندوق مع بعضهم) لكن مثلا لو درتي طلب شراء وكنت معبية سلة المشتريات بأكثر من حاجة وكل حاجة من ماركة مختلفة فكل واحدة منهم حتجيك في شحنة بروحها لأنها حتنبعث لك من مقر الشركة اللي اشبح في أي دولة، مثلا مرة شريت قفاطين من مونسون عن طريق أمازون، الشحنة طولت شهر باش وصلتني لأنه اتضح أنهم بعتوهالي من مونسون بريطانيا يعني من المحل نفسه وأنا كنت حاطة عنواني في امريكا كعنوان شحن، لهذا انتبهي للنقطة هذي.
- الفالطة الثالثة هي ردي بالك تتسرعي ديما راجعي طلب الشراء قبلما توافقي عليه، ليش؟ مرة قعدت نشقلب في موقع مرة اثنين عشرة وكلما تعجبني حاجة نضيفها لسلة المشتريات، فمرة لقيتهم مدايرين تخفيضات فجري درت طلب الشراء من غيرما نراجع الكمية، فاكتشفت أنه فيه جاكيت درت عليها مرتين طلب شراء فوصلتني زوز جاكات والمصيبة طلعت غالطة في المقاس وكان ضخم!!الصورة هذي توضح الفكرة لو تلاحظوا الدائرة الصغيرة مكتوب فيها رقم 2 وهذا معناها الكمية يعني قطعتين، لهذا انتبهوا.
- نقطة مهمة هلبة حتى هي في الصورة وهي عرض التخفيض، في العادة يكون فيه عروض تخفيض وباش تحصلي على التخفيض لازم تكتبي كود التخفيض في المكان فوق اللي داخل الفراغ البيضوي الأحمر، الموقع هذا درته كمثال، باش نوريكم سلة المشتريات لأحد المواقع.
- المقاسات، وهذي هي المشكلة الأكبر، عن نفسي ننصح الكنادر متشريش الا لو فيه فرع لهم زرتيه مرة وخذيتي مقاسك وزبطتيه، و على فكرة المقاس في الكندرة بالكعب العالي يختلف عن الأرضية، لأن فكرة أنك ترجعي الحاجة يا ودي خسارتها أكثر من مردودها.
- مونسون مقاساته ممتازة عن تجربة وأكثر من حاجة خذيتها اونلاين، امشي لمحلهم هنا وجربي الجاكات والقفاطين والجونات وازبطي مقاسك لأن تخفيضاتهم عالنت تهبل!
- مقاسات الملابس، هذي هي الحاجة اللي مكنتش نعرفها واللي بسببها أكثر من حاجة شريتها قاعدة ننقص فيها، اكتشفت أن مقاسات الملابس نوعين Regular وهو للمقاسات الكبيرة، والمقاس Petite للمقاسات الصغيرة، ومش قصدي الصغار لا قصدي البنات الظريفونات اللي مقاساتهم 8 و 10 حسب المقاس الانجليزي، انا مكنتش متوقعة أني نصنف على أني من المقاسات الصغيرة، فأكثر من حاجة شريتها طلعت كبيرة وأختي المتزوجة حصلت من وراي أكثر من لبسة هههههههه لهذا انتبهوا للنقطة هذي هلبة.
- فيه خدمة مهمة وننصح بيها الجميع اللي يشروا اونلاين أنكم تعطوها أهمية وهي خدمة الرسائل الالكترونية News letter شبه في كل موقع حتلقوها الميزة هذي وهي عبارة عن فراغ تكتبي فيه ايميلك باش توصلك اخر عروض الماركة هذي وتخفيضاتها أول بأول، ميزة مهمة جدا على فكرة للي متعود يشري أونلاين.
- نقطة ثانية مهمة جدا جدا جدا، وهي أنك تقري آراء الناس اللي شروا الحاجة هذي قبلك Reviews، الميزة هذي في أغلب المواقع موجودة بما فيهم أمازون، لما تلقى خمس نجوم جنب الحاجة اللي تبيها وتلقي هلبة آراء أقريهم، لأن هذي آراء الناس اللي شرت قبلك، تقييمها للحاجة وكيف وصلتهم وخامتها وبعدما غسلوها كيف ولّت وهكذا.
- لما تشري حاجة من أمريكا مرات تعطل عشرة أيام لأسبوعين ومرات أكثر لهذا وسعي بالك، علما بأنه فيه حاجات ممنوع تشريها أونلاين زي العطور، لأنها مواد قابلة للاشتعال، الحاجات السائلة، المجوهرات زي الذهب والأحجار الكريمة، لكن الفالصو العادي مفيش مشكلة شريت اكسسوارات ووصلتني سليمة.
- مواد التجميل، ننصحك متشريش أرواج أونلاين أو كريمات الأساس إلا لو جربتيها وعرفتي درجة لونك شن هو، لأن اللون صعب تزبطي شكله عالنت، الإضاءة تفرق، لون البشرة متع الشخص اللي حاط الروج او كريم الاساس مختلف وهكذا، فيه كريم أساس نبي نشريه معاش عرفت درجتي شني، شفت عرررم فيديوات لبنات استعملوه وكل بنت قالت درجتها لكن البنات هذوا حاطين إضاءة قدامهم وهذا خلا الموضوع صعب، لأنه الاضاءة متعطيكش اللون مزبوط، لهذا انتبهوا.
- لو تبي تشري أونلاين لازم يكون عندك حاجتين، فيزا أو بطاقة شراء من الانترنت وحساب أو عنوان شحن باش تحطيه في بيانات الشحن، وهو العنوان اللي حتوصلك عليه الحاجات اللي تشريها، أرامكس يقدموا الخدمة هذي أنك تشري عنوان عندهم تقريبا القيمة حاجة وسبعين دينار، الحساب هذا يعطوك عليه 14 عنوان حول العالم موزع حسب الدول الأكثر متوقع معدل الشراء منها، و القيمة هذي تدفعيها مرة واحدة لفتح الحساب، لكن الدفع على الشحنات مع كل شحنة توصلك وحسب الوزن تكون القيمة.
تقدروا تتواصلوا مع مكتب أرامكس في حي الاندلس وتستفسروا عن خدماتهم بالذات خدمة Shop and Ship تسوق واشحن، وهما حيردوا على استفساراتكم بالخصوص.
الايميل اللي يردوا عليه: Tip@shopandship.com
رقم الهاتف: 0917991941 - 0918804626 - 0918804628
ممكن تكون فاتت عليا معلومات حنضيف اللي يخطر على بالي للمقالة هذي أول ما نتذكره، و أي حد عنده استفسار أتمنى لا يتردد عن السؤال ونفيدوا بعض ونستفيدوا.
محبتي ،،
سمر
#Aramex #amazon 3أنا_أدون #قهوة_سمر #visa#paypal #libya #ليبيا
#Aramex #amazon 3أنا_أدون #قهوة_سمر #visa
2 تعليقات
أزال المؤلف هذا التعليق.
ردحذفياريت تحطيلنا المواقع اللي تشري منهم لاني نشري من الامازون بس ماجربتش غيره >_<
ردحذفوحاجه تانيه الارامكس عاطييني اربعه عناوين فقط :/