خلال الفترة اللي فاتت وبعدما تابعت هلبة قنوات لتعليم الماكياج على اليوتيوب تعلمت هلبة أساسيات حنقول الأهم واللي نشوف فيها اللي لازم تنحط في عين الاعتبار ..

لما تحطي الماكياج سواء أكان البودرة أو ظل العين أو أحمر الخدود وحتى الكونتور وسعي بالك هلـــــــــــــــبة في مزج الألوان بالفرشاة لأنه بالطريقة هذي الماكياج مش حيبان في خطوط واضحة وبالمزج حيبان المظهر أحلى بالذات لأحمر الخدود لأني شفت عروس جديدة كان أحمر خدودها زي ماروكو بالضبط، دائرتين في وسط الخد!!


في ذات الوقت متنسجميش هلبة في ظل العين باش ميوصلش للحواجب ويا خوفي يفوتهم :P

نصيحة، أعطي النقطة هذي أهمية خاصة وركزي على النوعية ومواصفاتها بالذات النعومة، فيه نوعيات تلقيها أنعم من نوعيات ثانية والأهم من هذا هل تتحمل الغسل أو لا، لأنه المفروض تغسلي فرشك بعد عدة استعمالات ممكن خلال الاسبوع مرة لو انتي من النوع اللي تحطي مكياج كل يوم، حنتكلم أكثر على الموضوع هذا في استفاضة في مقالة منفصلة إن شاء الله.

كثيرات يتمادين في وضع المساحيق لدرجة تجعلهن خرجن عن المنطق، فالماكياج الهدف منه أن يقوم بتعديل بعض العيوب أو بهتان البشرة أو البثور، فلا يوجد انسان ببشرة متجانسة اللون، زد على هذا فهو يبرز الجمال وهذا يعني الحفاظ على الشكل الطبيعي الذي خلقنا الله به مع بعض اللمسات التي تزيدنا جمالا.

الكونتور مش قانون سماوي فرض تنفيذه!!

تقدري تقولي أنه إضافة جميلة في السهرات والطلعات المميزة، لكن أنك تفكري فيه كل يوم فالموضوع لا يستحق أبدا، زد على هذا فيه اللي يتمادوا فيه جدا لدرجة أن معالم وجههم تولي غير منطقية، ايه صح الماكياج يخليك جميلة لكن في ذات الوقت لما يزيد عن الحد المنطقي يمكن يخليك مش حلوة أبدا!!

الكونتور ميزته أنه يحدد معالم الوجه بطريقة جميلة كإبراز الوجنتين لكن لما يولي رسم للتفاصيل حيكولي شكلك مش حلو ومش واقعي وفوقها مش منطقي!! وبالنسبة للهايلايت فالفكرة منه أن يكون في الأماكن اللي ينعكس عليها الضوء، و باش تعرفي الاماكن هذي في وجهك اوقفي قدام المراية بحيث يكون فيه مصدر ضوء ويفضل طبيعي وحركي وجهك في عدة اتجاهات ولاحظي وين الجهات اللي ينعكس عليها الضوء، غادي ينحط الهايلايت.

مفيش حاجة اسمها حاجب عرضه اثنين سنتيمتر!! صدقيني مش حلو مش حلو مش حلو وخلقة ربي أجمل منها مفيش فمتفكريش تديري حاجة مش منطقية ومش واقعية، أحيانا نحس أن النساوين من كثرما يوقفوا هلبة عالمراية يتعودوا على شكلهم فيقعدوا يزيدوا في الماكياج ويطلعوا في علل في روحهم بالغصب :/

مشكلة منتشرة بطريقة غريبة في مجتمعنا، كل بنت تبي تكون بيضاء بالغصب حتى لو استلزم منها أنها تحط كريم اساس ابيض وجسمها حنطي اللون أو أسمر، حضرت مرة عرس بدون مبالغة واحدة من السودان تقريبا كانت ضيفة لون وجهها كان رمادي لأنها حطت كريم أبيض مع أن بشرتها سمراء!! من قال أن البشرة السمراء مش حلوة؟ من قال أن اللي بيضاء هي الجميلة؟؟

الأجانب يسمروا في روحهم وشادينها برونزاج ويستعمل في كريمات تسمرهم وحشيشتهم يتسطحوا عالشط باش تولي بشرتهم برونزية لأنهم شايفين أنها جميلة ونحن عندنا النعمة هذي وهلبة يتهربوا منها؟! لما تختاري كريم أساس مهم جدا تاخذيه حسب لون جسمك لأنه في العادة الوجه والرقبة لونهم مختلف عن لون الجسم بحكم الحجاب، الوجه يبان وديما مقابل الشمس وأهم حاجة هي انه لازم تحبي نفسك وشكلك زيما هو وتحافظي على بشرتك لأن أساس الماكياج الحلو بشرة صحية ومرتاحة.

أتمنى نكون أفدتكم ،،

محبتي ،،