الحق مكنتش نركز عالموضوع لكن السنوات اللي فاتت انتبهت، وللمصداقية مدرتش حاجة بخصوص الموضوع!! مش حنكذب وندير روحي مثالية، الاهتمام عالبركة وخلاص وعمري ما كملت حكة كريما لعندما تبهدل وجهي الصيف اللي فات لأني استعملت غسول اتضح بعدها أن صلاحيته انتهت لأني نستعمل فيه لما نتذكره بس، ومن يومها أعلنت التوبة والاهتمام بموضوع الترطيب وبديت نكمل في حكة الكريما :D.
نرجعوا لموضوعنا، الشتاء والصقع والهواء المصقع اللي يجي عالوجه والايدين، كلها مسببات لجفاف البشرة لهذا وجب التنبيه من توة في الوسع باش تجهزي أسلحتك الدفاعية، فالمعركة على وشك أن تبدأ نياهاهاها (عودة للواقع)!
أول حاجة حنقولك شن الحاجات اللي حتقابلك في الشتوية وكيف تتفاديها وشن تختاري من الاستعدادات لها..
1- الجوانتيات (القفازات) لو تلبسيهم لما تكوني بره بالذات اللي يطلعوا الصبح بكري يفضل تلبسوهم باش تحمي ايديك من الهواء المصقع، بالذات للصغار، نتذكر عذاب زمان في المدرسة كيف كنا متجمدين ومرات للحصة الثالثة أو الرابعة باش ايدينا يدفوا، عن نفسي أمي كانت تديرلنا جوانتي باللانة لكن حالتي مستعصية وايديا مينفعش معاهم شئ، لهذا انتبهوا.
2- الترطيب، ثم الترطيب ثم الترطيب، خليك عم تمعطي في روحك وصغارك طول اليوم لأن هذا هو المنقذ الأول من جفاف البشرة، الايدين الرجلين، واهتمي بالنقطة هذي بعد الاستحمام فورا، ويفضل والجسم مازال رطب شوية مش جاف كلياََ.
3- كريم يدين، كريم الرجلين، شخاشير غليظة بعد دهن الرجلين بالفازلين، مرطب شفاه، هذو مهم يكونوا ديما قراب منك، بالذات مرطب الشفاه وكريم اليدين لما تطلعي من البيت، زمان لما كنت في المدرسة ونطلعوا الصبح في عز الصقع كنت ديما نمعط في شواربي ونبلل فيهم بالريق نحساب روحي نرطب فيهم، لكن الحكاية اتضح أنها تجفف فيهم أكثر وأكثر وبهذا يتقشروا ونقشر فيهم زي الهبلة وينجرحوا، فيلم هندي مع الزمن انتفخوا (نفخ شفايف ببلاش بواهاهاهاها) لكن مرة حد لقاني ندير في اللقطة فنبهني عليها يومها انتبهت لروحي وفهمت علاش شواربي ديما يتقشروا، ووقفت الحركة هذي.
4- متدوشيش في مية سخونة هلبة، خليك عالمية الدافية .. للمصداقية المعلومة هذي قريتها من موقع للصحة، لكن مستحيل نطبقها لأنه كان مش الحمام ساونة معبي بخار لدرجة الاختناق حنتجمد وبصراحة الشتي صقع مش حنضحي بروحي!!
5- حاولي تكون الفوطة متعك أنعم حاجة باش متزيدش عالبشرة، بشرتي في الشتي تولي متعبة جدا ومش متحملة حاجة، مع أن فوطتي ناعمة جدا لكن أي حاجة تخلي جلدي يتهيج ويولي أحمر، لهذا انتبهوا وممكن فعلا المفروض تاخذي دوش مية دافية بس عن نفسي منبيش!!
6- ديما نظفي شفايفك باش تديريلهم تقشير وتنحي الطبقات الميتة أول بأول باش ميصيرلكش زي الفالطة متعي، فيه مقشر للشفاه طبيعي هو سكر وزيت زيتون، تفركيه بلطف على الشفايف وفيه اللي يستعملوا في طريقة الفرشاة، أنك تاخذي فرشاة أسنان ناعمة وبعدما تغسلي شفايفك تمشي عليهم بلطف بالفرشاة.
7- النصيحة الأخيرة صعبة شوية لأنها حتخلينا في حالة طوارئ وهي باش ترطبي بشرتك لازم تشربي مية هلبة، ايه عارفة عارفة الحقيقة المرة وطابور الحمام، لكن لا مفر، ننسى نشرب المية لهذا ديما جنبي طاسة مية ومرات تقعد جنبي بالساعة، كل مرة ناخذ جغمة، لكن المهم هي جنبي، ولو تبي طريقة أحسن حددي مقياس معين شيشة مثلا أو ثلاث شيش صغار عبيهم و حطيهم في الثلاجة، وتكوني متفقة مع نفسك أنه لازم تكمليهم اليوم بأي طريقة.
وإن شاء الله تكون الشتوية هذي شتوية غير عالبلاد ونستمتعوا جميعا بها قدر الإمكان..
محبتي ،،
سمَر
7 تعليقات
والله اصعب شي جفاف البشرة في الشتاء .. بشرتي جسمي وايديا وشفايفي رطبات ومافيهمش تهيج ﻻني نهتم صح مش هلبا بس اكتر شي الميه مستحيل نستغنى عليها نشرب مش اقل من 3 لتر يوميا ومرات اكتر ﻻني اصلا نحبها هههههه
ردحذفبس وجهي ما لقيتلاش حل بكل ! ديما جاف وقشور .. انوض الصبح عادي بمحرد ما نغسله ونجففه يبدا قشور جربت اميه دافية وجربت سخونة وجربت مصقعة وجربت فاترة ! جربت بالغسول وجربت بالصابون القالب وتصدقي حتى من الشامبو قالولي جربيه وجربته !
جربت فوطه ناعمة وفوطة حرشه وكلينكس وقالولي جففي بقماش قطن وجربت ! ههههههه مافيش فايدة نهائي
جربت كريمة جابتهالي صاحبتي والله اسمها نسيته بس شكرتهالي هلبا صاحبتي وجابتهالي مرة ع اساس بنجربها وجربتها كدا يوم ما نفعتش معاي !
قالولي جربي الرسو تبع القهوة خلطيه بشوية امية ورد وديريه درته في نفس اليوم بشرتي ولت ناعمة تاني يوم رجعت زي ماهيا وما بيتش نرجع نديره ﻻنه يعتبر مقشر ومفروض مش اكتر من مرة في الاسبوع ع حد علمي !
ههههههههههههه نتكلم هلبا انا راهو ! المهم توا تابتة ع كريم للبشرة الجافة من ماركة فرنسية اعتقد .. اسمها ( ﻻ روش بوزيه La Roche posay هكي تكتب اعتقد ! ) حتى هي ما نفعتش معاي بس قاعدة مستمرة وبس ..
الخلاصة انتي شنو تستخدمي لبشرة وجهك ؟ .. ويارب تكون الشتوية هده غير عن كل الشتويات اللي فاتو وربي يفرج علينا
موسع بالك رسمي لكن نهنيك ،، يا ريتني من زمان مهتمة بروحي ههههه لكن ستر ربي أن بشرتي مستقرة بس مشكلة الجفاف لأن بشرتي جافة ،، المهم الصيف اللي فات كنت ديما نغسل بدوف كان الاريح نم بين الصوابين وعندي غسول سائل نسيت شن نوعه ديما ننسى فيه مرة مرة نغسل بيه ونرجع لدوف المهم بعد فترة باش فهمت سبب تشرد بشرتي، كانت تولي جافة لدرجة اني مش طايقة وجهي، وتتقشر في تراكين لين تولي جرح، يعني البشرة تتقشر وتتنحى لين توصل لدرجة انها تنجرح.. مشيت لصيدلية في شارع خالد بن الوليد الظهرة وسألت الدكتورة شن تنصحني نصحتني بكريمتين واحدة غالية وواحدة نص نص وطبعا خذيت متع نص نص ههههههه
حذفاسمها Fluidbase Retinol with Vitamin C ,وهذا الرابط متعها
http://genoveusa.com/products/fluidbase-retinol-with-vitamin-c
نصحتني نستعملها مرتين في اليوم صباحا وقبل النوم، الكريم ثقيل ومينفعش تحطيه وتطلعي من البيت أو تحطي عليه كريم اساس لأن وجهك حيقعد مزيت و يلمع ، حسيته مداير طبقة عازلة للوجه عن المحيط الخارجي كليا باش ميأثرش فيه شئ ,, وفعلا بعد فترة قصيرة بشرة وجهي تحسنت هلبة هلبة هلبة ورجعت صافية ولونها أصبح أفتح وموحد .. لكن لما لقيتها مش مناسبة لما نبي نطلع و الحق كنت نبي كريم تركيب نعبى عليه لما ندير ماكياج، لأن الترطيب مهم قبلما تحطي ماكياج على وجهك ونبي كريم يمتصه الوجه بسرعة وفيه كريم هلبة بنات عاليوتيوب يشكروا فيه فخذيت منه واحدة وصيت عليها من بره اسمها origins ginzing moisturizer
وهذا اللينك متع موقعها http://www.origins.com/product/15352/26237/skincare/moisturize/moisturizers/GinZing/Energy-boosting-Moisturizer
فعلا ممتازة قبل الماكياج وكاستعمال يومي نستعمل فيها أول ما نغسل وجهي الصبح و قبلما نرقد، لكن مش عارفة لو حتتحمل جفاف الشتي أو لا لأنها خفيفة بس ممكن مع حالتي تتحمل بحكم أني قاعدة في البيت وواخذا اجازة فمش حنطلع في صقع الصبح. والكريمة هذي خفيفة جدا وناعمة و ريحتها منعشة، ريحة برتقال .. عن نفسي ننصح بالزوز ونفكر نرجع للأولى باش تكون كريم يومي قبل النوم و الثانية صباحية، باش نغذي بشرتي كويس وانا راقدة والخفيفة تخليني نحط اي مستحضر على وجهي وانا مطمنة أن وجهي مش مزيت و يلمع ..
أزال المؤلف هذا التعليق.
حذفﻻ مزال انا نتكلم اكتر من هكي بس اختصرتلك هههههههه
حذفاي حتى اللي نستعمل فيها توا ما تمتصهاش البشرة واندير فيها قبل ما نرقد مع ان الصيدلانية ما قالتليش ديريها قبل ما ترقدي هههههه
بس انا ما نتحملهاش وانا نايضة .. :)
بما ان تحسنت بشرتك بشكل ملحوظ ف اكيد حنأخدها الكريمة ونستخدمها في الليل بس طبعا ههههه
وكريم الترطيب لو لقيته حنجربه بس لو ما لقيتاش ف صعب نوصي عليه حد من برا !! الا لو نقدر ناخده اونلاين من الموقع :)
ومشكورة ♡
العفو يا حلو :* :* كان مخابش ظني بداية الصيف كان سعرها حاجة و اربعين ،، توة يستر الله وين حتكون وصلت ، لو لقيتيها قوليلي :)
ردحذفبالنسبة للميه الفتره الاولى بس تقعزي ماشيه جايه ع الحمام بعدين شكله الجسم يتعود ع الكميه عن تجربه نتكلم انا احيانا نشرب في زوز ليتر ونصف <3 في البدايه شبه عايشه في الحمام ههههه بعدين بديت عادي زي قبل . . .
ردحذفماشاء الله، اليومين اللي فاتوا خشيت لجروب عالفيس مدايرين تحدي ثلاث لترات في اليوم وفعلا زيما قلتي قالت ان الجسم مع الوقت يتعود عالمية، قاعدة نحاول نزيد في معدل الشرب لأنه الحق لازمني هلبة النظام هذا .. وشكرا على تأكيدك على نجاح الناظم هذا :*:*
حذف