جت فترة كنت نبي نتعلم كيف نطيب ثلاث حاجات، البكلاوة، العبمبر والجبنة المعصورة في البيت، بالنسبة للعبمبر لقيت أكثر من وصفة أكثر وصفة عجبتني (طبعا مازال مجربتهاش) الوصفة متع صفحة وصفات لي لي وحسيت روحي امتلكت كنز ثمين، بالنسبة للجبنة المعصورة مازال معرفتش الطريقة والحق مازال مدورتش هيهيهي لكن بالنسبة للبكلاوة فالصور اللي في صفحة البكلاوة الطرابلسية خطوة بخطوة كانت كفيلة بأني نقرر ناخذ الكورس هذا ونتعلمها مزبوط، كانت أغلب الكورسات موعدها العشية والتوقيت هذا مكانش مناسب ليا، لكن مرة نزلت الصفحة إعلان عن كورس يبدا الصبح لحقت عليه وحجزت مكان وكلمت صاحبتي وحجزت حتى هي، فقررت خلال الكورس أني نكتب تجربتي مع تعلم البكلاوة الطرابلسية وننقلها لكم، بالتفصيل الأكثر من ممل، لهذا حطوا في بالكم أن سلسلة مقالات البكلاوة الطرابلسية حتكون طويلة لهذا حنقسمها على أربع مقالات كل مقالة تتكلم على اللي حاجة من اللي درناهم في الكورس إن شاء الله.

عن نفسي الحق مكنتش نعرف أنه فيه حاجة اسمها بكلاوة طرابلسية، كنت نحساب البكلاوة هي حاجة واحدة وكل واحد يديرها حسب طريقته او ذوقه، وكنت نعرف حاجتين بكلاوة وكنافة ههههه باقي التسميات كلها جديدة عليا، لهذا عن نفسي نعتبر في الكورس ممتاز جدا وعلمني هلـــبة حاجات جديدة، أينعم القيمة غالية، بس اللي تعلمته حنستفيد بيه هلبة خلال حياتي ونقدر نعلمه لأخواتي وعيلتي ولكم من خلال المدونة :) 

أول شئ الكورس كان كل يوم فيه متخصص في التدريب على حاجة حسب الترتيب التالي: 

اليوم الأول: تعلمنا فيه مقادير العجينة ودرنا الحجيبات والصويبعات

اليوم الثاني: يوم كامل خاص فقط بالبكلاوة.

اليوم الثالث:البوريك.

اليوم الرابع: الوربات.

بداية نخلوا أول مقالة عن العجينة ومقاديرها واللي هي (لكل كيلو دقيق ضيفي معه بياض بيضة *للحفاظ على بياض العجينة لأنه لو ضفتي الصفار حيأثر هذا على لون العجين* + 2 ملعقة كبيرة زيت + ملعقة صغيرة ملح + 500 ملل ماء للعجن *وفي حال احتجتي للمزيد فلا تتجاوزي 600 ملل كمقدار اجمالي للماء باش تعجني*)

تقدري تعجينيها سواء أعندك ماكينة العجن أو معندكش، لكن أهم ملاحظتين مهمات هلبة هي أن العجينة كلما عجنتيها هلبة كلما ساعداتك بعدين وانتي تجبدي فيها، لأننا حنديروا طريقة اسمها (الجبدة)، اعجنيها على قد ما عندك من جهد، اعتبريها فقرة الرياضة :D وبعدها خليها ترتاح شوية، بالنسبة لمن عندها ماكينة العجن اعجني على المستوى رقم 2 ومتزيديش عليه وخليها في العجانة من عشرة لخمسة عشر دقيقة، العبرة مش في سرعة العجن، لكنها في كثرته واستمرارك فيه بوتيرة ثابتة.

العجينة تقدري تعجنيها وتدسيها في الفريز مش شرط تستعمليها فورا، وتقدري تخليها في الثلاجة لو كنتي عارفة أنك حتستعمليها ثاني يوم مثلا، تحطيها في كيس تطلعي منه الهواء وتسكري عليها كويس وتطرحيها باش تبرد بسرعة لو قعدت في الثلاجة وتوصل لدرجة حرارة الغرفة وفي حال جمدتيها معناها حيذوب الثلج منها بسرعة، لأنه لو خليتيها مكورة معناها تبيلها باش تذوب!! وسكريها كويس باش متخشلهاش الرطوبة وتفسد عليك بعدين لو جفت أو لو ذاب الثلج وفسدهالك.

ميكانيزم العمل لما تبي تديري أي حاجة بالعجينة هذي كالتالي: 

1- تقسمي العجينة لأقسام حسب الطبقات اللي تبي تديريها وحسب المساحة اللي حتديري عليها الحلات، يعني لو طاجين صغير صغري في الحجم ولو طاولة كبري شوية وهكذا، وحسب تجربتنا في الكورس وتجارب اللي قبلنا ديما جهزوا كم قطعة عجين زيادة تحسبا أن ورقة الجبدة تتقطع معنا أو متكونش في مستوى يرضيك وانتي تخدمي فيها أو تطيح منك في الطبخ أو واحد من الصغار يخش عالخط يفسدهالك وغيره، فديما خلي عندك خطة احتياطية.

2- تسبكي كل قطعة من جديد بروحها على قد ما تكثري حتريحك بعدين، بعدين اجبدي الجزء العلوي باش القاعدة معاش يولي فيها ثنايا وتحسي الكورة ولّت ملساء من جميع الجهات خوذي أكياس نايلون (كيس لحم) تقصيهم وتفتحيهم وتخزنيهم ديما عندك في الفريز باش تلقيهم لما تديري عجنة ثانية و رابعة و عاشرة بدلما كل مرة توتي أكياس وحوسة، اختصارا للوقت وحفاظا على البيئة، رشي شوية نشا على الكيس ( فيه تكنيك مضحك علمتهولنا الأبلة مفيدة وهو أنك تحطي شخشير لحم في حكة النشا وتحشيه بالنشا حيكون ممتاز لما ترشي النشا عالعجينة أكثر من لما ترشيه بيدك) بعدين حطي كرة العجين ورشي عليها ثاني رشة نشا وبعدها غلفيها بالكيس نفسه أو طبقي الكيس، كملي نفس العملية مع كل الكرات، و خليهم يرتاحوا شوية ربع ساعة ممكن، بس حطي في بالك مهم تكون درجة حرارة المطبخ دافئة، لأنها لو كانت باردة فالشئ هذا حيخلي العجينة شادة روحها ومش حترتخى معك بمرونة لما تجبديها.
3- خذي الكرة الأولى وافرديها بيدك شوية بعدين بالنشابة، يفضل الارتفاع ميكونش أقل من خمسة مللمتر لو الكرة متعك صغيرة بس لو كبيرة حتى سنتيمتر كويس، بعدما تفردي الاولى افردي الكيس اللي كانت فيه وردي بالك يكون فيه تنايا في الكيس لأن هذا حيأثر على شكل العجينة، الشئ هذا حيدير فيها كسرات حيتراكم فيها النشا وحتدير منظر مش حلو لما تجبديها.

رشي شوية نشا على الكيس قبلما تحطيها بعدها حطي العجينة اللي حللتيها ورشي ثاني عليها نشا بعدين حطي عليها كيس ثاني وهكذا لعندما تكملي جميع الكرات، بس حطي في بالك نقطة مهمة وهي أن كل واحدة لازم تكون فوق الثانية بالضبط و يفضل تحاولي يكون نفس القطر تقريبيا باش متتسلحبش واحدة منهم ويتشوه شكلها بالثنايا، لهذا حاولي تديري خمسة فوق بعض، وبعدين ابدي مجموعة جديدة باش تحافظي عليهم من أي ثنايا، وننصحك تحطيهم في سفرة عشان لو اضطريتي تغيري مكانهم يسهل عليك هذا الحركة، و بعدما تكملي حطي عليهم صحن كبير عميق باش يحميهم من الهواء الجاف وتقعد عجينتهم رطبة ومتجفش وخليهم يرتاحوا شوية وأهم شئ يكون المكان دافئ، نحن في الكورس مشاركتين جابوا معهم دفايات صغار حطيناهم جنب العجينة، لأن مكان الكورس كان في مدرسة مش في بيت لهذا مكانش فيه دفايات.
4- المرحلة التالية توتي فيها سشوار وسمن ذائب، أول شئ تدهني زيت عادي على اي حاجة تبي تحطي عليها طبقات العجين. وحطي في بالك ضروري تقلبي دوائر العجينة أو (الحلّات جمع حلّة عجين) اللي جهزتيهم بحيث تبدي من أول حلّة درتيها أو دائرة، لأنها حتكون ارتاحت قبل البقية، وتبدي في مرحلة جبد العجينة واللي أولها أنك تشدي الحلّة الأولى من العجين براحة أصابعك وتعطيها المجال ترتخي باش يزيد حجمها، في ذات الوقت وشوية تبدا تكبر معك، حاولي حركتك تكون لطيفة وخفيفة باش متعطيش مجال للعجينة تلتصق ببعضها وانتي تخدمي عليها لأن الشئ هذا حيخلي منظرها يبان كأنه فيها عروق أي ثنايا، لما تحسي ان المقاس كويس أطرحيها على الطاولة أو الطاجين اللي المفروض تكون دهنتيه هو وحواشيه كلها بالزيت باش يسهل عليه عملية شد العجين او جبدها اللي جت منها تسمية الجبدة يوما ما كان سخر ربي حنصور فيديو لفكرة الجبدة باش تفهموها أكثر ومتضطروش تدفعوا باش تعرفوا طريقتها

بلطف ابدي اجبدي من الاطراف براحة أصابعك باش متقطعيش العجينة ويندار فيها ثقب بسبب صوابعك، بلطف اجبدي على قد ما تقدري تخلي العجينة رقيقة جدا جدا جدا، لأنه كلما كانت رقيــــــقة كلما كانت أحلى في نضجها وقرمشتها، هشاشتها وشكل طبقاتها، وفي حال تمزقت منك العجينة متخافيش عادي، المهم تديري جهدك تطلعي بأقل عدد من الخسائر والثقوب.

5- بعود أسنان لو فيه بالونات هواء ديري ثقب صغير باش يطلع منها الهواء، ولك حرية الاختيار يا تمروحيها بكرتون باش تجف العجينة أو بالسشوار وخليها على السرعة المتوسطة وطبعا الهواء بارد المهم مش الساخن لأن الساخن يخلي الورقة قاسية شوية، بلطف مرريها عليها في حركة دائرية سريعة ولما تحسي أنها جفت ادهنيها بالسمن اللي ذوبتيه وتقدري تزيدي للسمن زيت نباتي بس يكون الزيت ثلث الكمية والثلثين الباقيين سمن، بس بالنسبة للبقلاوة يفضل سمن خالص بدون إضافات، والسمن يكون يا دوب ذائب متخليش يطيب أو تنسيه عالنار، ونصيحة متدهنيش هلبة حاولي تكون ايدك خفيفة قدر الامكان، عن نفسي أول ما ذقت البكلاوة حسيت بجرعة سمن قوية هلبة ضربت دماغي لأني منحبش السمن وممكن لأن أجواء التطييب وقتها في المطبخ مخلتنيش نستمتع بالطعم، لهذا انتبهوا لكن المهم تكوني دهنتي كل العجينة باش تقرمش لما تطيب.
لو عندك زوائد من العجين طلعت من محيط الطاولة نحيهم و حطيهم في كيس وسكري عليهم لأنك تقدري تستعمليهم مرة ثانية، لكن لازم تعاودي نفس المراحل الأولى واللي تبدا من تقسيم العجينة وسبكها .. الخ

ملاحظة: الورقة الأولى اللي حتكون في القاعدة متجففيهاش هلبة، خلي فيها شوية رطوبة لأنها بعدين هي اللي حتنثنى وحتكون الواجهة في بعض التشكيلات مثل البوريك مثلا والحجيبات، فلو جففتيها هلبة حتتكسر منك بعدين وهذا حيخلي المشهد مش حلو لما تطيب التشكيلات اللي تبي تجهزيها، لكن باقي الطبقات جففيهم كويس باش يعطوك الهشاشة المطلوبة لما تاكليها.

وبعدها ديري الطبقة الثانية وهكذا حسب العدد المطلوب في كل حاجة تبي تطيبيها.

ملاحظة: بعد عدة تجارب في الكورس اتضح أن الدقيق الفاخر هو أفضل الأنواع للحصول على نتائج أفضل لورق الجبدة، دوري على الدقيق الفاخر اللي عليه علامة زوز أصفار (00) ومكتوب عليه بالانجليزي Tipo زي اللي في الصورة.

هذي المقالة الأولى واللي كانت عن تفاصيل عجينة الجبدة وتقنية الجبد، في المقالة الجاية إن شاء الله حنتكلم عن الأصناف اللي درناهم خلال الكورس وكالعادة حتكون بالتفصيل الأكثر من ممل :) لهذا وتوا قهوتكم ووسعوا بالكم هلبة.


محبتي ،،
سمر

#بكلاوة #كنافة #بقلاوة_طرابلسية #حلويات #طرابلس #تعليم_الطبخ #حرفة #قهوة_سمر #طبخ
#baklava #how_to_cook_baklava #samarscoffee

أغلب السيدات حول العالم يخدموا في الكروشيه ويهدوا فيه سواء أكان لحد من العيلة أو الأصدقاء، تبوا الحق تعلمت الكروشيه العام اللي فات في صيف 2015 وتقريبا حاجة واحدة درتها لروحي وفعلا راضية عنها، بعدين وقفت ولما رجعت كنت مقررة ندير هدية مخدومة بالكروشيه، لما عرفت أن أختي حامل كانت أول حاجة خطرت على بالي أن هديتي لها حتكون بطانية كروشيه، لكن مكنتش قادرة نختار اللون لأني مش عارفة جنس المولود، لهذا كان لازم نستنى لين نعرف المعلومة هذي، وخلال تسوقنا فترة التخفيضات (حشيشتي نشري في التخفيضات لأنه و بصراحة مرات تلقي شلتوتة عادية جدا وسعرها مش منطقي لهذا التخفيضات هي أكثر وقت منطقي للتسوق بالنسبة ليا)، المهم لقيت أنها مركزة على جهة البنات بس وهنا ولعت اللامبة واكتشفت السر نياهاهاهاها، أجلت البدء في البطانية لعندما خشت في شهرها التاسع، وهنا بدأ الجد، كنت نخدم في البطانية من خلال درس في الكروشيه على اليوتيوب خدمت فيه حاجة يسموا فيها Granny Squares ، الدرس متعها مقسم لأربع فيديوات من قناة اسمها Bella Coco كل واحد منهم شرحت فيه مرحلة من مراحل كل مربع من البطانية، و الفيديو الخامس كان منفصل لقناة ثانية اسمها It's All in a Nutshell Crochet وشرحت فيه كيف نربط المربعات هذي ببعض.

الصورة هذي فيها مخطط البطانية، الـ Granny Squares عبارة عن مربعات، تدير منهم على قد ما تبي يكون مقاس البطانية، وبعدين تربطهم ببعض، البطانية درتلها ست صفوف و سبعة أعمدة، يعني 6X7 وبعدين درتلها إطار باش نزيد في مساحة البطانية أكثر لأني حسيتها صغيرة شوية، الصورة هذي توضح شكل المربعات بعدما كملتهم و حطيتهم جنب بعض باش نقيس المقاس هل مناسب أو نزيد مربعات زيادة.

أبعاد البطانية كانت 100 سم في 83 سم، الحق في العادة الأفكار اللي نشوف فيها عالنت يكثروا في الألوان هلبة في كل مربع، والتنوع هلبة في الألوان منحباش، ونحب الألوان المريحة للعين، لقيت البطانية هذي عالنت تقريبا على موقع Pinterst، خشيت على موقع اللي خدمتها وبصراحة أبدعت في بساطة البطانية وجمال الألوان اللي اختارتها، كان خاطري نديرها بألوان قريبة منها لكن للأسف محل دازة ميجيبش في ألوان من النوع الدافئ، أغلب الألوان متعهم من الفئة الباردة، البودري اللي لقيته عندهم معجبنيش حسيته زي جو حلوة صوف، لكن للأسف بعد فترة وبعدما شريت كمشة صوف للبطانية مشيتلهم ولقيت لون بودري يهبل للأسف وقتها كنت شريت وبديت في البطانية، بس خذيت منه واحدة وخدمت بيها المق متع #هدية_سمر ، الصورتين هذو للبطانية اللي كانت مصدر الإلهام لي، والرابط هذا تلقوا فيه المقالة الأصلية للي خدمتها.

مراحل صنع البطانية في الصور كالتالي، أول مرحلة كانت أني ندير 42 مربع Granny Squares منهم 21 البنفسجي الداكن هو اللي في المركز، و 21 البنفسجي الفاتح هو اللي في المركز.

المرحلة الأولى: 

وبعدما كملتهم حطيتهم جنب بعض باش نراجع المقاس لو كان محتاج زيادة أو تمام.

المرحلة الثانية: ربطهم ببعض، بديت نربط فيهم بالصف حسب ترتيب الألوان، ولازم تنتبهي لما ترتبيهم لأنك حتكوني عارفة كل صف بأي لون يبدا وهكذا، وبعدما درت ستة صفوف ربطهم ببعض لعندما تكون عندي 42 مربع مربوطين جميعا ببعض :)

المرحلة الثالثة: إطار البطانية، درت سبعة صفوف من غرزة الكروشيه Single Crochet وبعدين درت سطر في الوسط عبارة عن الغرزة Double Crochet أي سلسلتين فاضيات باش يبان الفراغ اللي تشوفوا فيه، ولما كملته على طول محيط البطانية رجعت درت سبعة صفوف من الغرزة الأساسية Single Crochet.

واجهتني مشكلة انتبهت لها بعد فوات الأوان لكن حنتدرب عليها باش نتفاداها في المشاريع الجاية إن شاء الله، وهي أني معاش عرفت الغرزة الأولى اللي بديت بيها السطر وين، كان المفترض أني نحط فيها حاجة تأشرلي على مكانها باش لما نوصلها نعرفها، لكن للأسف نسيت أو بالأحرى مخطرش على بالي، كنت نحساب روحي فالحة لكن طلعت مازال نبي تدريب، الدائرة البيضاء والسهم يأشر على مكان حتلاحظوا فيه تعرجات مش زي باقي السطور، هنا كانت نقطة التقاء كل لفة وهنا كانت أخطائي للأسف، تدربوا عليها وحاولوا تتفادوها ومتديروش نفس غلطتي باش شغلكم يبان تحفة.

وأخيرا المرحلة الأخيرة كانت بأني ندير حاشية البطانية ونضيفلها لمسة أنثوية، درت أبسط طريقة للحاشية، ولو تبوا تديروا أفكار ثانية راهو فيه أفكار بالهبل، احتمال يصيرلك ستك ومعاش تعرفي أي فكرة تختاري من الإبداع فيهم.

وطبعا لازم نضيف لمستي الخاصة باش تقعد البطانية هذي ذكرى جميلة لبنت أختي وهي أني ضفت توقيعي الخاص #صُنع_بحُبّ ♥♥

الخدمة على البطانية استغرقت شهر بالضبط، خلال الفترة الأولى مكنتش نقعد عليها هلبة، لكن مع اقتراب موعد الولادة صار فيها السهر لهذا لاحظتوا أكيد اختلاف الإضاءة في الصور، مرة صبح ومرات نسهر عليها لين تطلع الشمس!!

المضحك أنه خلال الفترة هذي كان لازم أختي متسمعش بالهدية هذي بكل، فكنت كلما نعرف أنها جايتنا نسكر الدار بالمفتاح، ولما تبي تصلي فيها نتسبل بأنها معبية جراثيم لأني هذيك الفترة كنت مريضة :D :D 

بعدما كملت غسلتها وعقمتها بديتول، وكويتها، حطيت عليها قماشة بليتها بالمية عالخفيف وبمكواة خطمت عليها باش تعطيها الشكل النهائي.

معلومات مهمة: 

لصنع بطانية بمقاس متر في الطول و83 سنتيمتر في العرض استعملت التالي:
1-  6 كرات صوف باللون الأبيض (لانة) وزن 100 جرام، مقاس الإبرة 4.5 ملليمتر.
2-  2 كرات صوف من اللون البنفسجي الفاتح للأسف مكتبوش عليه أي تفاصيل، بس الصورة توضحلكم الكمية.  
3- وكرة واحدة بنفسجي داكن (لانة) وزن 100 جرام، مقاس الإبرة 4.5 ملليمتر.
4- إبرة مقاس 4.5 ملليمتر
5- مقص
6- إبرة لخياطة الزائد من الخيوط و إخفائها.

الفيديوات اللي من خلالها درت البطانية هي بالترتيب:

الدائرة الأولى (اللون الأصفر)

الدائرة الثانية (اللون الليلكي)

الدائرة الثالثة (البنفسجي الفاتح)

كيفية تغيير الشكل من دائرة لمربع (لون كريما)

فيما يخص طريقة ربط المربعات ببعض، شقلبت هلبة أفكار لأني مكنتش نبي يبان الخط الفاصل بين كل مربع و ثاني، لكن للأسف فيه طريقة استصعبتها لأنها مملة :D ومعدلتش عليها وكانت هي الطريقة اللي كنت نبيها، بس للأسف مدرتهاش!! المرة الجاية إن شاء الله، الفيديو هذا لبطانية اسمها عالم صوفي، خذيت منها طريقة ربط المربعات ببعض.

أتمنى تكون تجربتي هذي شجعتكم باش تبدوا في بطانياتكم لصغاركم، حسيت روحي درت حاجة أثرية زي جو جداتنا زمان كيف يديروا في بطانيات بصوف الخرفان والجو هذا، شعور جميل جدا، كانت أول بطانية نديرها وإن شاء الله متكونش الأخيرة.

محبتي ،،
سمر


#handmade #handmadewithlove
#crochet #crocheting #crochetgeek #كروشيه #knit #knitting #instalike #crochetaddicted #libya 
#makeitsewcial #craftsposure #WIP
#instacrochet #white  #amigurumicrochet #makersgonnamake
#imadethis #handicraft #hooking #crocheters #crochetaddict #thecrochetproject #myjanuary
#blanket #first-blanket #babyblanket

2015 مش حنتكلم عليك، بس حنتبع المثل أو الحكمة اللي تقول "انظر إلى الماضي بغضب"!!

توة خلونا في المهم :D

كل واحدة منّا أكيد بغضّ النظر عن رضاها عن نفسها وشخصيتها لكن أكيد فيه حاجات مضايقتها وتبي تغيرها أو تحسّن منها، طيب السؤال اللي يطرح نفسه، ليش منديروش حل ؟؟ أحيانا الحلول بسيطة بس تبي مداومة واهتمام وهذي مشكلتنا في عدم جدية قراراتنا، أول يومين نشاط و ثالث يوم خموووول والمشكلة تبيلها باش ننتبهوا ونرجعوا نبدوا من جديد ونفس القصة إلى مالا نهاية!!

أنا نفسي هكي، مش النوع اللي مستمر أو نجبر روحي على حاجة لفترات طويلة، مرة واحدة بس زمان شديت ماسك معين للوجه ومرتين في اليوم وطلعت نتائج كويسة والحق مش عارفة كيف تحملت نستمر عالنظام هذا!!

نهاية شهر 12 وبداية شهر واحد كانت ضغط وجري وعوالة لهذا ملحقتش نبدا في تنفيذ قرارات السنة هذي بجدية، لكن الحمد لله توة نعتبر روحي بديت قادرة نركز في المدونة وخدمتي ونطور ونعدل في نظام حياتي اليومي إن شاء الله.

الاهداف كيف المفروض تكون، عن نفسي ننصحك تديري جلسة مع نفسك في هدوء، وتحاسبي نفسك وتشوفي أوجه التقصير فيها وشن مش عاجبك في نفسك و حياتك وتبي تصلحي منه، و الأهم من كل هذا متشوفيش بس للجانب الشكلي، حطي في بالك أن الحياة لها عدة جوانب، ونذكرلك منها الجانب الديني، الأخلاقي وغيره، الصورة هذي توضح الجوانب اللي لازم نهتموا بيها، لكن للعلم بس، لازم تهتمي بكل جانب منها باش يكون فيه توازن في حياتك و متخليش جانب واحد يطغى على البقية لأنه بالطريقة هذي حيصير خلل وعدم توازن، وكمثال عالشئ هذا أني زمان كنت مخرومة خدمة، من غير دوام الشغل نروح نسهر الليل نخدم، منمشيش للمناسبات الاجتماعية و نتهرب منها بحجة مخاطريش أو عندي خدمة، هلبة جوانب في حياتي فتها ونسيتها والصحة نزلت وحوسة بسبب أني حطيت حاجة وأعطيتها الأهمية على كل شئ!!


زمان كنت نتابع في برامج لها علاقة بالتنمية البشرية وطلعت منهم بالترتيب التالي للخطة السنوية، وتبو الحق كانت ممتازة وناجحة.
 أول شئ حددي الأهداف اللي تبي تحققيها السنة هذي، على أي جانب من جوانب حياتك، تبي تحسني علاقتك بربي أنك تصلي صلواتك في وقتها، تقري قرآن كل يوم بعد الفجر بانتظام، تنقصي وزن أو تزيدي وزن، تتعلمي لغة جديدة أو حاجة جديدة وغيره، الأهداف على قفا من يشيل، لكن أهم حاجة أنكم متكلفيش روحك بحاجة فوق طاقتك، بمعنى أنه فيه أهداف انتي مش مضطرة تحققيها كلها في السنة مرة واحدة، فرضا تبي تحققي هدف معين في حياتك والهدف هذا حيمر بعدة مراحل، تقدري السنة هذي تديري جهدك تنفذي المرحلة الأولى وهكذا ..


بعدين قسمي أهدافك في جدول زي اللي في الصورة وقدام كل هدف حددي شن هي الحاجات اللي المفروض تديريها باش يتحقق الهدف هذا في الخانة (خطوات التنفيذ)، تنتقلي بعدها (للتكلفة المالية) بعض الأهداف تحتاج قيمة مالية لو مثلا زي حالتي قررت تتعلم لغة جديدة والموضوع لازمه كورس فحددت القيمة المطلوبة كم، بس لو كان هدفك مثلا الرياضة أو المشي في البيت ، أو نظام عناية واهتمام فممكن تكون تكلفة المواد اللي بتشريها للعناية بس، ولو الرياضة لو في نادي يلزمك قيمة للنادي بس لو حتديري زي حالاتي وتداومي على الرياضة في البيت فالتكلفة حتكون مجانية :)

ننتقلوا بعدها لزمن التنفيذ، هنا لازم تحطي مواعيد لنفسك باش تبدي، لأنه لو خليتي الموضوع مفتوح فمش حتلتزمي بيه، كلنا هكي للأسف وفجأة تلقي السنة تمت، لهذا نظمي نفسك في جدول زمني بالطريقة هذي حتلتزمي أكثر، مثلا كورسات اللغة حتاخذ مني ثلاثة أشهر ممكن، وتاريخ بدء التنفيذ هو التاريخ اللي أنا حنبدأ فيه في تنفيذ الهدف على أرض الواقع، وخانة التاريخ المفترض هو التاريخ اللي حسب تنظيمي لمراحل أهدافي المفترض نكون حددت الوقت اللي نبدا فيه كل حاجة من اهدافي، وأحيانا ممكن نبدأ قبل الموعد وممكن نعطل، العبرة في تسجيل المعلومات هذي هي تقييمي لنفسي في نهاية السنة من حيث جديتي في الموضوع من عدمه.

نسبة الإنجاز تحدديها بعدين لما تكمل السنة وتديري جلسة على جدول أهدافك، وتكتبي كم من المائة حققتي من الهدف اللي حددتيه، مثلا كنتي تبي تنقصي 10 كيلو لكن مقدرتيش تنقصيهم حددي نسبة الانجاز، 50% مثلا، وفي بند النتائج اكتبي النتائج اللي وصلتيلها وحققتيها في كل هدف في نهاية السنة.

التجربة هذي درتها كم مرة قبل الثورة، وحتحسي بشعور رائع جدا لما تشوفي للي كتبتيه واللي حققتيه، حتحسي بالفخر بنفسك :) لكن حطي في بالك أن الأهداف اللي حتسجليها يفترض تكون في جميع مجالات الحياة، متربطيش الأهداف فقط في الخدمة او الدراسة، مجالات الحياة كثيرة، بس ننصحك تحاولي توزني بين كل المجالات.

العام هذا إن شاء الله قررت نبدأ نتعلم لغة جديدة لأنه بصراحة عيب طقيت الثلاثين ومنعرفش الا لغة واحدة أجنبية، فيه اللي أصغر مني وعندهم ثلاث أربع لغات، نعتبرها عيب في حق نفسي، والأهم من هذا كله هو تغيير نظامي وجعله أكثر تميزا من ناحية الاهتمام بالجانب الروحاني أو الديني، الصحي، الرياضة والعناية بنفسي أكثر من قبل وبجدية أكثر والعودة للقراءة والمطالعة بصفة دورية يومية لزيادة مداركي أكثر وباش يكون فيه تميز أكثر في حواراتي مع خطيبي وادعولي يولي زوجي السنة هذي :( وشوية أهداف ثانية نخليها سرررررر :D

وانتي عزيزتي، شن هي الأهداف الخاصة بك السنة هذي؟ هل تبي السنة هذي تكون نسخة من اللي قبلها واللي قبل اللي قبلها؟ قريت جملة عالفيسبوك الشهر اللي فات تقريبا تقول "متقولش أنك عشت عمر وانت عايش 85 سنة مكررة كلها زي بعضها"!!

فعلا لو قريت سنة و رسبت وعاودتها فهل هذا يعني أنك درت حاجة جديدة؟؟ فكري في الموضوع وقرري، مش حتتغيري للأحسن إلا لو انتي قررتي الشئ هذا :)

تمنياتي للجميع بعام مثمر، سعيد ومميز إن شاء الله، خلونا نبدوا بروحنا باش ليبيا تتحسن ويتحول حالها للأفضل، رب العالمين قال في القرآن الكريم: (إن الله لا يغير ما بقوم حتى يغيروا ما بأنفسهم) يعني لو تشكي من أنه مفيش حد يحترم في إشارة المرور وأنتي نفسك تفوتي فيها، فطبيعي أنك تلقى من يضايقك ويقص في دورك!! تخيلوا لو كل شخص في ليبيا وقف في الاشارة، تتوقعوا الزحمة حتنقص؟ أو حتزيد؟ الجواب بسيط مش محتاج تفكير :)

عام سعيد على الجميع
محبتي ،،

#2016 @قهوة_سمر

مرحبا :)    

كان في بالي من فترة ندير هدية مقدمة من مدونة سمَر ويبدولي أن مناسبة بداية عام جديد مناسبة جدا، أكيد كل واحدة منا دارت مراجعة لنفسها وللسنة الماضية وسواء أكانت راضية أو غير راضية عن اللي فات فالأكيد أننا كلنا في قرارة أنفسنا مقررات أن العام الجديد بإذن الله حيكون أفضل سواء أكان هذا على الصعيد الشخصي، الديني العاطفي أو العلمي، او الصحية أو غيره.  

 عن نفسي قرارات هلبة قررت نبدأ جديا في تنفيذها، 2015 مش راضية عنها أبدا ومشكلة كبيرة لو حتى 2016 تكون بنفس المنوال، علما بأننا داخلين على سنة يعلم بيها ربي ووضعها متوقف على وضع البلاد الاقتصادي، لهذا لازم يكون فيه بدائل لرفع المعنويات والتغيير للأفضل، أنصحكم تحطوا أهداف للسنة هذي وتديروا جهدكم باش تنفذوها خلال الـ 365 يوم.  

حبيت بداية العام هذا تكون مختلفة بأنها تكون بداية وقرار استمرارية لمدونة قهوة سمَر، تقدروا تقولوا أنها مشروع حياتي الجديد، لهذا يهمني هلبة أني نفيد الجميع من خلالها ونحكيلكم كل اللي نتعلمه من خلال تجاربي وفلايطي، ونعطيكم العبرة لعلّ وعسى نفيد حد بيها.   

توة نحكيلكم على الهدية ♥♥   

أول شئ وهو حاجة نشوف فيها مهمة جدا جدا لأي فتاة أو سيدة ونعتبر فيها من الأساسيات لأنها تقدروا تقولوا خمسة في واحد، تستفيدي منها في خمس حاجات.  

هديتي الأولى وهي اسفنجة الماكياج Blender اسفنجة الدمج، استعمالاتها في وضع كريم الأساس والكونسيلر والكونتور لو تستعملي في الكونتور الكريمي مش البودرة وتقدري تستعمليها باش تحطي بودرة الوجه ولو أحمر الخدود متعك  كريمي، اخترت اللون الوردي لأنه زي شعار المدونة ♥   

الهدية الثانية روج (أحمر شفاه) احترت أي لون ناخذ لكن لقيت أن أحسن لون هو اللون اللي تستعمليه يوميا وعن نفسي اللون اليومي لما نطلع ناخذ فيه لون قريب من لون الشفاه الطبيعي، فخذيت لون من انجلوت قريب من اللي عندي، على اليمين الروج اللي نستعمل فيه لما نطلع طلعة عادية يومية وعاليسار الروج اللي اخترته للفائزة :)    

الهدية الثالثة هي ألوان الظلال اللي حسب رأيي نشوف فيها أساسية جدا أنهم يكونوا في مجموعتك، وهي تدرجات لون البشرة من البني الفاتح للغامق، وعجبني أني لقيتهم مع بعض عند انجلوت، حرت أي درجة ناخذ لأنهم ثلاث درجات، وعجبتني الدرجة الفاتحة فخذيتها، فيه زيه أغمق بدرجتين لو حابات تجربوه في المحل.  

الهدية الرابعة وهي أربع CDs اثنين منهم CD واحد خزنت عليهم كل الفيديوات المهم اللي نزلتهم لكلوِي مورولّو والثاني لخبيرة التجميل ليزا الدريدج.

الزوز الثانيين DVD الأول لجاكلين هيل وحجمه 2 جيجا :D قنبلة هههههه جمعت كل فيديواتها المهمة اللي عندي واللي تعلمت منهم هلبة تقنيات و طرق للماكياج.

هذو أكثر خبيرات تجميل نتابع في فيديواتهم أول بأول وهما اللي تعلمت منهم هلللللللبة حاجات لهذا فضلتهم على البقية كهدية :)

الرابع والأخير حجمه 1 جيجا وفيه دروس للكروشيه، عن نفسي 2015 كانت سنة ضغوطات وتوتر في بعض الفترات فكان تعلّم الكروشيه أحسن علاج نفسي وابتعاد عن التوتر والحصول على جلسة استرخاء مميزة، و على فكرة هذا رأي الكثيرات من اللي يديروا في الكروشيه.   

هديتي الخامسة هي مق له غلاف خدمته بنفسي بالكروشيه، ودرت عليه قلب لأن الهدية اخترتها وخدمت عليها من قلبي، باش تستمتعوا بشرب القهوة في الشتوية وانتو تقروا في مقالات المدونة ♥ ولأن مدونة سمَر الهدف منها المشاركة في كل ما تعلمته لهذا حبيت ننقل متعة المشاركة لكم، الهدية عبارة عن زوز مق، لكِ ولصديقتك أو أختك أو أي حد يعز على قلبك حابة أنه يشاركك التجربة هذي، هدية من قهوة سمَر ومنك  ♥♥   

هديتي السادسة والأخيرة هي لانة لونها أبيض، مقاسها مناسب للي يبي يتعلم الكروشيه، مع الفيديوات اللي في الـ DVD حيكون عندك فرصة مليحة للتدرب شوية عالموضوع، ومعه إبرة الكروشيه أو الطيّ مقاس 4.5 وهو مقاس مناسب جدا لتعلم الكروشيه زيما هدرزتلكم مرة عالموضوع.

مسابقة لها شروط محددة باش تدخلي في السحب، وهي:  

1- حطي الصورة هذي على حسابك الفيس أو انستاجرام أو تويتر ومنشن لخمسة من صاحباتك، قوليلهم شن رأيك في المدونة وهل استفدتي منها وشن أكثر المواضيع اللي شدت انتباهك (النقطة هذي تساعدني في تطوير المدونة ونعرف بها أنك متابعة جيدة مش خاشة للمسابقة وخلاص) ، والبوست لازم يكون ببلك Public عالعام باش نقدر نشوفه سواء عالفيس، تويتر أو انستاجرام.

2- حطي الهاشتاق #قهوة_سمر #هدية_سمر باش نقدر نلقاك عالنت وتدخلي في السحب (لأنه من غيره صعب نلقى المشاركات). 

3- ديري منشن @قهوة سمَر عالفيس أو @samarscoffee على انستاجرام أو تويتر. 

4- ديري منشن لصاحبتك اللي تبي تهديلها المق في تعليق على الصورة على صفحة قهوة سمر عالفيس.  

5- ديري طلب إضافة للجروب هذا  Tripoli Girls - Where Can I Find لأنه من خلاله نقدر نعرف حساب الفيس أصلي أو مؤقت، تقدروا تطلعوا من الجروب بعدين هذي حرية شخصية لكن لوازم المسابقة فقط :) 

6- ديري متابعة لحساب المدونة على الفيس بوك وانستاجرام و تويتر.

المسابقة حتبدأ يوم 15 ديسمبر وتنتهي يوم 31  ديسمبر إن شاء الله، يعني أسبوعين، واختيار الفائزة حيكون بالقرعة والاختيار حيكون على ابن أختي الصغيرون، الاسماء كلها حتكون في ورق، وهو يختار :P  
المسابقة حتكون في ليبيا كلها، ولو أنك من خارج طرابلس يفضل تكوني ضامنة طريقة نبعتلك بيها الهدية، لو عندك حد هنا أو بالبريد.

تقدروا تشاركوا على جميع حساباتكم الاجتماعية سواء على الفيس بوك، تويتر أو انستاجرام، لكم حرية الاختيار، لكن الحسابات المزيفة أو الخاصة بالمسابقات مش حتكون محسوبة.  

الهدية هذي كانت بسيطة وكان خاطري تكون فيها هلبة حاجات من أساسيات الماكياج، لكن إن شاء الله المتابعات الحقيقيات للمدونة لكم هدية على مستوى أقوى المرة الجاية إن شاء الله لما تكبر المدونة، وشكرا لكم على دعمكم وتشجيعكم الدائم في تعليقاتكم، انتو مميزات والدافع لي باش نستمر في الكتابة ♥♥♥♥   

ملاحظة: الهدية مقدمة من مدونة سمَر، كَون أن أغلبها من انجلوت لا يعني أنها برعاية انجلوت (للعلم فقط).

لنا لقاء قريب بإذن الله تعالى :)

محبتي ،،   

سمّر

الفيديو هذا مهم جدا للشابات والسيدات اللي عندهم مشكلة حبّ الشباب، أو ظهور البثور على الوجه .. فكرة أنك تحطي كريم أساس بكميات رهيبة لعندما توصلي لمرحلة أنك تغطيهم كلهم حتبيّن وجهك كأنه حيط تزوق بأكثر من طبقة وهذا مش حلو أبدا في حقك، لهذا لازم تتعلمي فكرة كيف تغطيهم باش تحصلي نتيجة متبانش فيها أي حاجة من البثوور أو (الحبّ) بالليبي.

أول حاجة حطي في بالك أن جلد الوجه طالما مش كله فيه حبّ يعني انتي مش ملزمة تغلفي المناطق اللي حالتها صحية، ركزي بس وين فيه حبّ، مش حلو ان ماكياجك معاش يبيّن الجلد الطبيعي، لأن هكي حتكوني فعلا كأنك لابسة قناع، وكأنك تديري فاصل بينك وبين اللي قدامك والمصيبة لو كان زوجك أو خطيبك!! صدقيني حيتشتت تركيزه وحيقعد مركز في الكلاكيع والطبقات وحيقعد يدور عليكِ بين كل هذه الزحمة.

استعلمت ليزا أول حاجة برايمر، ممكن تكون بشرتك جافة لهذا حتكون محتاجة لحاجة ترطبها باش تريح الحبّ وتنعم البشرة، ولو كان البرايمر طبي فهذا حيكون ممتاز.

بعدين حطت كريم أساس طبقة خفيفة ومغطتش الاماكن اللي فيها حبّ، يا دوب تنقص من اللون الأحمر عالوجه بسبب الحبّ، يا دوب عالجلد، بعدين دارت هايلايت بس سائل لأن لمعته الخفيفة حتنعش مشهد الوجه.

بعدها استعملت كونسيلر بالفرشاة على أماكن الحبّ، لكن مش خدت منطقة كاملة وحطت الكونسيلر أو الفاونديشن اللي هي استعملاته يا دوب مركزة على الحبّة نفسها، الكونسيلر اللي استعملاته يعتبر ثقيل لأنه مش سائل وحتى لو استعملت السائل، تركيزك على نقطة محددة حيخلي التغطية ممتازة.

بعدها خطمت عليهم بنفس كريم الاساس الاول الخفيف هلبة باش يولي المشهد متناسق، كمية صغيرة على كل حبّة بروحها، يعني مش تعاود كريم الاساس على كل الوجه من جديد.

بعدين باش تثبتي الكونسيلر حطي عليه باودر، اي باودر للوجه لكن متحطيش بالفرشاة، استعملي الاسفنجة في حركة طبطبة لطيفة جدا، باش ميتحركش الكونسيلر لو استعملتي فرشاة وكان تحريكك لها سريع او يمسح الكونسيلر ويحركه شوية من مكانه لأنه وقتها حتبان الحبّة، بس تقدري تحطي البودرة بالفرشاة على باقي الوجه وين ما مفيش حبّ.

الفيديو مهم جدا وننصح اللي عندها المشكلة هذي تتابعه وتجرب الطريقة هذي، لأن وضع الماكياج لا يعني أنك تخلي كل الناس تعرف أنك حاطة ماكياج، الفلاحة أنك تحطيه وتبرزي جمال ملامحك من غيرما تخلي حد يلاحظ انك مدايرة لمسة على ملامحك

خليكي ذكية.

لو عندك صديقة تعاني من المشكلة هذي، متبخليش عليها بمشاركة للبوست أو ابعتيه لها في رسالة.. 

محبتي ،،

سمر