لا،، مفيش طريقة محددة لرسمة العين، كل بنت عندها طريقتها أو ممكن نفس الطريقة لكن باختلاف ترتيب المراحل واختلاف الأدوات المستعملة لكل بنت عن الثانية، بس الأكيد أن النتيجة هي المشتركة بينهم، رسمة عين متقنة وتزيد العين جمالا " طبعا هذا محتاج تاكم رموش طوال وكثيفين باش ببساطة المشهد يبان جميل هذا رأيي".

تعلمت طريقة رسمة العين بعدما حضرت أكثر من فيديو تدريبي ولتوة ماستقريتش على طريقة خاصة أو المفضلة عندي، بس العبرة في التنفيذ، بالنسبة لي مركزتش في الموضوع هلبة لأني مقررة أني مش حنكون البنت أو الزوجة اللي ديما تبي يبان أنها حاطة ماكياج، تعجبني نظرية الجمال الطبيعي وعدم إخفائه اللي عند الأجانب، لهذا حنستعمله لما ندير ماكياج قوي أو متوسط ويلزمه رسمة العين، غير هكي أعتقد أني حنفوت الموضوع.

نرجعوا لموضوعنا، حنعرض عليكم كم فيديو يشرح رسمة العين الغالبية بالانجليزي لكن حندور على فيديوات بالعربي ونضيفهم للبوست "لما يرجع الضي إن شاء الله" ههههه

أول فيديو لـ كلوي مورولوو وعينها تعتبر دائرية الشكل  شوية ،،

كلوي بدأت رسمة العين من الزاوية الداخلية للعين، واستعملت الفرشاة اللي فيها زاوية حادة والجل الخاص برسمة العين، رسمت الخط شبه بنفس العرض والعرض خلاته رقيق لأنها تبي تعطي عينها الشكل اللوزي، يعني العين اللوزية (المقصود بهذا أن شكل العين زي اللوز وهي حتزبطوها في الفيديو الثالث لأن عين جاكلين لوزية الشكل).

لما وصلت للزاوية تبعت خط العين السفلي وعلى امتداده دارت رسمة العين، بعدين وصلاته بالخط العرضي فوق عينها، لكن صارتلها غلطة فباش تمسح الغلط عندها فرشاة ثانية مشتها على قطنة فيها مزيل ماكياج وقعدت تخطم على الغلط باش تمسحه، كأنه محاية.

الفيديو الثاني الحق معرفتش نقرا اسمها لكن المهم أنها دارت كل عين بفرشاة مختلفة، وواحدة رسمها بالجل والثانية بسائل، بدأت من نص العين باش تزبط كم العرض اللي تبيه وبناء عليه تكمل الرسمة، طريقتها ذكية و حتعجبكم.

الفيديو الثالث لجاكلين هيل ،، 

جاكلين بدت من نهاية العين وبدت ترسم في الخط عريض شوية وكلما قربت من زاوية العين الداخلية كانت تنقص في عرضه قدر الامكان، و بعدها رسمت الزاوية ووصلتها بخط العين.


هذو هما الفيديوات اللي من خلالهم تعلمت كيف ندير رسمة العين، لو حتدوروا عالنت حتلقوا هلبة، لكن حطوا في بالكم أن الموضوع تبيله تدريب هلبة، متخليش يصيرلك إحباط من أول تجربة، لأن أول تجربة حتفوت في رعشة الايدين والعيون و التركيز كيف تتحكمي في العين متخليهاش مترمش هلبة، ومع الوقت حتولي سوبر في الموضوع .. بس وسعي بالك :)

نسيت حاجة، لما تبي ترسمي عينك يفضل يكون عندك مراية فيها جهة تكبر الصورة، خلي المراية لوطة و لما ترسمي اشبحليها لأسل، الزاوية هذي حتسهل عليك المهمة أكثر. 

وهذا فيديو  بالعربي داراته هدى خبيرة التجميل العراقية


وهذا الفيديو لدلاليد بالعربي لكن الحق رسمة الحاجب بالطريقة هذي أنا ضدها مازال نفضل يقعد شوية واقعية في المشهد وميختفيش شكل الحاجب الحقيقي كليا ,,



أتمنى نكون سهلت عليكم الموضوع ..

محبتي ،،