برايمر العين أو مثبت ظل العين، هلبة سيدات وبنات يحسابوا أن القصة حطي كريم أساس بعدين الماكياج وانتهى الموضوع، للأسف الحكاية طلعت أكبر من كده بكثييييييير.

برايمر العين يجي في حالتين وكل حالة تعتبر منتج مختلف عن الثاني لكن ليهم مهام متقاربة من بعض قبلما نتكلموا عن المنتجين هذو خلونا نهدرزوا عن البرايمر.

فيه أنواع منه تجي شفافة من غير لون وفيه أنواع تجي ملونة وعالغالب تكون درجة فاتحة من درجات لون البشرة وممكن ملونة، ليش فاتحة؟ خلونا نفترضوا أنك مثلا بشرتك حنطية اللون وبتحطي عليها برايمر درجة لونه أغمق من درجة لون بشرتك، وطبعا البرايمر تحطيه في مساحة العين كاملة يعني كل الجفن وتركبي فوق لعند الحاجب بالضبط، لأن هذي هي المنطقة اللي بتحطي فيها ظلال العين بغض النظر عن ماكياجك هل تبي تكثري وتوصلي للحاجب أو لمسات خفيفة و خلاص.

لو البرايمر داكن وانت زيادة بتحطي ألوان داكنة أو متوسطة، نهاية المشهد حيكون شكل عينك كأنه حد عاطيك بوكس!! انتي بس تخيلي وحتوصلك الفكرة، يعني كأنك واخذة ظل لونه بني وحطيتيه على كامل مساحة العين (نفرض انه برايمر) وبعدها اللون هذا بديتي تحطي عليه ألوان الماكياج متعك الخاصة بالعين، تتوقعي فيه حاجة حتبان؟؟ حتكون حوسة ولو تبي تجربي باش تتخيلي المشهد أكثر جربي.

حتى لو حطيتي البرايمر بدرجة أدكن شوية مش هلبة هذا حيخلي شكل عينك كأنك تعاني من اسوداد العين، فيه ناس عندهم حول العين وتحتها لون داكن وانتي حتكوني أكدتي عالشئ هذا لوكان الاساس متع ماكياجط داكن عن لون بشرتك، وهذا أصلا حيبينك كأنك مرهقة وتعبانة و الغرض من الماكياج أنه يطلعك منتعشة ومقبلة على الحياة :D

ثاني حاجة البرايمر الهدف منه هو أنه يثبت ماكياج العين ويبرز ألوانه، لو تحطي ظلال العين على عينك طول من غير أي حاجة مستحيل يعلق عليها، حتى لو لصق شوية ما بينما جهزتي نفسك ولبستي حيكون اختفى، حتى لو حطيتيه على كريم أساس بس مش حيعطيك نفس النتيجة لأن كريم الأساس مش من خصائصه أنه يبرز الظلال بقدر أن وظيفته تلوين الوجه في درجة واحدة.

البرايمر في الغالب فيه نسبة ترطيب للعين، باش تتقبل الماكياج وحسب ما قريت عنه أنه مرات جفن العين تبان فيها ثنايا هلبة والبرايمر يخلي الجفن ذو مستوى واحد (مش ديما) وهذا حيخلي جمال العين وظلها يبان أحلى.

أهم حاجة أنك قبلما تحطي ماكياج على وجهك أنك تغسليه، وبعدها تحطي مرطب وخلال مالا يزيد عن نصف ساعة تبدي تحطي الماكياج، أكثر من هكي حيبدا الوجه يطلع زيون وغير ذلك وهذا حيأثر على ثبات وجمال الماكياج + صفاء البشرة والأهم من هذا أنك متحطيش الماكياج إلا وتكوني متأكدة أنك ايدك كيف غاسلتيهم، حفاظا على بشرتك من الجراثيم.

توة حتسألوا أيهما نحط أولا البرايمر أو كريم الأساس؟ امممممم حسب، أنا نستعمل في نوعين وكل نوع نحط فيه في مرحلة معينة بس خلوني نتكلم عن أنواع مثبت ظل العين وبعدها نقوللكم أنا شن نستعمل.

النوع الأول مثبت ظل العين Eye Primer: وهذا صمم باش يكون فعلا مثبت ظل العين وعالأغلب لونه شفاف عالعين لما تحطيه، انسيابي سهل أنك تحطيه عالعين، مش كلكوع أو حاجة تجف بسرعة، تحطيه بصبعك في حركات أشبه بالطبطبة وميأثرش على لون الجفن، ويختفي بسرعة بعدما تحطيه، ويدوم تأثيره على ظلال العين لفترة طويلة خلال اليوم طبعا مش إلى الأبد! وتقدري تحطيه قبل كريم الاساس بعدما ترطبي بشرتك على طول.

النوع الثاني أساس ظل العين Eye Shadow Base: وهذا عبارة عن ظل للعين لكن كريمي الملمس، وثقيل القوام، تقدري تحطيه على الجلد يعني قبل كريم الأساس أو بعده، وتقدري تحطيه بالفرشاة أو الاسفنجة في حال كان ملون، لو لونه قريب من لون البشرة ومن غير لمعة بأصبعك أريح.

عن نفسي منستعملش في البرايمر شخصيا لكن نستعمل في بدائل عنه حسب اللي نتابع في دروسهم عاليوتيوب، نتابع في أكثر من خبيرة تجميل واحدة منهم جاكلين هيل تستعمل في كونسيلر طويل الأمد يعني يطول هلبة في العين MAC Pro Longwear Concealer وبما أنها كانت تخدم في شركة ماك وقتها في مراكز البيع وتعرف ميزة الكونسيلر هذا في أنه يقوم بوظيفة البرايمر أصلا ويهيئ العين لمرحلة الماكياج، ويخفي كل العروق اللي تبان في الجفن ولأنه ثقيل فتغطيته ممتازة ويطول لفترة ممتازة خلال اليوم، الحق عن نفسي خذيته لأنه كان أحد مكونات الماكياج متع العرس، فضربت الموضوع اثنين في واحد على أساس شريت كونسيلر وبرايمر، لكن ككونسيلر ثقيل ويوما ما حناخذ واحد أخف نبدل بينهم لأن هذا يعتبر للمناسبات القومية (الأعراس واللمات هكي نسموا فيهم في بيتنا :D ) واللي معنداش مشكلة أنه يبان أنه حاط ماكياج هلبة حيناسبه بس وبصراحة منبيش نبان هكي!!

طريقة الاستعمال عندي لونين واحد منهم أفتح من لون بشرتي واللون اللي بعده طول أغمق NW20 + NW25 لهذا نخلط فيهم باش نوصل للدرجة المليحة ليا، لكن كبرايمر نستعمل الدرجة الأفتح لأنها مع ظلال الماكياج وكريم الاساس لونها يولي طبيعي وميبانش بقعة بيضاء في عيني، وبعدما نكمل ماكياج العين نحط كريم الاساس ونكمل باقي الحاجات.

النوع الثاني من البرايمر الحق الحق خذيت منه لأنه اسهل وأسرع وأخف في الاستخدام، اللي هو أساس ظل العين خذيت من ماركة Bobbi Brown Long-wear Cream Shadow ودرجة اللون اللي خذيتها كانت Bone يعني لون العظام ههههههه مليحة ومناسبة وحجمه صغير مازال أريح من متع ماك للاستعمال الدائم كبرايمر.

حنذكر مجموعة برايمر اللي نتابع قنواتهم عاليوتيوب يستعملوا فيهم، لكن للعلم هذا لا يعني أن هذوا بس اللي في العالم ولازم تشروهم، جاكلين هيل ديما تستعمل في الكونسيلر سواء ميبلين أو نارس أو ماك وهكذا، مش مقيدة روحها بالموضوع وماكياجها ممتاز دائما من ناحية أنه يطول ويبان جميل في الألوان والثبات، وانا نفسي حاليا حنقعد نستعمل اللي عندي ومش حنكثر لأني أساساََ منبيش نكون ديما عابية عالماكياج، بصراحة حنزيد نهتم ببشرتي باش تولي أصفى، اليومين الأخيرين وضعها مش عاجبني من السهر ونبي الماكياج يكون طشة خفيفة ديما مجرد لمسات لإبراز جمال العين والجو هذا، وزوج المستقبل نفسه مش النوع اللي يحب وجه مزوق، بعدين بصراحة خلونا واقعيين الرجالة ميحبوش الماكياج لهذا التركيز ضروري يكون أكبر في الاهتمام بالبشرة، لأنه حيريحك نفسيا ومن ناحية الثقة بنفسك لما تكوني من غير ماكياج + لو حطيتي ماكياج حيبان حلو عليك لأن بشرتك صافية وصحية ومش حتضطري وقتها تحطي هلبة حاجات باش تخفي أي شئ انتي مش راضية عليه في بشرتك.

متوقعتش روحي حنتكلم هلبة عالموضوع للدرجة هذي لكن المهم متعقدوش روحكم، وكبداية لو عندك كونسيلر جربيه كبرايمر  لو لقيتيه تمام ممتاز، حتكوني ضربتي عصفورين بحجر بس لو عندك رغبة تكلفي نفسك وتجيبي كل شئ بروحك فبالتأكيد استمتعي بتجربة المنتجات وقوليلنا رأيك فيهم :)

أول منتج وهلبة يهبلوا عليه من  Urban Decay واسمه Eyeshadow Primer Potion سعره على موقعهم 20 دولار لكن توة تخفيض لعشرة دولار.

النوع الثاني من MAC واسمه Pro Longwear Paint Pot  وفيه منه هلبة درجات ألوان، السعر 22 دولار


نوع ثالث تستعمل فيه خبيرة التجميل ليزا إلدريدج من Guerlain واسمه Ombre Eclat Eye Primer سعره 38 دولار!! (أنا مليش دعوة نسميلكم وانتو قرروا عن نفسي مستحيل نشريه إلا لما نولي غنية هلبة هلبة هلبة ومهتمة نجرب كل شئ!!)

ومن NARS عندهم واحد مشهور وهلبة يستعملوا فيه  Smudge Proof Eyeshadow Base  سعره 25 دولار.

    
بالنسبة لماركة NYX وتعتبر قريبة لجودة الماركات العالمية قليلا مش في كل حاجة لكن في ذات الوقت من اللي أسعارها كويسة ومناسبة للغالبية كخيار كويس، عندها ثلاث أنواع من البرايمر، حنذكرهم بالتتابع:
1- Eye Shadow Base  برايمر العين زي النوع الثاني اللي شرحت عليه، سعره 7 دولار مش عارفة كم حيكون سعره عند وكيل الماركة هذي في طرابلس، مش متأكدة من الوكالة جديا لكن حسب ما سألت الشابات اللي يخدموا في المحل قالوا أنه فعلا وكيل، لو خطمت عالمحل حنحط الأسعار هني في حال كانت المنتجات هذي عندهم، المحل اسمه POIS في حي الأندلس والصفحة الخاصة بالماركة هذي في ليبيا NYX Professional Makeup Libya       
2- HD Eye Shadow Base وسعره حتى هو 7 دولار على الموقع.     
3- Waterproof Eye Shadow Primer وهو ضد الماء وممكن تستعمليه لما تبي تمشي تحت المطر مع حبيب القلب أو تديروا سالطوا في البحر بالماكياج :D سعره 7 دولار       

فيديو:

الفيديو الأول لت كلوي مورولو واستعملت فيه بوبي براون اللي نستعمل فيه لكن لون ثاني، وظلال ماكياجها من انجلوت لو حابين تتعرفوا عليهم أكثر من خلال تجربتها، وطريقة رسمها للحواجب تعجبني هلبة، خفيفة أنيقة ومش مبالغ فيها، نصيحة تشوفوا الفيديو. 


والفيديو الثاني استعملت فيه نفس اللون اللي عندي واللي تعرفت عليه من خلال الفيديو هذا ومنه قررت ناخذه.


فيديو ثاني لكلوي استعملت نوع ثاني مذكرتاش لكن المحصلة أن البرايمر ينحط بنفس الطريقة على الاغلب (مدة الفيديو خمس دقائق)


بالنسبة لكونسيلر ماك اللي نستعمل فيه فأكثر من يتعامل معه كبرايمر هي جاكلين وهذا فيديو لها استعملاته فيه،
 الفيديو صوراته عالسريع ومدته تسع دقائق وأول حاجة دارتها أنها حطت الكونسيلر عالعين كبرايمر ..


ليزا الدريدج في الفيديو هذا استعملت اربان ديكاي  Urban Decay Primer زي الفيديو هذا

وفي الفيديو هذا استعلمت براير من TheBalm وحطاته بالفرشاة


كلوي مورولو استعملت في الفيديو هذا منتجات من ماكس فاكتور Max Factor بس من ضمنهم ظل كريمي فيه لمعة كأساس لماكياج العين.



خلاصة الأمر نزيد ونعاود متربطوش روحكم بحاجة من اللي ذكرته، البرايمر مش حاجة خارقة ولو كان ماركة غالية معناها يدير مفعوله، اللي تلقيه هنا حيكون كويس وننصح بالماركات المعروفة المصدر، شوفوا انجلوت الأول، مورينا زمان كان عندهم لوريال توة مش عارفة لو مازال أو لا، تبيله طلة مع ان أسعارهم شاطت فيها النار لدرجة جنونية جدا!

أتمنى تكون مقالتي الطويلة هلبة مفيدة وجاوبت على تساؤلاتكم، يهمني ويهم المتابعات يعرفوا خياراتكم من البرايمر وشن تستعملوا ومن وين شريتوه وبكم باش نختصروا على بعض التشحيط والشحورة، التعليقات لوطة حتكون مكان هدرزتنا، حنكون سعيدة بالنقاش معكم :)

محبتي ،،
سمَر