ترددت هلبة في كتابة المقالة هذي، كنت نفكر نكتبها في هيئة مقارنة بين نوعين من النساء لكن خفت تكون كتابتي فيها نوع من الهجومية، لكن توة عرفت كيف نفتح عليكم الموضوع.
خلال منتصف السنة هذي تقريبا أو في بدايتها (مش متذكرة امتى بالضبط ومش بعيد يكون في بدايتها) كان فيه تحدّي على موقع للكتب Goodreads والتحدي هذا كان أن كل واحد يشترك فيه يتحدى نفسه أن يقرا مائة كتاب في السنة، شاركت في التحدي لكن كنت واقعية وقررت نقرا خمسين كتاب، وفعلا بديت نقرا لكن خلال هذيك الفترة خطم عليا ستين ألف مزاج، على اكتئاب، على ملل (بتاع كله)، وللأسف من أكثر من اسبوعين بس انتبهت أن السنة قريب تكمل وحضرة جنابي قريت كتابين بس!!
كانت صدمة أن السنة هذي حتكمل وشبه مفيش أي انجازات، هو فعلا أنا قصدا قررت نخش عليها بدون أي أهداف، بسبب الاحباط في عدم قردتي على تنفيذ أهداف متكاملة خلال السنوات اللي فاتت والبركة في وضع البلاد المشجع، لكن مش لدرجة كتابين بس في 365 يوم!!
درت حساب جديد على Goodreads وحددت مجموعة كتب و روايات قررت نلحق نقراها قبل نهاية السنة، عالأقل نحس بنوع من الانجاز، وأول أمس بديت في الأولى، لما نكملها حنكتب رأيي فيها، والحق كنت ناوية نكملها في نفس القعدة لولا أن عيوني وجعوني من الشاشة.
هذا رابط حسابي على الموقع في حال حبيتوا تديروا طلة على الكتب اللي نقرا فيها أو ناوية نقراها ونكون سعيدة لو نشوف حسابكم وشن قريتوا وناخذ رأيكم فيه :)


الهدف من كلامي هذا هو أني نبي نوصل لنقطة، أتمنى تكون عند كل فتاة و سيدة وأم، خلونا نتخيلوا مع بعض، لو انتي أم وعندك صغار ومكملتيش قرايتك وكان هدف حياتك الزواج فقط، حسب توقعك وانتي شخص ميحبش القراية ومش مهتم بيها، كيف حتكون حواراتك مع زوجك؟ حتكون حوارات علمية، تعليمية، تحليلية، تاريخية فيها معلومات مفيدة يستفيد منها الصغار وهما مقعمزين معكم منسجمين معكم في النقاش، أو مش شرط يكونوا مستمعين، عقلهم اللاواعي يخزن في اللي يسمعوا فيه، مجرد أنهم يشوفوا والدهم ووالدتهم ناس مثقفة وفاهمة شن تتوقعوا تأثيره عليهم؟ أو تتوقعي تكون قعدتك مع زوجك وهدرزتكم كلها شفت علانة شن دارت وشفت فلانة شن دارت وشفت هذاكا شلافطي والخ الخ قرمة في الناس لأن مخزونكم الثقافي والعلمي قليل يكاد ينعدم، شن تتوقعوا يكونوا صغاركم؟ 
الفيديو هذا مع أنه مضحك وجوه مليح لكن فيه رسالة قوية هلبة، الصغار نسخة من أهلهم، ربيتوهم وعلمتوهم كويس حيطلعوا كويسين، معدلتوش عليهم وخليتوا الشارع و الناس والرسوم اللي أغلب مشاهدها سخيفة تربيهم حيطلعوا حاجة ثانية خالص!!



مشهد الزوجة وهي شادة روج في لقطة دلع جميلة صح بس بالنسبة لزوجها، متخليش بنتك تشوفك ديما لاهية في الماكياج بس وفي جمالك (الخارجي)، طيب ومن داخل؟ أمتى حتشوفك بنتك أو ابنك شادة كتاب تقري؟ من قال أن مشهد سيدة تقرا مش حلو أو دقة قديمة؟ من قال أن الرجل ميحبش يهدرز هدرزة مثقفة وفيها معلومات ونقاش ينعش العقل مع زوجته؟


 لو الزوج افتقد لهذه الحاجات حيجي يوم وينبهر بسيددة ثانية الحوار معها شيق وممتع ومختلف عن الحوار اللي تعود عليه معك واللي أغلبه "شفت هذيك شن دارلها راجلها، وشفت هذاك شن درا شن هو الخ الخ " صدقيني حيجي يوم ولا شعوريا حتشده واحدة ثانية وإن لم تكن تقصد هذا.


بغض النظر عن اللي كنت نتكلم عليه، قضيتنا هنا هي الصغار، تربيهم على حاجة صح، فيه فرق أن الطفل يكبر في بيت فيه مكتبة معبية كتب من شتى المجالات (كتب حقيقية مش ديكور) ويشوف في والده شاد كتاب ويقرا، في مشهد مهيب وبين أنه شايف والديه شادينها مسلسلات تركية وهدرزتهم كلها عن الناس وبس (حتقولوا انتي تتبلي وتتهمي فيهم غلط) لا.. اللي معنداش قضية أو هدف وفاضي شن تتوقعوا منه يدير؟ يشد كتاب يقرا؟ يتناقش في قضايا الكوكب؟ أو يتكلم عن الناس ويكسد عليهم؟ (القرمة)؟؟

الاستعداد للزواج مش حوايج وماكياج وجو وهياجة، انتي مش داخلة على زواج وخلاص، انتي داخلة على مسؤولية أكبر من رجل وبيت، انتي حتأسسي عائلة، العائلة هذي أو الاسرة انتي أحد المسؤولين عليها، والمسؤولية مش لعب، أنك تهيئي شخصيتك وتصقليها وتثقفي نفسك جزء من الاستعداد للزواج، لأنه حيقابلك في حقبة ما وحتكوني محتاجة للخبرة هذي اللي اكتسبتيها زمان، وعلى فكرة ،، حتى مشهد قعدة مزاج لوحدك وجنبك سفرة شاي أو قهوة مع شوية حبات شوكولا وانت في كامل نعومتك وأناقتك، منسجمة في القراءة وغارقة في تفاصيل القصة وأحداثها، حتى المشهد هذا مؤثر على فكرة :D

اسألوا أنفسكم الاسئلة هذي وفكروا، كيف تبوا صغاركم يكونوا لما يكبروا؟ هل تبوا تكون قدوتهم حد براني او انتو؟

محبتي ،،
سمر